.jpg)
លោកទៀ បាញ់ ជួបជាមួយរដ្ឋមន្ត្រីជប៉ុនលោកKISHI Nobuo តាមវីដេអូ។រូប Tea banh's fb
ភ្នំពេញៈ ក្នុងជំនួបរវាងប្រមុខការពារជាតិកម្ពុជាលោក ទៀ បាញ់ ជាមួយលោក KISHI Nobuo រដ្ឋមន្ត្រីក្រសួងការពារប្រទេសជប៉ុនតាមវីដេអូអនឡាញ នៅថ្ងៃទី ២៥ មិថុនា ភាគីជប៉ុនសន្យាពង្រីកកិច្ចសហប្រតិបត្តិការទ្វេភាគី តាមរយៈការផ្លាស់ប្តូរព័ត៌មានទៅវិញទៅមក ការប្រយុទ្ធប្រឆាំងអំពើភេរវកម្ម ការបណ្តុះបណ្តាលធនធានមនុស្ស វិស័យរក្សា សន្តិភាព ការគ្រប់គ្រងគ្រោះមហន្តរាយ និងការងារវិស្វកម្មជាដើម។
តាមរបាយការណ៍លទ្ធផលនៃជំនួបពិភាក្សារវាងឧបនាយករដ្ឋមន្ត្រី និងជារដ្ឋមន្ដ្រីក្រសួងការពារជាតិ លោក ទៀ បាញ់ និងលោក KISHI Nobuo ភាគីទាំង ២ បានចាត់ទុកកិច្ចពិភាក្សានាថ្ងៃនោះពិតជាមានសារៈសំខាន់ក្នុងការពង្រឹងទំនាក់ទំនងមិត្តភាព និងកិច្ចសហប្រតិបត្តិការទ្វេភាគីរវាងក្រសួងការពារប្រទេសកម្ពុជា-ជប៉ុន។
តាមរយៈកិច្ចពិភាក្សានេះបានលើកកម្ពស់សមត្ថភាព វិស័យការពារជាតិ សន្តិសុខ នយោបាយ រួមទាំងផ្នែកមនុស្សធម៌ តាមរយៈការបណ្តុះបណ្តាល ធនធានមនុស្ស ឱ្យមានសមត្ថភាពពុទ្ធិ រួមចំណែកកសាងចំណងមិត្តភាពកងទ័ពប្រទេសទាំង ២ ឱ្យកាន់តែជិតស្និទ្ធ ស៊ីជម្រៅ និងវិបុលភាព។
របាយការណ៍ឱ្យដឹងថា ភាគីទាំង ២ បានប្តេជ្ញាបន្តអភិវឌ្ឍកិច្ចសហប្រតិបត្តិការទ្វេភាគីលើវិស័យការពារជាតិឱ្យកាន់តែប្រសើរឡើងថែមទៀត រួមមានជំនួយ សម្រាប់កសាងសមត្ថភាព ការផ្លាស់ប្តូរផ្នែកអប់រំ ទស្សនកិច្ចថ្នាក់ដឹកនាំ និងការផ្លាស់ប្តូរទស្សនកិច្ចតាមអនុស្សរណៈដែលបានចុះហត្ថលេខាកាលពីឆ្នាំ ២០១៣។
របាយការណ៍ដដែលបញ្ជាក់ថា៖ «ភាគីជប៉ុនបានសន្យាជំរុញពង្រីកកិច្ចសហប្រតិបត្តិការទ្វេភាគីរវាងកងទ័ពជើងគោកកម្ពុជា និងកងស្វ័យការពារជើងគោកជប៉ុនក្នុងលក្ខណៈនៃការផ្លាស់ប្តូរព័ត៌មានទៅវិញទៅមក ការប្រយុទ្ធប្រឆាំងអំពើភេរវកម្ម ការបណ្តុះបណ្តាលធនធានមនុស្សវិស័យរក្សា សន្តិភាព ការគ្រប់គ្រងគ្រោះមហន្តរាយ និងការងារវិស្វកម្ម»។
លោក KISHI Nobuo តាមរយៈ កិច្ចពិភាក្សានេះបានថ្លែងអំណរគុណចំពោះកម្ពុជា ដែលបានទទួលបដិសណ្ឋារកិច្ចដំណើរទស្សនកិច្ចរបស់លោកអនុរដ្ឋមន្ត្រី នីហ្សីដា និងលោក YUASA Goro មេបញ្ជាការកងស្វ័យការពារជើងគោកជប៉ុននៅកម្ពុជា និងការជួបសន្ទនាតាមទូរស័ព្ទរវាងមេបញ្ជាការកងស្វ័យការពារជើងគោកជប៉ុន និងលោក ហ៊ុន ម៉ាណែត មេបញ្ជាការកងទ័ពជើងគោកកម្ពុជាប្រកបដោយជោគជ័យនាំមកនូវការផ្លាស់ប្តូរទំនាក់ទំនងមន្ត្រីយោធាជាន់ខ្ពស់រវាងប្រទេសទាំង ២ នាពេលកន្លងមក។
លោកថ្លែងថា៖ «យើងមានការសោកស្ដាយយ៉ាងខ្លាំង ដែលដំណើរទស្សនកិច្ចផ្លូវការរបស់ឯកឧត្ដមឧត្តមសេនីយ៍ឯក ហ៊ុន ម៉ាណែត ទៅកាន់ប្រទេសជប៉ុនត្រូវបានលើកពេល ដោយសារការរីករាលដាលជំងឺកូវីដ ១៩»។
តាមរយៈជំនួបពិភាក្សានេះលោក ទៀ បាញ់ បានស្នើលោក KISHI Nobuo ជួយពិនិត្យលទ្ធភាពផ្តល់អាហារូបករណ៍ដល់សិក្ខាកាមកម្ពុជាទៅសិក្សានៅប្រទេសជប៉ុន។ លោកក៏បានស្នើជប៉ុនបន្តផ្តល់ជំនួយសម្ភារមធ្យោបាយរួមទាំងផ្នែកសន្តិសុខលម្ហសមុទ្រ និងជំរុញកិច្ចសហប្រតិបត្តិការលើគ្រប់វិស័យ ដូចជាការផ្លាស់ប្តូរទស្សនកិច្ចថ្នាក់ដឹកនាំការពារប្រទេសចូលចតនាវាចែករំលែកព័ត៌មានបទពិសោធនានា ផ្តល់ជំនួយឧបករណ៍សម្ភារបម្រើឱ្យវិស័យរក្សាសន្តិភាព និងគ្រោះមហន្តរាយជាដើម ក្រោយអំឡុងពេលវិបត្តិជំងឺកូវីដ ១៩ មានភាពធូរស្រាល។
លោក ទៀ បាញ់ ប្រាប់លោក KISHI Nobuo ថា ឆ្នាំ ២០២១ នេះ គឺជាខួប ១៥ ឆ្នាំ ដែលកម្ពុជាបញ្ជូនកងកម្លាំងរក្សាសន្តិភាពទៅកាន់បេសកកម្មថែរក្សាសន្តិភាពរបស់អង្គការសហប្រជាជាតិនៅតំបន់អាហ្វ្រិកមជ្ឈិមបូព៌ា និងអឺរ៉ុប ដើម្បីបុព្វហេតុសន្តិភាព សន្តិសុខ និងមនុស្សធម៌នៅលើលោក។
លោកថ្លែងថា៖ «កម្ពុជាប្តេជ្ញាចិត្ត បញ្ជូនកងកម្លាំងរក្សាសន្តិភាពជាស្ត្រីឱ្យកើនជាងមុន រួមចំណែកលើកកម្ពស់តួនាទីស្ត្រី កសាង និងថែរក្សាសន្តិភាព សមភាពយេនឌ័រស្របតាមប្រធានបទស្តីពីបទពិសោធ និងគំនិតផ្តួចផ្តើមរបស់សមាជិករដ្ឋមន្ត្រីការពារជាតិ អាស៊ានបូកក្នុងការបញ្ជូនកងទ័ពជាស្ត្រីទៅបំពេញប្រតិបត្តិការរក្សាសន្តិភាពរបស់អង្គការសហប្រជាជាតិ»។
ប្រមុខការពារជាតិកម្ពុជាសង្កត់ធ្ងន់ថា ចំពោះមុខការទប់ស្កាត់ការឆ្លងរីករាលដាល និងការគ្រប់គ្រងផលប៉ះពាល់ បណ្តាលមកពីជំងឺកូវីដ ១៩ គឺជាកិច្ចការចាំបាច់បំផុត ដែលកងទ័ពត្រូវចូលរួមតាំងពីដំបូងនៃដំណើរការស្តារសេដ្ឋកិច្ចឱ្យងើបឡើងវិញប្រកបដោយប្រសិទ្ធភាព។
លោកបន្តថា៖ «ដូចនេះទាមទារឱ្យកងទ័ពពង្រឹងសមត្ថភាពមានភាពធន់នឹងកិច្ចការពារជាតិ សន្តិសុខប្រពៃណី និងមិនប្រពៃណី ភាពគ្រោះអាសន្ន និងការប្រែប្រួលអាកាសធាតុ និងរួមគ្នាផ្លាស់ប្តូរចែករំលែកបទពិសោធព័ត៌មានទៅវិញទៅមកដោយឈរលើស្មារតីសាមគ្គីភាពជឿទុកចិត្ត គិតគូរ និងអនុវត្តរួមគ្នាមានភាពហ្មត់ចត់ ក្រោមយន្តការពហុភាគីនិយមគោរពច្បាប់អន្តរជាតិ និងអធិបតេយ្យភាពរបស់ប្រទេសនីមួយៗ»។
តាមរយៈលទ្ធផលនៃជំនួបនេះ ភាគីទាំង ២ បានវាយតម្លៃខ្ពស់ចំពោះកិច្ចសហប្រតិបត្តិការទ្វេភាគីរវាងកម្ពុជា-ជប៉ុន បើទោះបីប្រទេសកំពុងជួបគ្រោះមហន្តរាយធម្មជាតិ និងជំងឺផ្សេងៗបណ្តាលមកពីការរាតត្បាតនៃជំងឺកូវីដ ១៩ ក៏ពិតមែន។
ប៉ុន្តែប្រទេសទាំង ២ បានជម្នះឧបសគ្គអនុវត្តការងារចាំបាច់មួយចំនួន ដែលអាចធ្វើទៅបានដូចជា ដំណើរទស្សនកិច្ចរបស់លោកអនុរដ្ឋមន្ត្រីនីហ្សីដាកាលពីថ្ងៃទី ២២ ខែ កក្កដា ឆ្នាំ ២០១៩ ដំណើរទស្សនកិច្ចរបស់លោក YUASA Goro មេបញ្ជាការកងស្វ័យការពារជើងគោកជប៉ុននៅកម្ពុជាកាលពីថ្ងៃទី ២៧-៣០ ខែ កុម្ភៈ ឆ្នាំ ២០២០។
ការលើកកម្ពស់វិស័យរក្សាសន្តិភាព ការចូលរួមក្នុងវេទិកានានាបានឆ្លុះបញ្ចាំងពីចំណងមិត្តភាព សាមគ្គីភាព កិច្ចសហប្រតិបត្តិការកងទ័ពប្រទេសទាំង ២ កាន់តែមានភាពជិតស្និទ្ធ ស៊ីជម្រៅ និងពេញលេញប្រសើរជាងមុន៕
