ឧត្តរមានជ័យៈ លោក ហ៊ុន ម៉ានិត ប្រធានអនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក ដឹកនាំក្រុមការងារ ចុះត្រួតពិនិត្យខេត្តជាប់ព្រំដែនកម្ពុជា ថៃ ដើម្បីពិនិត្យមើលការគ្រប់គ្រង និងការយកសំណាកពលករខ្មែរ ដើម្បីប្រយុទ្ធទប់ស្កាត់នឹងជំងឺកូវីដ ១៩។
ការចុះត្រួតពិនិត្យនេះ ធ្វើឡើងស្របពេលរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ណែនាំឱ្យអភិបាលរាជធានី-ខេត្ត ទាំងអស់ពង្រឹងវិធានការចត្តាឡីស័កនៅតាមបណ្តាច្រកព្រំដែននានា និងពង្រឹងវិធានការរដ្ឋបាលចាំបាច់នានា ដើម្បីប្រយុទ្ធទប់ស្កាត់ការរីករាលដាលជំងឺកូវីដ ១៩ បំប្លែងខ្លួនថ្មីប្រភេទ Delta ចូលក្នុងសហគមន៍។
កាលពីរសៀលថ្ងៃទី ២៦ ខែមិថុនា លោក ហ៊ុន ម៉ានិត អគ្គនាយកស្រាវជ្រាវចារកិច្ចក្រសួងការពារជាតិ និងជាប្រធានអនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័កបានដឹកនាំក្រុមការងារចុះត្រួតពិនិត្យច្រកទ្វារព្រំដែនអន្តរជាតិអូរស្មាច់។ នេះបើតាមមន្ទីរព័ត៌មានខេត្តឧត្តរមានជ័យ។
បន្ទាប់ពីចុះត្រួតពិនិត្យខេត្តឧត្តរមានជ័យ នៅថ្ងៃទី ២៧ ខែ មិថុនា ឆ្នាំ ២០២១ លោក ហ៊ុន ម៉ានិត បានដឹកនាំក្រុមការងារចុះត្រួតពិនិត្យបរិវេណច្រកព្រំដែនអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ការចុះត្រួតពិនិត្យនេះ គឺដើម្បីពិនិត្យមើលទីតាំងនៃការគ្រប់គ្រងការពិនិត្យយកសំណាកពលករខ្មែរដែលក្រុមការងារចម្រុះខេត្ត បាននិងកំពុងបំពេញការងារ ទប់ស្កាត់នឹងជំងឺកូវីដ ១៩។ នេះបើតាមទំព័រហ្វេសប៊ុករដ្ឋបាលខេត្តបន្ទាយមានជ័យចុះផ្សាយនៅថ្ងៃទី ២៧ ខែមិថុនា។
រដ្ឋបាលខេត្តនេះបញ្ជាក់ថា៖ «ក្រោយការចុះត្រួតពិនិត្យ លោក (ហ៊ុន ម៉ានិត) បានបន្តកិច្ចប្រជុំពិភាក្សាការងារជាមួយអាជ្ញាធរខេត្ត កងកម្លាំងប្រដាប់អាវុធជាគណៈកម្មការខេត្ត ប្រយុទ្ធនឹងជំងឺកូវីដ ១៩ ក្នុងគោលបំណងពិនិត្យលើស្ថានភាពជាក់ស្តែងនៃការគ្រប់គ្រងពលករ ដែលធ្វើចំណាកស្រុកពីប្រទេសថៃចូលមកកម្ពុជា...សំដៅធ្វើយ៉ាងណាទប់ស្កាត់ឱ្យខាងតែបាននូវការចម្លងជំងឺកូវីដ ១៩ ចូលក្នុងសហគមន៍»។
លោក អ៊ុំ រាត្រី អភិបាលខេត្តបន្ទាយមានជ័យថ្លែងថា លោក ម៉ានិត បានលើកជាអនុសាសន៍មួយចំនួនជូនរដ្ឋបាលខេត្ត ដើម្បីយកមករៀបចំជាគោលការណ៍អនុវត្តចំពោះមុខក្នុងនោះផ្តោតសំខាន់លើវិធានការត្រៀមទទួលពលករ-ខ្មែរដែលបានចូលមកកាន់តែច្រើនឡើង ជាពិសេសក្នុងការអនុវត្តគោលការណ៍ថ្មីដែលតម្រូវឱ្យធ្វើតេស្តរហ័សលើគ្រប់ពលករដែលបានឆ្លងដែនចូលមក និងការធ្វើចត្តាឡីស័កនៅនឹងកន្លែង។
លោកបញ្ជាក់ថា៖ «ដោយក្នុងនោះលោក ហ៊ុន ម៉ានិត ក៏បានស្នើឱ្យរដ្ឋបាលខេត្តរៀបចំផែនការសកម្មភាព និងរៀបចំទីតាំងមណ្ឌលចត្តាឡីស័ក ក៏ដូចជាលើកសំណើពាក់ព័ន្ធនឹងតម្រូវការសម្ភារ បរិក្ខារបច្ចេកទេសដាក់ជូនគណៈកម្មការ និងអនុគណៈកម្មការថ្នាក់ជាតិ ដើម្បីជាយន្តការគាំទ្រដល់រដ្ឋបាលខេត្ត»។
សូមជម្រាបជូនថា ក្រៅពីចុះត្រួតពិនិត្យខេត្តជាប់ព្រំដែនទាំង ២ នេះលោក ហ៊ុន ម៉ានិត ក៏បានដឹកនាំក្រុមការងារបន្តទៅខេត្តជាប់ព្រំដែនមួយទៀត គឺខេត្តបាត់ដំបងផងដែរ៕