.jpg)
ជនសង្ស័យមុនពេលស្លាប់ដោយការធ្វើទារុណ្ឌកម្ម។ រូបថត នគរបាល
ភ្នំពេញៈ ក្រុមគ្រួសារនិងសាច់ញាតិ ជនសង្ស័យម្នាក់បានជំរុញឲ្យអាជ្ញាធរខេត្តបាត់ដំបង និងសមត្ថកិច្ចជំនាញនៃស្ថាប័នពាក់ព័ន្ធនានា បន្តអនុវត្តនីតិវិធីតាមផ្លូវច្បាប់ ដើម្បីឈានដល់ការចាប់ឃាត់ខ្លួននិងផ្តន្ទាទោសចំពោះជនប្រព្រឹត្ត«អំពើទារុណកម្ម» ដើម្បីយកចម្លើយពីជនសង្ស័យរហូតដល់ស្លាប់។
កាលពីរសៀលថ្ងៃទី ០៣ មេសា ឆ្នាំ ២០២១ ជនសង្ស័យឈ្មោះ ពេជ្រ ធារ៉េត អាយុ ៣១ ឆ្នាំ មានទីលំនៅភូមិបោះពោធិ ឃុំអូរដំបង ១ ស្រុកសង្កែខេត្តបាត់ដំបងត្រូវបានសមត្ថកិច្ចនគរបាលស្រុកសង្កែ ចាប់ឃាត់ខ្លួននៅប៉ុន្មានម៉ោងក្រោយពីប្រពន្ធរបស់គាត់បានស្លាប់ ដោយករណីឆក់ខ្សែភ្លើង ដែលអ្នកភូមិនិងសាច់ញាតិរបស់ប្រពន្ធគាត់បានដាក់ការសង្ស័យថា ជាទង្វើរបស់គាត់ដើម្បីសម្លាប់ប្រពន្ធ ដោយសារតែក្ដី«ប្រចណ្ឌ»។
នៅល្ងាចថ្ងៃដដែលនោះ គឺប៉ុន្មានម៉ោងប៉ុណ្ណោះក្រោយពីកម្លាំងអធិការដ្ឋាននគរបាលស្រុកសង្កែ ចាប់យកទៅសួរចម្លើយគាត់ក៏បានស្លាប់ ហើយសមត្ថកិច្ចបានសន្និដ្ឋានថា ការស្លាប់របស់គាត់បណ្ដាលមកពី «ជំងឺគាំងបេះដូង ដោយសារការប្រើប្រាស់គ្រឿងញៀនហួសកម្រិត»។
ប៉ុន្តែសាច់ញាតិរបស់គាត់បានសន្និដ្ឋានដោយដាក់ការសង្ស័យថា ការស្លាប់របស់គាត់គឺបណ្ដាលមកពី«ការធ្វើទារុណកម្ម» ក្រោយពីពួកគេ បានពិនិត្យឃើញសពរបស់គាត់មានស្នាមរបួសបែកឈាមពេញខ្លួន ខុសពីសភាពដើម[ពេលចាប់ខ្លួន]ហើយក៏បានដាក់ពាក្យបណ្ដឹងសុំឲ្យសមត្ថកិច្ចជំនាញពាក់ព័ន្ធ ស្រាវជ្រាវស្វែងរកការពិតលើករណីនេះ។
អ្នកស្រី ពេជ្រ លីណា ដែលជាបងស្រីបង្កើតរបស់ជនសង្ស័យឈ្មោះ ពេជ្រ ធារ៉េត បានប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែ មិថុនា ឆ្នាំ ២០២១ ថា យោងតាមលទ្ធផលនៃការស៊ើបអង្កេតរបស់គណៈកម្មាធិការជាតិប្រឆាំងទារុណកម្មដែលបានប្រកាសកាលពីថ្ងៃទី ១៦ ខែ មិថុនា ឆ្នាំ ២០២១ កន្លងទៅថ្មីៗនេះ បានបង្ហាញថា ការស្លាប់របស់ប្អូនប្រុសគាត់ គឺ បណ្ដាលមកពី«ការធ្វើទារុណកម្ម» ហួសប្រមាណ ដូចអ្វីដែលគាត់និងក្រុមគ្រួសារបានដាក់ការសង្ស័យតាំងពីដំបូងមក។
អ្នកស្រីបានបញ្ជាក់ថា៖ «ប្អូនប្រុសខ្ញុំគ្រាន់តែជាជនជាប់សង្ស័យប៉ុណ្ណោះ មិនមែនជាពិរុទ្ធជននោះទេ ការធ្វើទារុណកម្ម ដើម្បីយកចម្លើយ គឺជាអំពើខុសច្បាប់។ ដូច្នេះខ្ញុំសូមឲ្យសមត្ថកិច្ចអនុវត្តច្បាប់តាមនីតិវិធី ដើម្បីផ្ដល់ភាពយុត្តិធម៌ដល់ប្អូនប្រុសរបស់ខ្ញុំវិញ»។
អ្នកស្រីបានរៀបរាប់ថា នៅពេលគេចាប់វាយខ្នោះប្អូនប្រុសគាត់យកទៅសួរចម្លើយនោះ គឺ ប្អូនប្រុសរបស់គាត់ស្លៀកខោអាវពណ៌ខ្មៅ ជើងវែងនិងដៃវែង និងគ្មានស្លាកស្នាមរបួសទាំងអស់។ ប៉ុន្តែនៅពេលសមត្ថកិច្ចប្រាប់ថាប្អូនប្រុសរបស់គាត់ស្លាប់ ស្រាប់តែឃើញសាកសពមានស្នាមរបួសធ្ងន់ធ្ងរ ដែលអាចឲ្យគាត់សន្និដ្ឋានថា បណ្ដាលមកពីការធ្វើទារុណកម្ម មិនមែនបណ្ដាលមកពី គាំងបេះដូងដោយសារការប្រើប្រាស់គ្រឿងញៀនហួសប្រមាណដូចការសន្និដ្ឋានរបស់សមត្ថកិច្ចឡើយ។
យោងតាមរបាយការណ៍របស់គណៈកម្មាធិការជាតិប្រឆាំងទារុណកម្មចុះថ្ងៃទី ១៦ មិថុនា ឆ្នាំ ២០២១ ស្ដីពីលទ្ធផលនៃការស្រាវជ្រាវស៊ើបអង្កេតលើករណីជនសង្ស័យឈ្មោះ ពេជ្រ ធារ៉េត ដែលបានស្លាប់ពេលបញ្ជូនទៅស្នងការដ្ឋាននគរបាលខេត្តបាត់ដំបង កាលពីថ្ងៃទី ៣ ខែ មិថុនា ឆ្នាំ ២០២១ ដែលភ្នំពេញប៉ុស្តិ៍ទទួលបានកាលពីថ្ងៃទី ២៧ ខែមិថុនា បានបង្ហាញថា ជនសង្ស័យអាចមានការធ្វើទារុណកម្មស្រាល ឬធ្ងន់ទៅលើជនសង្ស័យអំឡុងពេលឃុំខ្លួនបណ្ដោះអាសន្ននៅអធិការដ្ឋាននគរបាលស្រុកសង្កែខណៈដែលជនសង្ស័យកំពុងមានអាការៈឡេះឡោះរំខានដល់មន្ត្រីនៅទីនោះ។
ជាមួយគ្នានេះ គណៈកម្មាធិការនេះបានស្នើជាពិសេសដល់អគ្គស្នងការនគរបាលជាតិបើកការស៊ើបអង្កេតបន្ថែម លើករណីនេះដើម្បីស្វែងរកការពិតក៏ដូចជាឲ្យមានការទទូលខុសត្រូវចំពោះមុខច្បាប់ក្នុងករណីមានធ្វើទារុណកម្ម ឬ អំពើមិនគប្បីឯទៀតដែលបណ្ដាលឲ្យលោកពេជ្រ ធារ៉េត ស្លាប់នេះ។
នៅក្នុងការស៊ើបអង្កេតលើករណីខាងលើនេះ ក្រុមការងារអធិការកិច្ចរបស់គណៈកម្មាធិការជាតិប្រឆាំងទារុណកម្ម បានជួបពិភាក្សា និងជួបសម្ភាសន៍ផ្ទាល់ជាមួយប្រភពចំនួន ០៨ គោលដៅ រួមមានមន្ត្រីស្នងការដ្ឋាននគរបាលខេត្តបាត់ដំបង មន្ត្រីអធិការដ្ឋាននគរបាលស្រុកសង្កែ នាយប៉ុស្តិ៍រដ្ឋបាលឃុំអូរដំបង ១ សាច់ញាតិនិងសាក្សីនៅក្បែរផ្ទះពេជ្រ ធារ៉េត(អ្នកស្លាប់) អនុប្រធានភូមិបោះពោធិ គណៈកម្មការកោសល្យវិច្ច័យ តំណាងសហគមន៏ការពារសិទ្ធិមនុស្សអាដហុក និងព្រះរាជអាជ្ញារងអមសាលាដំបូងខេត្ត។
ជុំវិញករណីនេះ លោក ស៊ុន សុវណ្ណ អធិការស្រុកសង្កែ បានប្រាប់ ភ្នំពេញ ប៉ុស្តិ៍ថា គាត់មិនដែលចេញបញ្ជាឲ្យមន្ត្រីក្រោមឱវាទធ្វើទារុណកម្មជនសង្ស័យ ឬជនត្រូវចោទណាម្នាក់ ដើម្បីទទួលបានចម្លើយសារភាពនោះទេ ហើយការសន្និដ្ឋានចំពោះករណីស្លាប់របស់ជនសង្ស័យឈ្មោះ ពេជ្រ ធារ៉េត ថាបណ្ដាលមកពី គាំងបេះដូងក្រោមឥទ្ធិពលនៃការប្រើប្រាស់គ្រឿងញៀនហួសកម្រិតនោះ ក៏មិនមែនជាការសន្និដ្ឋានរបស់លោកដែរ តែជាការសន្និដ្ឋានរបស់គ្រូពេទ្យផ្នែកកោសល្យវិច្ច័យសាកសព។
លោកបានថ្លែងថា៖ «ទោះជាបែបណាក៏ដោយ ក្នុងនាមខ្ញុំជាថ្នាក់ដឹកនាំ ខ្ញុំក៏ត្រូវទទួលខុសត្រូវផងដែរ ប្រសិនបើគណៈកម្មាធិការជាតិប្រឆាំងទារុណកម្ម ឬក្រុមការងារអធិការកិច្ចនៃអគ្គស្នងការដ្ឋាននគរបាលជាតិរកឃើញថាការស្លាប់របស់ជនសង្ស័យឈ្មោះ ពេជ្រ ធារ៉េតនោះពិតជាបណ្ដាលមកពីការធ្វើទារុណកម្មយ៉ាងពិតប្រាកដមែននោះ»។
លោក យិន ម៉េងលី អ្នកសម្របសម្រួលសមាគម សិទ្ធិមនុស្សអាដហុកប្រចាំខេត្តបាត់ដំបងបានប្រាប់ ភ្នំពេញ ប៉ុស្តិ៍ថា ថ្វីត្បិតតែលទ្ធផលបឋមរបស់គណៈកម្មាធិការជាតិប្រឆាំងទារុណកម្មនៅមានភាពមិនច្បាស់លាស់ ប៉ុន្តែបានបង្ហាញសញ្ញាមួយ ដែលឆ្លុះបញ្ចាំងអំពីភាពមិនប្រក្រតីនៃការកសាងសំណុំរឿងភូតកុហក់ជាលក្ខណៈប្រព័ន្ធរបស់អាជ្ញាធរមូលដ្ឋាននៅពេលពេលប្រព្រឹត្តទង្វើឆ្គាំឆ្គងឬមិនស្របច្បាប់អ្វីមួយ ដែលនាំឲ្យពលរដ្ឋឈឺចាប់ និងខឹងសម្បារចំពោះរាជរដ្ឋាភិបាល។
លោកសង្ឃឹមថា ថ្នាក់ដឹកនាំនឹងចាត់វិធានការតាមផ្លូវច្បាប់ ដើម្បីនាំខ្លួនជនប្រព្រឹត្តទារុណកម្ម លើជនសង្ស័យឈ្មោះ ពេជ្រ ធារ៉េត រហូតដល់ស្លាប់ ទៅផ្ដន្ទាទោមតាមផ្លូវច្បាប់៕
