.jpg)
គ្រូពេទ្យចាក់វ៉ាក់សាំងជូនប្រជាពលរដ្ឋក្នុងសង្កាត់ទន្លេបាសាក់ កាលពីថ្ងៃទី ១៦ មិថុនា។ ហេង ជីវ័ន
ភ្នំពេញៈ រដ្ឋបាលរាជធានីភ្នំពេញ បានរំឭកដល់ពលរដ្ឋរស់នៅរាជធានីភ្នំពេញដែលមានអាយុចាប់ពី ១៨ ឆ្នាំឡើងទៅ ហើយមិនទាន់បានចាក់វ៉ាក់សាំងបង្ការជំងឺកូវីដ ១៩ ត្រូវប្រញាប់រួសរាន់ទៅចាក់ចាប់ពីថ្ងៃទី ២៧ មិថុនាតទៅ ខណៈកាលបរិច្ឆេទនៃការចាក់ចុងក្រោយគ្រោងបិទបញ្ចប់នៅសប្ដាហ៍ទី១ ខែក្រោយ។
យោងតាមសេចក្ដីជូនដំណឹងរបស់រដ្ឋបាលរាជធានីកាលពីថ្ងៃទី ២៦ មិថុនា យុទ្ធនាការនៃការចាក់វ៉ាក់សាំងនៅរាជធានីភ្នំពេញ ដែលមានកិច្ចសហការពីក្រុមគ្រូពេទ្យនៃកងយោធពលខេមរភូមិន្ទក្រសួងការពារជាតិ ក្រុមគ្រូពេទ្យស្ម័គ្រចិត្តសម្ដេចតេជា (TYDA) ក្រុមគ្រូពេទ្យស្ម័គ្រចិត្តលោក ទៀ បាញ់ ក្រុមគ្រូពេទ្យស្ម័គ្រចិត្ត ស.ស.យ.ក. និងក្រុមគ្រូពេទ្យស្ម័គ្រចិត្តផ្សេងទៀតបានដំណើរការទៅយ៉ាងរលូន។
សេចក្ដីជូនដំណឹងនេះឱ្យដឹងថា មានពលរដ្ឋអាយុចាប់ពី ១៨ ឆ្នាំឡើងទៅបានចូលរួមចាក់វ៉ាក់សាំងយ៉ាងសស្រោកសស្រាំតាមគោលដៅនៃខណ្ឌនីមួយៗ ដែលគិតមកទល់ថ្ងៃទី ២៣ មិថុនា គឺមាន ពលរដ្ឋនៅរាជធានី ១ ៦៦២ ៣៥៦ នាក់ បានចាក់ដូសទី ១ និងចំនួន ១ ៤៩៨ ៧៨៧ នាក់បានចាក់ដូសទី២ រួចរាល់។
យ៉ាងណាក្ដី រដ្ឋបាលរាជធានីភ្នំពេញបញ្ជាក់ថា នៅមានពលរដ្ឋមួយចំនួនតូចមិនទាន់បានមកទទួលវ៉ាក់សាំងនៅឡើយ។ ដូច្នេះដើម្បីឱ្យដំណើរការចាក់វ៉ាក់សាំងបានជោគជ័យ ១០០ ភាគរយ សាលារាជធានីភ្នំពេញ «សូមអំពាវនាវដល់ប្រជាពលរដ្ឋដែលកំពុងរស់នៅ ស្នាក់នៅប្រកបអាជីវកម្មមុខរបរផ្សេងៗនៅក្នុងភូមិសាស្ត្ររាជធានីភ្នំពេញដែលពុំទាន់ទទួលបានការចាក់វ៉ាក់សាំងសូមអញ្ជើញ រួសរាន់មកចាក់វ៉ាក់សាំងចាប់ពីថ្ងៃទី ២៧ ខែមិថុនា ដល់ថ្ងៃទី ៨ ខែកក្កដា ឆ្នាំ ២០២១ កុំបីខាន»។
បើតាមរដ្ឋបាលរាជធានីភ្នំពេញ អ្នកមានអាយុពី ១៨ ឆ្នាំឡើង ដែលនៅមិនទាន់បានមកចាក់វ៉ាក់សាំងក្នុងខណ្ឌទាំង ១៤ គឺមានចំនួន ១៩ ៣៩៩ នាក់ ក្នុងនោះខណ្ឌកំបូលមាន ៩៨៧ នាក់ ខណ្ឌពោធិ៍សែនជ័យមាន ៤ ៩៨០ នាក់ ខណ្ឌទួលគោក មាន ១ ២៩៧ នាក់ ខណ្ឌ ៧ មករា មាន ៧៥៥ នាក់ ខណ្ឌដូនពេញ មាន ៥២១ នាក់ ខណ្ឌបឹងកេងកង មាន ៧០២ នាក់ ខណ្ឌចំការមន មាន ២២២ នាក់ ខណ្ឌដង្កោ មាន ១ ៨៨៧ នាក់ ខណ្ឌជ្រោយចង្វារ ២ ៥៩០ នាក់ ខណ្ឌឫស្សីកែវមាន ៣០០ នាក់ ខណ្ឌច្បារអំពៅ ១ ៨៧៣ នាក់ ខណ្ឌមានជ័យ មាន ០ នាក់[ ចាក់អស់] ខណ្ឌសែនសុខ មាន ១ ៧៦១ នាក់ និងខណ្ឌព្រែកព្នៅ ១ ៥២៤ នាក់។
ជាមួយនឹងការអំពាវនាវដល់ប្រជាពលរដ្ឋដែលមិនទាន់ទទួលបានការចាក់វ៉ាក់សាំងឱ្យប្រញាប់ទៅចាក់នោះ រដ្ឋបាលរាជធានីភ្នំពេញក៏បានក្រើនរំឭកផងដែរថា ក្នុងករណីដែលប្រជាពលរដ្ឋមានការខកខាន ក្រោយពីបិទបញ្ចប់នឹងមិនទទួលខុសត្រូវក្នុងការចាក់វ៉ាក់សាំងជូនទៀតឡើយ៕
