.jpg)
កុមារ នៅក្នុងមណ្ឌលថែទាំងរបស់អង្គការ Improvement នៅក្នុងសង្កាត់ស្ទឹងមានជ័យ ខណ្ឌមានជ័យកាលពីឆ្នាំ ២០១៦។ ហុង មិនា
ភ្នំពេញៈ ក្រសួងសង្គមកិច្ច បានប្រកាសដាក់ឲ្យប្រើប្រាស់នូវប្រព័ន្ធគ្រប់គ្រងព័ត៌មានកិច្ចការពារកុមារនៅកម្ពុជា (CPIMS) ខណៈមានការរកឃើញថា ចំនួនកុមារកំពុងរស់នៅក្នុងមណ្ឌលថែទាំ បានថយចុះ ៥៩ ភាគរយ បើធៀបនឹង ៥ ឆ្នាំមុន។
ប្រព័ន្ធ CPIMS ត្រូវបានបង្កើតឡើងក្រោមការគាំទ្រពីអង្គការយូនីសេហ្វ (UNICEF) ទីភ្នាក់ជំនួយអាមេរិក USAID សហភាពអឺរ៉ុប និងអង្គការដៃគូដទៃទៀត ដែលមានសូចនាករចំនួន ៥០ នៃវិស័យស្នូលចំនួន ៥ ដែលពាក់ព័ន្ធនឹងកិច្ចការពារកុមារ ស្ថិតក្រោមដែនសមត្ថកិច្ចក្រសួង ស្ថាប័នចំនួន ១៤ និងអង្គការដៃគូចំនួន ២។
ប្រព័ន្ធព័ត៌មាននេះនឹងអនុញ្ញាតឲ្យក្រសួងស្ថាប័នអង្ភភាពផ្តល់សេវាទីភ្នាក់ងារអភិវឌ្ឍន៍ អង្គការមិនមែនរដ្ឋាភិបាល អ្នកស្វែងរកព័ត៌មាន និងសាធារណៈជនអាចទាញយកព័ត៌មាន និងទិន្នន័យស្តីពីវឌ្ឍនភាព នៃការផ្តល់សេវាការពារកុមារទៅប្រើប្រាស់ក្នុងការរៀបចំគោលនយោបាយ ផែនការសកម្មភាពរបាយការណ៍វាយតម្លៃ ដើម្បីគំាទ្រនិងគាំពារកុមារ។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា ប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែមិថុនាថា ការរៀបចំប្រព័ន្ធនេះឡើង គឺដោយសារកន្លងមកមានក្រសួង ស្ថាប័នផ្សេងៗគ្នាជាច្រើន អនុវត្តកិច្ចការពារកុមារ ដូចជាក្រសួងអប់រំ ក្រសួងសុខាភិបាល និងក្រសួងកិច្ចការនារីជាដើម ហើយទិន្នន័យពាក់ព័ន្ធកិច្ចការពារកុមារនេះ មិនផ្តុំគ្នានៅមួយកន្លែងនោះទេ គឺវាស្ថិតនៅតាមក្រសួងផ្សេងៗ។
លោកថ្លែង៖ «ហេតុផលទាំងអស់ហ្នឹង ដែលធ្វើឱ្យខ្ញុំមានគំនិតផ្តួចផ្តើម គឺចង់ចងប្រព័ន្ធទិន្នន័យមួយឱ្យនៅក្រោមការគ្រប់គ្រងរបស់ក្រសួងសង្គមកិច្ច ទោះជាផ្នែកណាក៏ដោយ ឱ្យតែពាក់ព័ន្ធកិច្ចការពារកុមារ គឺនៅក្នុងប្រព័ន្ធរួចហើយ ដោយមានការគាំទ្រពីដៃគូ។ នេះជាហេតុផលដែលយើងធ្វើអាហ្នឹង»។
លោក តូច ចាន់នី បន្តថា៖ «អីចឹង យើងគ្រប់គ្រងបាន។ អ៊ីចឹងប្រព័ន្ធទិន្នន័យនេះចេញពីទីណាមកគឺក្នុងទីតាំងរបស់យើងដែរ។ អ៊ីចឹងចេញពីច្រកណាក៏ត្រូវចូលទីតាំងហ្នឹងដែរ។គ្រប់ក្រសួងទាំងអស់គាត់មានទិន្នន័យគាត់ត្រូវផ្ញើចូលទៅក្នុងប្រព័ន្ធហ្នឹង។ អ៊ីចឹងក្រសួងសង្គមកិច្ចជាអ្នកកាន់សង់ត្រាល់ (Central) ហ្នឹង។ អ៊ីចឹងពាក់ព័ន្ធកិច្ចការពារកុមារកន្លែងណាក៏យើងដឹងដែរ»។
សេចក្តីប្រកាសព័ត៌មានរួមរវាងក្រសួងសង្គមកិច្ចនិងអង្គការយូនីសេហ្វកាលពីថ្ងៃទី ២៥ ខែមិថុនា បញ្ជាក់ថា ប្រព័ន្ធ CPIMS វាស់វែងវឌ្ឍភាព នៃការការពារកុមារ និងត្រូវបានរៀបចំទិន្នន័យជាទម្រង់ឌីជីថល ដែលផ្តល់ភាពងាយស្រួល ក្នុងការចូលស្វែងរកទិន្នន័យតាមតម្រូវការ។
សេចក្តីប្រកាសព័ត៌មាន បញ្ជាក់ថា សូចនាករទាំង ៥០ ត្រូវបានប្រើប្រាស់ សម្រាប់ការតាមដាន និងវាយតម្លៃវឌ្ឍនភាព នៃកិច្ចការពារកុមារ។ ប្រព័ន្ធថ្មីនេះជួយបំពេញចំណុចខ្វះខាតដែលជាធាតុចូលដ៏មានសារសំខាន់ និងចាំបាច់សម្រាប់ការអភិវឌ្ឍប្រព័ន្ធការពារកុមារដែលប្រកបដោយប្រសិទ្ធភាព។
សេចក្តីប្រកាសរួមបានឱ្យដឹងថា ក្រសួងសង្គមកិច្ច មានសេចក្តីសោមនស្សរីករាយ ដែលបានប្រកាសដាក់ឲ្យដំណើរការ ផ្ទាំងព័ត៌មាននៃប្រព័ន្ធ CPIMS នេះនិងសូមថ្លែងអំណរគុណ ដល់ក្រសួងស្ថាប័នដែលបានសហការរៀបចំនូវឧបករណ៍ដ៏មានអត្ថប្រយោជន៍នេះ ដើម្បីផ្តល់សេវាឱ្យកាន់តែប្រសើរឡើង និងសូមថ្លែងអំណរគុណ ដល់អង្គការយូនីសេហ្វ ដែលបានផ្តល់ជំនួយបច្ចេកទេស USAID និងសហភាពអឺរ៉ុប ដែលបានគាំទ្រផ្នែកហិរញ្ញវត្ថុ ក្នុងការរៀបចំប្រព័ន្ធការពារកុមារក្នុងទម្រង់ជាឌីជីថលដែលធ្វើឱ្យប្រព័ន្ធនេះកាន់តែមានភាពល្អប្រសើរមួយកម្រិតទៀត។
នៅថ្ងៃដដែលនេះផងដែរ ក្រសួងក៏បានប្រកាសផ្សព្វផ្សាយពីរបាយការណ៍ស្តី ពីផែនការសកម្មភាពរយៈពេល៥ឆ្នាំ សម្រាប់លើកកម្ពស់សេវាថែទាំកុមារ ដោយបានដាក់ចេញនូវគោលនូវដៅដើម្បីឱ្យកុមារដែលកំពុងរស់នៅក្នុងមណ្ឌលថែទាំយ៉ាងហោចណាស់ ៣០ ភាគរយ បានវិលត្រឡប់ទៅរកគ្រួសាររបស់ពួកគេវិញប្រកបដោយសុវត្ថិភាព។
ក្រសួងសង្គមកិច្ច សហការជាមួយអង្គការយូនីសេហ្វ USAID និងសហភាពអឺរ៉ុប កាលពីឆ្នាំ ២០១៦ បានប្រកាសដាក់ឲ្យអនុវត្តផែនការសកម្មភាពនេះដោយរៀបចំផែនការសកម្មភាព ដើម្បីធ្វើសមាហរណកម្ម កុមារពីមណ្ឌលថែទាំទៅកាន់ការថែទាំតាមគ្រួសារ ផ្តល់ការគាំទ្រដល់ការថែរក្សាគ្រួសារ ឱ្យរស់នៅជុំគ្នានិងជំរុញឲ្យមានការប្រើប្រាស់ជម្រើសថែទាំផ្សេងៗទៀតក្រៅពីយកកុមារ ទៅដាក់នៅតាមមណ្ឌលថែទាំ។
សេចក្តីប្រកាសព័ត៌មានរួមបញ្ជាក់ថា៖ «ជាលទ្ធផលនៃការអនុវត្តផែនការ បានរកឃើញថា ចាប់តាំងពីពេលដែលផែនការត្រូវបានប្រកាសដាក់ឱ្យអនុវត្ត មណ្ឌលថែទំាកុមារ បានថយចុះ ៤៣ ភាគរយ និងមានកុមាររស់នៅក្នុងមណ្ឌលថែទាំតិចជាងមុន ៥៩ ភាគរយ។
លោកស្រី ហ្វ័រូហ្គហ្វយូហ្សិថ នាយិកាយូនីសេហ្វ ប្រចាំកម្ពុជា បានថ្លែងក្នុងសេចក្តីប្រកាសព័ត៌មាននេះថា ព័ត៌មាននៃប្រព័ន្ធ CIPMS នេះគឺជាឧបករណ៍ដ៏មានអត្ថប្រយោជន៍ សម្រាប់រៀបចំនិងធ្វើឲ្យប្រសើរទ្បើងនូវគោលនយោបាយនិងសេវានានា។
លោកស្រីថ្លែងថា៖ «វឌ្ឍនភាព ដែលសម្រេចបាននេះ នាំមកនូវភាពសប្បាយរីករាយ ឥតឧបមា ព្រោះការចិញ្ចឹមបីបាច់ និងការថែទាំដែលមានកិច្ចការពារពីគ្រួសារមានសារៈសំខាន់យ៉ាងខ្លំាងចំពោះសុខមាលភាពកុមារ»។
លោកស្រី ហ្វ័រូហ្គហ្វយូហ្សិថ បន្តថា៖ «ប៉ុន្តែយើងក៏នៅមានការងារជាច្រើនទៀតដែលត្រូវធ្វើ ដើម្បីធានាឲ្យមានការអនុវត្តឱ្យបានពេញលេញ នូវគោលនយោបាយ ដែលផ្តោតលើគ្រួសារ និងការផ្តល់សេវាគាំទ្រដល់គ្រួសារ ដើម្បីផ្តល់លទ្ធភាពឲ្យមាតាបិតាអាចផ្តល់ការថែទាំនិងការពារដល់កូនៗរបស់ពួកគេ»៕
