.jpg)
ឈ្មោះគណនីហ្វេសប៊ុក ដែលបង្ហាញលក់ឱសថ LIANHUA QINGWEN JIAONANG ដោយខុសច្បាប់លើបណ្តាញសង្គម។ រូបថត ក្រសួងសុខាភិបាល
ភ្នំពេញ៖ ក្រសួងសុខាភិបាលកម្ពុជាបញ្ជាឲ្យបញ្ឈប់ជាបន្ទាន់ការផ្សព្វផ្សាយ និងលក់ឱសថបុរាណចិន LIANHUA QINGWEN JIAONANG ដោយខុសច្បាប់លើបណ្តាញសង្គម ខណៈព្រមានចាត់វិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកទាំងនោះ បើនៅតែបន្តល្មើស។
ការព្រមានយ៉ាងដូច្នេះ បន្ទាប់ពីបានពិនិត្យឃើញមានគណនីបណ្តាញសង្គមហ្វេសប៊ុក (Facebook) ជាច្រើន រួមទាំងឱសថស្ថាន ឱសថស្ថានរង អគារលក់ឱសថបុរាណមួយចំនួន កំពុងផ្សព្វផ្សាយ និងលក់ឱសថបុរាណចិនប្រភេទនេះ ដោយគ្មានលេខបញ្ជិកា។ នេះបើតាមការអះអាងរបស់ក្រសួងសុខាភិបាលនៅក្នុងសេចក្តីប្រកាសព័ត៌មានចុះថ្ងៃទី ២៥ មិថុនា។
ជាមួយនឹងការផ្សព្វផ្សាយគ្មានបញ្ចិការ ក្រសួងក៏បានរកឃើញដែរថា គណនីហ្វេសប៊ុកទាំងនោះ ក៏គ្មានក្រុមហ៊ុននាំចូលត្រឹមត្រូវ ព្រមទាំងកំពុងផ្សព្វផ្សាយ ភូតកុហក បោកប្រាស់ និងបំភ្លើសហួសពីការពិត ដោយគ្មានមូលដ្ឋាន វិទ្យាសាស្ត្រត្រឹមត្រូវ ថាអាចព្យាបាលជំងឺកូវីដ ១៩ បានជាដើម។
បន្ថែមពីនេះ បន្ទាប់ពីក្រសួងសុខាភិបាលបានទិញឱសថ ផលិតផលបំប៉នសុខភាព ឬឱសថបុរាណ ដែលលក់តាមប្រព័ន្ធអនឡាញ មកធ្វើការត្រួតពិនិត្យគុណភាព បានពិនិត្យឃើញថា ផលិតផលទាំងនោះភាគច្រើនពុំអាចធានាបាននូវគុណភាពបានឡើយ គឺជាផលិតផលមានគុណភាពមិនត្រឹមត្រូវ ឬក្លែងក្លាយទៀតផង។
ក្រសួងបានបញ្ជាក់ថា៖ «ដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាព ឬឈានដល់បាត់បង់អាយុជីវិតរបស់អ្នកប្រើប្រាស់ទៀតនោះ ក្រសួងសុខាភិបាលសូមណែនាំដល់បងប្អូនប្រជាពលរដ្ឋទាំងអស់ត្រូវបញ្ឈប់ការទិញឱសថបុរាណចិន LANIA QRGWEN JACRAAN ក៏ដូចជាឱសថបុរាណ ឬឱសថផ្សេងៗទៀត ដែលលក់តាមអនឡាញគ្រប់ប្រភេទ»។
អនុលោមតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ តម្រូវឱ្យរាល់ការលក់ឱសថ ឬឱសថបុរាណ ក្នុងប្រទេសកម្ពុជា ត្រូវមានលេខទិដ្ឋាការ ឬបញ្ញិកាពីក្រសួងសុខាភិបាល ហើយតម្រូឱ្យលក់នៅក្នុងឱសថស្ថាន ឱសថស្ថានរង និងអគារលក់ឱសថបុរាណស្របច្បាប់តែប៉ុណ្ណោះ។
ដូចនេះ ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ ចំពោះម្ចាស់គណនីហ្វេសប៊ុកទាំងអស់ ដែលបាននិងកំពុងនាំចូល ចែកចាយ និងផ្សព្វផ្សាយលក់ឱសថបុរាណចិនខាងលើ ទៅតាមច្បាប់ស្តីពីច្បាប់វិសោធនកម្មច្បាប់ស្ដីពីការគ្រប់គ្រងឱសថជាធរមាន។
ក្រសួងបានបញ្ជាក់ថា៖ «សូមប្រជាពលរដ្ឋមុននឹងទិញឱសថ ឬឱសថបុរាណគ្រប់ប្រភេទ សូមពិនិត្យមើលលតាបត្របញ្ចិកា ដែលមានបិទលើសម្បកវេចខ្ចប់ត្រឹមត្រូវ គឺមាន ២ ផ្នែក ១ ផ្នែកខាងលើមានឈ្មោះគ្រឹះស្ថានអាហរ័ណ នីហរ័ណ ២ ផ្នែកខាងក្រោមមានលេខបញ្ជិកា»។
តាមក្រសួងសុខាភិបាលបានឱ្យដឹងថា ឈ្មោះគណនីហ្វេសប៊ុក ដែលបង្ហាញលក់ឱសថទាំងនេះ គឺរួមមានឈ្មោះ ១-Global Products ២-សុខភាពប្រចាំថ្ងៃ ៣-Online Shop ៤-JHRWS ៥-ឱសថបុរាណចិន Lianhua Qingwen Capsule 6-R&N Supply 7-999 online shap ៨-Morakot លក់អាល់កុលសុទ្ធ 100% និងគណនីជាច្រើនផ្សេងទៀត៕
