.jpg)
គ្រូពេទ្យយកសំណាកប្រជាពលរដ្ឋ និងអាជីវករផ្សរលើធំ ដើម្បីធ្វើតេស្តស្វែងរកមេរោគកូវីដ ១៩ កាលពីម្សិលមិញ។ រូបថត រដ្ឋបាលខេត្តសៀមរាប
សៀមរាប/កំពង់ចាម៖ រដ្ឋបាលខេត្តសៀមរាប នៅថ្ងៃទី ២៦ មិថុនានេះ បានចេញប្រកាសពីការរកឃើញករណីវិជ្ជមានជំងឺកូវីដ ១៩ ចំនួន ៥៧ នាក់បន្ថែមទៀត និងអ្នកជាសះស្បើយមានចំនួន ៤ នាក់ ខណៈនៅខេត្តកំពង់ចាមឯណោះវិញ ក៏បានប្រកាសពីការរកឃើញអ្នកឆ្លងជំងឺកូវីដ ១៩ ចំនួន ៣១ នាក់បន្ថែមទៀត និងអ្នកជាសះស្បើយមាន ៣៨ នាក់។
តាមការប្រកាសរបស់រដ្ឋបាលខេត្តសៀមរាបបានបញ្ជាក់ថា អ្នកឆ្លងទាំងនោះ មានករណីទី១ ដល់ទី៣៧ ជាករណីមានប្រភពចម្លងចេញពីផ្សារលើធំថ្មី ក្រុងសៀមរាប, ករណីទី៣៨ ដល់ទី៤៤ ជាករណីពាក់ព័ន្ធនឹងការឆ្លងរាលដាលជំងឺកូវីដ ១៩ ក្នុងសហគមន៍ ដែលមានប្រភពដើមមកពីស្រុកជីក្រែង, ករណីទី៤៥ ដល់ទី៥០ ជាករណីមានប្រភពចម្លងចេញពីភោជនីយដ្ឋាន ហេង ហេង ២ និងករណីទី៥១ និងទី៥២ ជាករណីមកពីរាជធានីភ្នំពេញ។
រីឯចំពោះករណីទី៥៣ និងទី៥៤ គឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ ខណៈករណីទី៥៥ ដល់ទី៥៦ ជាអ្នកធ្វើដំណើរមកពីខេត្តតាកែវ និងករណីទី៥៧ ជាករណីមកពីខេត្តឧត្តរមានជ័យ។
ក្រៅពីការរកឃើញអ្នកឆ្លងជំងឺនេះ រដ្ឋបាលខេត្តក៏បានបង្ហាញពីការព្យាបាលជាសះស្បើយចំនួន ៤ នាក់ផងដែរ ដោយពួកគាត់ត្រូវបានក្រុមគ្រូពេទ្យអនុញ្ញាតឱ្យចេញពីមន្ទីរពេទ្យបង្អែកខេត្តត្រឡប់ទៅលំនៅឋានវិញ តែតម្រូវឱ្យបន្តការធ្វើចត្តាឡីស័ករយ:ពេល ១៤ ថ្ងៃទៀត។
សម្រាប់ខេត្តសៀមរាបមកទល់ពេលនេះ រដ្ឋបាលខេត្តបានរកឃើញមានអ្នកឆ្លងជំងឺកូវីដ ១៩ សរុបចំនួន ៨០៨ នាក់, បានព្យាបាលជាសះស្បើយចំនួន ២៧៣ នាក់ និងអ្នកស្លាប់មាន ៩ នាក់ ខណៈចំនួន ៥២៦ នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប, មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។
ដោយឡែកនៅក្នុងខេត្តកំពង់ចាម រដ្ឋបាលខេត្តនេះក៏បានបង្ហាញពីការរកឃើញអ្នកទើបឆ្លងជំងឺកូវីដបន្ថែមចំនួន ៣១ នាក់ផងដែរ ក្រោយពេលមន្ទីរសុខាភិបាលខេត្តនេះយកសំណាកពីមនុស្សចំណូលស្រុក និងអ្នកសង្ស័យចំនួន ៣៨៦ នាក់ ទៅពិនិត្យ និងបានបង្ហាញពីការរកឃើញអ្នកជាសះស្បើយមានចំនួនរហូតដល់ ៣៨ នាក់ ទៀតផង។
បើតាមសេចក្ដីប្រកាសរបស់រដ្ឋបាលខេត្តកំពង់ចាម ការរកឃើញអ្នកឆ្លងនេះ គឺជាអ្នករស់នៅក្នុងស្រុក-ក្រុងចំនួន ៨ ក្នុងនោះមានស្រុកស្ទឹងត្រង់ ៤ នាក់ ស្រុកកងមាស ៤ នាក់ ស្រុកកោះសូទិន ១ នាក់ ស្រុកចម្ការលើ ៤ នាក់ ក្រុងកំពង់ចាម ៦ នាក់ ស្រុកបាធាយ ២ នាក់ ស្រុកជើងព្រៃ ៧ នាក់ ស្រុកព្រៃឈរ ២ នាក់ និងម្នាក់ទៀតមកពីខេត្តកំពង់ធំ។
ជាមួយនឹងការរកឃើញអ្នកឆ្លងជំងឺកូវីដ ១៩ និងអ្នកជាសះស្បើយថ្មីនេះ រដ្ឋបាលនៃខេត្តទាំង ២ បានអំពាវនាវស្រដៀងគ្នាដោយឱ្យប្រជាពលរដ្ឋដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមាន ត្រូវរួសរាន់ធ្វើចត្តាឡីស័កនៅតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់ ១៤ ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។
ទន្ទឹមនឹងនេះ ប្រសិនបើមានការប្រែប្រួលសុខភាព ដូចជាក្អកមានស្លេស ក្ដៅខ្លួនលើសពី ៣៧ អង្សា ពិបាកដកដង្ហើម ឈឺ ក តិចតួច ចំពោះខេត្តសៀមរាប សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។ ចំណែកនៅខេត្តកំពង់ចាម សូមទាក់ទងតាមរយៈលេខទូរស័ព្ទ ០៧០ ៨២៨ ៧៨៨ និង០១២ ៧៣៦ ៧៥៥ ៕
