បន្ទាយមានជ័យៈ នគរបាលព្រហ្មទណ្ឌកម្រិតធ្ងន់ខេត្តបន្ទាយមានជ័យនៅថ្ងៃទី ២៧ មិថុនា កំពុងបន្តស្រាវជ្រាវតាមចាប់បុរសសង្ស័យម្នាក់ ពាក់ព័ន្ធរឿងទំនាស់ព្រំដីដែលជនសង្ស័យប្រើពូថៅកាប់ស្ត្រីចំណាស់ម្នាក់ស្លាប់ពីថ្ងៃទី ២៦ មិថុនា ប្រព្រឹត្តនៅ ស្រុកព្រះនេត្រព្រះ ខេត្តបន្ទាយមានជ័យ។
លោក ភឿង ម៉ាន់សិង្ហ នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ ប្រាប់ឱ្យដឹងនៅរសៀលថ្ងៃទី ២៧ មិថុនាថា ស្ត្រីរងគ្រោះក្នុងអំពើឃាតកម្មនេះឈ្មោះ សួ សួង អាយុ ៧៤ ឆ្នាំ រស់នៅភូមិឃូស្វាយ ឃុំបុសស្បូវ ស្រុកព្រះនេត្រព្រះ ខេត្តបន្ទាយមានជ័យ។
លោកថ្លែងថា៖ «យើងបានស្គាល់អត្តសញ្ញាណរបស់ជនសង្ស័យហើយហើយយើងកំពុងស្វែងរកជនសង្ស័យយ៉ាងសកម្មបំផុតដែរ។ ការងារនេះកំពុងស្ថិតក្នុងប្រតិបត្តិការហេតុដូច្នេះហើយយើងមិនទាន់អាចប្រាប់ពីឈ្មោះជនល្មើសបានទេ។យើងប្រើកម្លាំងពាក់ព័ន្ធទាំងអស់ក្នុងការតាមចាប់ជនល្មើស»។
លោក ធឿន សុខា នាយរងនគរបាលប៉ុស្តិ៍ឃុំបុសស្បូវ ឱ្យដឹងនៅល្ងាចថ្ងៃទី ២៧ មិថុនាថា ពាក់ព័ន្ធនឹងអំពើឃាតកម្មនេះគឺកើតឡើងដោយសារទំនាស់ព្រំដីចម្ការហើយរវាងផ្ទះរបស់ជនសង្ស័យ និងផ្ទះរបស់ស្ត្រីរងគ្រោះនៅឆ្ងាយពីគ្នាប្រមាណជា១០០ ម៉ែត្រ។ ចំពោះស្ត្រីរងគ្រោះត្រូវបានជនសង្ស័យចូលកាប់ដល់ផ្ទះចំនួន ៤ ពូថៅត្រូវក្បាល មុខ និងដងខ្លួនស្លាប់នៅកន្លែងកើតហេតុ ពេលដែលស្ត្រីរងគ្រោះនៅផ្ទះម្នាក់ឯង៕