ក្រចេះ: កូរ៉េខាងត្បូងបានប្រគល់អគារសិក្សាថ្មី១ខ្នងដែលបំពាក់ទៅដោយសម្ភារទំនើបដល់សាលាបឋមសិក្សាហ៊ុនសែនហាន់ជ័យក្រោម ស្ថិតក្នុងឃុំហាន់ជ័យ ស្រុកឆ្លូង ខេត្តក្រចេះ ដែលជាការនាំមកនូវប្រព័ន្ធអប់រំទំនើបសម្រាប់សិស្សនៅតំបន់ជនបទមួយនេះ។
អង្គការឆាលហ្វាន់ (ChildFund) កម្ពុជាបានឱ្យដឹងក្នុងសេចក្តីប្រកាសព័ត៌មានកាលពីថ្ងៃទី ២៥ ខែមិថុនាថា៖« ថ្ងៃនេះ អគារសិក្សាថ្មីសន្លាងមួយខ្នងត្រូវបានសម្ពោធដាក់ឱ្យប្រើប្រាស់និងប្រគល់ជូនសាលាបឋមសិក្សាជនបទមួយក្នុងស្រុកឆ្លូង»។
លោក ប៉ែន លីណាត អភិបាលរងនិងជាអ្នកនាំពាក្យសាលាខេត្តក្រចេះប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែមិថុនាថា ការជួយឧបត្ថម្ភអគារសិក្សាបន្ថែមរបស់អង្គការឆាលហ្វាន់នេះ គឺជាការចូលរួមក្នុងការអភិវឌ្ឍវិស័យអប់រំជាមួយរដ្ឋាភិបាល ហើយនឹងធ្វើឱ្យកុមារនៅតំបន់ជនបទនេះ ទទួលបានការអប់រំល្អប្រសើរ។
អគារសិក្សាថ្មីនេះ ជាផ្នែកមួយនៃកំណែទម្រង់ប្រព័ន្ធអប់រំតាមរយៈគម្រោងដែលមានឈ្មោះថា «ងាយស្រួលរៀន»ដែលបង្កើតឡើងដោយអង្គការឆាលហ្វាន់កម្ពុជាក្រោមជំនួយឧបត្ថម្ភពីទីភ្នាក់ងារសហប្រតិបត្តិការអន្តរជាតិកូរ៉េ (KOICA) ពីឆ្នាំ ២០១៩ ដល់ ២០២១។
គម្រោងនេះបាន និងកំពុងអនុវត្តដោយអង្គការដៃគូក្នុងស្រុកមួយឈ្មោះថា សមាគមខ្មែរដើម្បីអភិវឌ្ឍន៍តាមជនបទដែលហៅកាត់ថា កាហ្វដុក (KAFDOC) និងមានគោលបំណង ដើម្បីធានាថាកុមារគ្រប់រូបបានចូលរៀនប្រកបដោយគុណភាពតាមរយៈការប្រើប្រាស់បច្ចេកវិទ្យាទំនើប កំណែទម្រង់វិធីសាស្ត្របង្រៀន និងរៀន ព្រមទាំងពង្រឹងការចូលរួមពីសហគមន៍។
អង្គការ ឆាលហ្វាន់ បានបញ្ជាក់ថា កុមារប្រមាណជាង៦០០០នាក់ នៅតាមសាលាបឋមសិក្សាចំនួន ១៧ បានទទួលផលពីគម្រោងនេះ ហើយបុគ្គលិកសិក្សាប្រមាណ ២៨៤ នាក់ ត្រូវបានពង្រឹងសមត្ថភាពក្នុងការបង្រៀន និងគ្រប់គ្រងសាលារៀន។
បើតាមអង្គការ ឆាលហ្វាន់ ក្រៅពីអគារសិក្សា គម្រោងបានសាងសង់អគារបណ្ណាល័យទំនើបដាច់ដោយឡែកចំនួន៧,អគារបង្គន់អនាម័យតភ្ជាប់ប្រព័ន្ធទឹកចំនួន៧,កន្លែងខួងអណ្តូងប្រើសូឡាចំនួន២,អណ្តូងកែលម្អថ្នាក់រៀនឱ្យទៅជាបណ្ណាល័យចំនួន៥,បន្ទប់រៀបចំកុំព្យូទ័រចំនួន៣ដោយបំពាក់កុំព្យូទ័រលើតុ៤៨គ្រឿងនិងផ្តល់សៀវភៅអានជាង ២៣ ០០០, កុំព្យូទ័រយួរដៃចំនួន ១៧ គ្រឿង, សម្ភារសិក្សាផ្នែកអំណាន និងគណិតវិទ្យាចំនួន ១១៩, ហិបនិងថេប្ល៊ិត (Tablet) ដែលដំឡើងកម្មវិធីអំណានខ្មែរចំនួន ២៩៤ គ្រឿង។
គម្រោងក៏បានបណ្តុះបណ្តាលជំនាញដឹកនាំ និងគ្រប់គ្រងសាលារៀនដល់គណៈកម្មការគ្រប់គ្រងសាលារៀន និងវិធីសាស្ត្របង្រៀនដល់លោកគ្រូអ្នកគ្រូដោយសហការយ៉ាងស្អិតល្មួតជាមួយមន្ទីរអប់រំខេត្ត សាលាគរុកោសល្យនិងវិក្រឹតការខេត្តនិងការិយាល័យអប់រំស្រុក ដើម្បីពង្រឹងគុណភាពអំណានថ្នាក់ដំបូងរបស់កុមារនិងជួយចូលរួមសម្រេចនូវផែនការយុទ្ធសាស្ត្ររបស់ក្រសួងអប់រំ យុវជន និងកីឡា (២០១៩-២០២៣)។
លោក វ៉ា ថន អភិបាលខេត្តក្រចេះបានថ្លែងក្នុងពិធីសម្ពោធដាក់ឱ្យប្រើប្រាស់ និងប្រគល់អគារនេះថា អគារសិក្សាថ្មីនេះជាសមិទ្ធផលថ្មីសន្លាង ១ ទៀត ដែលបានបង្ហាញពីកិច្ចខិតខំប្រឹងប្រែងរបស់អាជ្ញាធរពាក់ព័ន្ធ និងដៃគូអភិវឌ្ឍន៍ក្នុងការកែលម្អប្រព័ន្ធអប់រំនៅកម្ពុជា។
លោកថ្លែងថា៖ «សាលាកុមារមេត្រីពុំអាចសម្រេចលទ្ធផលល្អប្រសើរបានឡើយ ប្រសិនបើគ្មានការជួយគាំទ្រផ្នែកធនធានពីដៃគូអភិវឌ្ឍន៍ដូចជា កយកា (KOICA) និងអង្គការឆាលហ្វាន់ហើយជាភ័ព្វសំណាងសម្រាប់កុមារជនបទដូចជានៅស្រុកឆ្លូងនេះដែរ ដែលមានឱកាសបានរៀនសូត្រក្នុងអគារសិក្សាថ្មីដែលបំពាក់ដោយសម្ភារទំនើបជាច្រើន»។
លោក ប្រាស្សាន វើម៉ា នាយកប្រចាំប្រទេសនៃអង្គការឆាលហ្វាន់កម្ពុជាថ្លែងក្នុងពិធីនេះដែរថា គម្រោងនេះត្រូវបានបង្កើតឡើង ដើម្បីធានាថា កុមារក្នុងតំបន់ដាច់ស្រយាលអាចទទួលបាននូវការអប់រំប្រកបដោយគុណភាពដូចកុមារនៅតាមទីក្រុងដែរ។
លោកថ្លែងថា៖ «គម្រោងនេះធ្វើការគាំទ្រដល់រាជរដ្ឋាភិបាលក្នុងការកែទម្រង់ប្រព័ន្ធអប់រំជាពិសេសពង្រឹងប្រសិទ្ធភាពនៃការអនុវត្តគោលនយោបាយសាលាកុមារមេត្រី»។
សេចក្តីប្រកាសព័ត៌មានអង្គការឆាលហ្វាន់បញ្ជាក់ថា គម្រោងនេះបានផ្តួចផ្តើមវិធីសាស្ត្រ និងបច្ចេកវិទ្យាទំនើបរួមទាំងការជួយកុមារឱ្យរៀនបានប្រសើរតាមរយៈសិស្សធំជួយបង្រៀនសិស្សតូចការប្រើប្រាស់បច្ចេកវិទ្យាព័ត៌មានក្នុងការបង្រៀននិងរៀនការប្រើប្រាស់ថេប្ល៊ិត (Tablet) ដើម្បីតាមដាន និងវាយតម្លៃលទ្ធផលសិក្សារបស់សិស្ស និងការប្រើប្រាស់កម្មវិធីលើថេប្ល៊ិតដើម្បីទាក់ទាញកុមារឱ្យសិក្សាជាដើម។
លោក រ៉ូ យុនជុន នាយកប្រចាំប្រទេសនៃទីភ្នាក់ងារសហប្រតិបត្តិការអន្តរជាតិកូរ៉េ(កយកា)បានថ្លែងថា (កយកា) មានមោទនភាពក្នុងការសហការជាមួយអង្គការឆាលហ្វាន់ និងអង្គការកាហ្វដុកសម្រាប់គម្រោងកែលម្អវិស័យអប់រំនេះ។
លោកថ្លែងថា៖ «យើងសប្បាយចិត្តដែលបានឃើញភាគីពាក់ព័ន្ធទាំងអស់ដែលបានខិតខំប្រឹងប្រែងចូលរួមពង្រឹងគុណភាពអប់រំទោះនៅក្នុងកាលៈទេសៈដ៏លំបាកនៃជំងឺរាតត្បាតជាសកលក៏ដោយ។ ខ្ញុំសង្ឃឹមថា អគារសិក្សាថ្មីនេះ នឹងក្លាយជាកន្លែងដែលកុមារអាចសម្រេចបាននូវសុបិនក្នុងការអភិវឌ្ឍពិភពលោកនាថ្ងៃអនាគត»៕