មណ្ឌលគិរី៖ សាលាដំបូងខេត្តមណ្ឌលគិរី នៅថ្ងៃ ២៦ មិថុនា បានសម្រេចចោទប្រកាន់ និងឃុំខ្លួនមន្រ្ដីយោធា និងមន្រ្ដីនគរបាលចំនួន៩នាក់ពាក់ព័ន្ធបទល្មើសព្រៃឈើ និងករណីឃុបឃិតជាមួយជនជាតិវៀតណាមនាំឈើចេញខុសច្បាប់នៅតំបន់អូរហ៊ុចស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា។ នេះបើតាមមន្រ្ដីនាំពាក្យសាលាដំបូងខេត្តមណ្ឌលគិរី។
លោក ស៊ាវ ងីឈាន់ ព្រះរាជអាជ្ញារង និងជាអ្នកនាំពាក្យសាលាដំបូងខេត្តមណ្ឌលគិរីប្រាប់ ភ្នំពេញ ប៉ុស្ដិ៍ នៅថ្ងៃទី ២៧ មិថុនានេះថា សំណុំរឿងមន្រ្ដីយោធានិងមន្រ្ដីនគរបាលចំនួន៩នាក់ត្រូវបានចោទប្រកាន់តាមច្បាប់ស្ដីពីកិច្ចការពារបរិស្ថាននិងការគ្រប់គ្រងធនធានធម្មជាតិមាត្រា ៥៩ ច្បាប់ស្ដីពីព្រៃឈើ មាត្រា ១០០ និង៩៨ និងក្រមព្រហ្មទណ្ឌនៃព្រះរាជាណាចក្រកម្ពុជាមាត្រា ៥៨៦។
លោកបានថ្លែងថា៖ «ក្នុងចំណោមជនសង្ស័យចំនួន ១២ នាក់ ក្នុងនោះយើងបានបញ្ជូនជនត្រូវចោទចំនួន៩នាក់ដែលជាមន្រ្ដីយោធា និងមន្រ្ដីនគរបាលការពារព្រំដែនគោកអូរហ៊ុចចំនួន ៩ នាក់ ទៅឃុំខ្លួនហើយកាលពីថ្ងៃទី ២៦ ខែមិថុនានេះ។ ចំណែកជនសង្ស័យ ៣ នាក់ផ្សេងទៀត ក្នុងនោះជនជាតិខ្មែរ១នាក់ និងជនជាតិវៀតណាម ២ នាក់បានរត់គេចខ្លួន»។
យោងតាមរបាយការណ៍របស់មន្ទីរបរិស្ថានខេត្តមណ្ឌលគិរី មនុស្សទាំង៩នាក់ ដែលមន្ត្រីជំនាញបានកសាងសំណុំរឿងបញ្ជូនទៅតុលាការក្នុងបទល្មើសព្រៃឈើនៅចំណុចអូរហ៊ុច ហើយត្រូវបានតុលាការចោទប្រកាន់ និងឃុំខ្លួននេះ រួមមាន ទី១- ឈ្មោះ អ៊ុក ណាខៃ ជាមេបញ្ជាការ គ២ នៃវរសេនាតូចលេខ ២។ ទី២- ឈ្មោះឡឹក ញែក បញ្ជាការរងទទួលខ ២ ខ៣។ ទី៣- ឈ្មោះ វ៉ាន់ ចន្ធារី មេបញ្ជាការខ ២ ប្រចាំការនៅចំណុចអូរហ៊ុច។ ទី៤- ឈ្មោះលាង ភារ័ត្ន នាយប៉ុស្តិ៍នគរបាលការពារព្រំដែនគោកអូរហ៊ុច។ ទី៥- ឈ្មោះ ព្រុំ វណ្ណៈ នាយរងប៉ុស្តិ៍នគរបាលការពារព្រំដែនគោកអូរហ៊ុច។ ទី៦- ឈ្មោះ ផាត សុខឡេង នាយរងប៉ុស្តិ៍នគរបាលការពារព្រំដែនគោកអូរហ៊ុច។ ទី៧- ឈ្មោះ អ៊ាង ចាន់ឌី មន្ត្រីទទួលបន្ទុកការងារវិស្វកម្មស្ថាបនាផ្លូវក្រវាត់ព្រំដែន។ ទី៨- ឈ្មោះ ឌួង ចាន់វីរៈ ជាមន្ត្រីយោធា និងទី៩- ឈ្មោះ ផន សុផល ជាមន្ត្រីយោធា។
លោក ស៊ាវ ងីឈាន់ ឱ្យដឹងថា ចៅក្រមស៊ើបសួរ សម្រេចចោទប្រកាន់ជនសង្ស័យជាមន្រ្ដីយោធា និងមន្រ្ដីនគរបាលទាំង៩នាក់ ពីបទរួមគំនិតក្នុងអំពើនាំចេញផលអនុផលព្រៃឈើដែលគ្មានអាជ្ញាប័ណ្ណ។ ធ្វើសកម្មភាពទាំងឡាយណាដើម្បីធ្វើអន្តរាគមន៍ផ្តល់ការអនុញ្ញាតដោយផ្ទាល់និងដោយប្រយោលជួយដល់អាជីវកម្មព្រៃឈើ។ ជួយសម្រួលក្នុងការចូលមកក្នុងព្រះរាជាណាចក្រកម្ពុជាដោយលួចលាក់។ ជនសង្ស័យទាំង៩ខាងលើត្រូវបានតំណាងអយ្យការស្នើសុំឃុំខ្លួនហើយ។ចំណែកជនសង្ស័យឈ្មោះម៉ែន ធឹម ជាអ្នកបើកបររថយន្តរបស់បញ្ជាការវិស្វកម្មមិនចូលខ្លួនមកបំភ្លឺ ដោយចោទប្រកាន់ពីបទចាត់វិធានការសំដៅរារាំងការអនុវត្តច្បាប់។
រីឯជនសង្ស័យជនជាតិវៀតណាមចំនួន ២ នាក់ទៀត ឈ្មោះប៉ិក ឈ្មោះជី និងបក្ខពួក ដែលបានរត់គេចខ្លួន ត្រូវបានចោទពីបទកាប់ប្រមូល ដឹកជញ្ជូន ធនធានធម្មជាតិ និងនាំចេញផលអនុផលព្រៃឈើ ដែលគ្មានអាជ្ញាប័ណ្ណចូលមកក្នុងព្រះរាជាណាចក្រកម្ពុជាដោយលួចលាក់។
លោក កែវ សុភគ៌ ប្រធានមន្ទីរបរិស្ថានខេត្ដមណ្ឌលគិរីឱ្យដឹងថា មុនឈានដល់ការបង្ក្រាបបាននូវបទល្មើសធនធានធម្មជាតិមួយនេះ រហូតឈានដល់ការឃាត់ខ្លួនអ្នកពាក់ព័ន្ធបន្តបន្ទាប់ គឺមន្ត្រីឧទ្យានុរក្សបានល្បាតប្រទះឃើញនូវគំនរឈើជាច្រើននៅចំណុចអូរហ៊ុច នៅភូមិអូរអាម ឃុំស្រែខ្ទុម ស្រុកកែវសីមា។ បន្ទាប់មកនៅថ្ងៃទី ១៩ មិថុនា ២០២១ ក្រុមការងារចម្រុះថ្នាក់ខេត្ត ថ្នាក់ស្រុក និងកម្លាំងការិយាល័យដែនជម្រកសត្វព្រៃកែវសីមា ដឹកនាំដោយព្រះរាជអាជ្ញារង សាលាដំបូងខេត្តបានចុះទៅបង្ក្រាបដល់ទីតាំងផ្ទាល់។
លោកបន្តថា ពេលកំពុងធ្វើដំណើរចុះប្រតិបត្តិការមកដល់ចំណុចជិតស្ពានអូរហ៊ុច មានអេស្កាវាទ័រចំនួន ២ គ្រឿង និងរថយន្តបែនដឹកដីចំនួន ១ គ្រឿង របស់កងវិស្វកម្មបានចតតម្រៀបសងខាងផ្លូវ ធ្វើឱ្យរាំងស្ទះដល់ការអនុវត្ដច្បាប់របស់កងកម្លាំងចម្រុះ។
លោក សុភគ៌ ថ្លែងថា៖ «នៅក្នុងប្រតិបត្តិការបង្ក្រាបបទល្មើសព្រៃឈើនៅចំណុចអូរហ៊ុចនេះ ក្រុមការងារបានពិនិត្យ និងប្រទះឃើញមានស្នាមដានត្រាក់ទ័រអូសដឹកឈើឆ្លងកាត់ព្រំដែនចូលទៅប្រទេសវៀតណាម និងប្រមូលបានវត្ថុតាងជាច្រើនដូចជា គំនរឈើមូល និងឈើអារប្រភេទលេខ ១ (ស្រឡៅ និងសុក្រម) ចំនួន ២៥២ កំណាត់។ ត្រាក់ទ័រចំនួន ២ គ្រឿង ម៉ូតូចំនួន ២ គ្រឿង រណាយន្ត១គ្រឿង និងជំរំអារឈើចំនួន ៦ កន្លែង។ ពុំជួបជនសង្ស័យ ហើយក្រុមការងារបានធ្វើការរុះរើបំផ្លាញចោល»។
បើតាមលោក សុភគ៌ តាមការពិនិត្យអង្កេតស្ថានភាពភូមិសាស្ត្រទីតាំងកើតហេតុ និងកន្លែងអូសដឹកឈើឆ្លងអូរចូលប្រទេសវៀតណាម គឺមានចម្ងាយត្រឹមតែ ៦០០ ម៉ែត្រ ទៅ ៨០០ ម៉ែត្រប៉ុណ្ណោះ ពីប៉ុស្តិ៍នគរបាល និងប៉ុស្តិ៍យោធាការពារព្រំដែនគោកអូរហ៊ុច៕