ភ្នំពេញៈ សមត្ថកិច្ចនគរបាលព្រហ្មទណ្ឌក្រសួងមហាផ្ទៃបានបញ្ជូនបុរសម្នាក់ទៅសាលាដំបូងរាជធានីភ្នំពេញកាលពីពេលរសៀលម្សិលមិញ បន្ទាប់ពីឃាត់ខ្លួនបាន ៣ ថ្ងៃពាក់ព័ន្ធករណីប្រើប្រាស់សម្លៀកបំពាក់នគរបាលក្លែង និងក្លែងខ្លួនជានាយករងនៃមន្ទីរប្រឆាំងបទល្មើសគ្រឿងញៀន។
លោកឧត្តមសេនីយ៍ ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យមានឈ្មោះ សៅខូ ច័ន្ទសូឡា អាយុ ២២ ឆ្នាំជាជនជាតិខ្មែរ។ ជននេះត្រូវបានមន្ត្រីជំនាញនៃមន្ទីរប្រឆាំងគ្រឿងញៀនសាកសួរចប់ហើយហើយបានកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញនៅរសៀលថ្ងៃនេះ (ថ្ងៃទី ២៧ មិថុនា)។
លោកបានបញ្ជាក់ថា ការបញ្ជូនជនសង្ស័យទៅតុលាការនេះគឺបន្ទាប់ពីសមត្ថកិច្ចបង្ហាញខ្លួនជននេះជាសាធារណៈពីថ្ងៃទី ២៦ មិថុនា នៅក្រសួងមហាផ្ទៃជាមួយនឹងវត្ថុតាង។
លោកថា៖ «យើងបានចាត់ចែងបញ្ជូនជនសង្ស័យម្នាក់នេះទៅតុលាការរាជធានីភ្នំពេញនៅរសៀលម៉ោង ២ ថ្ងៃនេះ (ថ្ងៃទី ២៧ មិថុនា) ដើម្បីទុកជូនតុលាការចាត់ការតាមនីតិវិធីច្បាប់»។
ពាក់ព័ន្ធនឹងការឃាត់ខ្លួនជនសង្ស័យនេះ លោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀនឱ្យដឹងកាលពីម្សិលមិញដែរថា ជនសង្ស័យនេះជាប់ពាក់ព័ន្ធបទល្មើសក្លែងធ្វើជាមន្ត្រីនគរបាលនៃមន្ទីរប្រឆាំងគ្រឿងញៀនផង និងក្លែងជាមន្ត្រីនៃនាយកដ្ឋានព្រហ្មទណ្ឌផង។
ទោះជាយ៉ាងណា លោកថា បើផ្អែកតាមការស៊ើបអង្កេតរបស់សមត្ថកិច្ចលោកគឺមិនទាន់ឃើញមានជនរងគ្រោះណាម្នាក់ ដែលជាប់ពាក់ព័ន្ធនឹងបទល្មើសឆបោក ឬមួយជនដែលរងគ្រោះ ដោយសារជនសង្ស័យម្នាក់នេះប្តឹងមកសមត្ថកិច្ចលោកនៅឡើយទេ។
លោកថា៖ «ករណីនេះគឺយើងបានស្រាវជ្រាវមិនទាន់ឃើញថា មានជនរងគ្រោះ ដោយសារជនម្នាក់នេះទេ ព្រោះអត់ទាន់ឃើញមាននរណាប្តឹង។ តែអ្វីដែលយើងឃើញជាក់ស្តែងគឺយើងឃើញតែលិខិតឯកសារក្លែង និងសម្លៀកបំពាក់ក្លែង»។
លោក អ៊ិន សុង ឱ្យដឹងទៀតថា មុនឃាត់ខ្លួនជនសង្ស័យគឺសមត្ថកិច្ចរបស់លោកទទួលបានសេចក្តីរាយការណ៍ពីលោកវរសេនីយ៍ អ៊ឹង សុភ័ក្ត្រ អធិការរងនគរបាលខណ្ឌទួលគោកពីករណីជនសង្ស័យបន្លំខ្លួនធ្វើជានាយករងមន្ទីរប្រឆាំងបទល្មើសគ្រឿងញៀននេះ។
បើតាមលោក អ៊ិន សុង បន្ទាប់ពីទទួលបានព័ត៌មាននេះ សមត្ថកិច្ចរបស់លោកក៏បានស្រាវជ្រាវឃាត់ខ្លួនបានកាលពីថ្ងៃទី ២៤ មិថុនាតែម្តង។ ក្រោយពីចាប់ខ្លួន ជនសង្ស័យបានសារភាពថា ដំបូងគាត់ក្លែងធ្វើជានគរបាលព្រហ្មទណ្ឌទេ តែក្រោយមកគេក៏ក្លែងជានាយករងមន្ទីរប្រឆាំងគ្រឿងញៀន។
លោក សុង បានឱ្យដឹងដែរថា ចំពោះវត្ថុតាងដែលសមត្ថកិច្ចដកហូតបានពីជនសង្ស័យរួមមាន៖ អាវុធខ្លី ១ ដើម (កាំភ្លើងហ្គាស) ម៉ាក TACTICAL23 និងបង់ចំនួន ២, គ្រាប់អាវុធប្រភេទ 9mm ចំនួន ១២ គ្រាប់, ខ្នោះដៃចំនួន ១ គូ, វិទ្យុទាក់ទងម៉ាកម៉ូតូរ៉ូឡាចំនួន ១ គ្រឿង, ស្រោមអាវុធខ្លី ៤, កាតនគរបាលជាតិក្លែងក្លាយ ២ សន្លឹក, ស័ក្តិថ្នាក់វរសេនីយ៍ទោ ១ គូ, កាតនគរបាលព្រហ្មទណ្ឌក្លែងក្លាយ ២ សន្លឹក, មួកនគរបាលជាតិថ្នាក់វរសេនីយ៍ ២ និងថ្នាក់អនុសេនីយ៍ ១, ឯកសណ្ឋាននគរបាលជាតិ ៦ កំប្លេ, លិខិតឯកសារក្លែងក្លាយជារបស់ក្រសួងមហាផ្ទៃមួយចំនួន, លិខិតក្លែងរបស់នាយកដ្ឋានកណ្ដាលនគរបាលយុត្តិធម៌ និងលិខិតក្លែងរបស់នាយកដ្ឋានព្រហ្មទណ្ឌមួយចំនួនធំទៀត, ប្រអប់ដាក់អាវុធខ្លីម៉ាក CZ ចំនួន ១, ម៉ាស៊ីនកាត់កាតចំនួន ១ គ្រឿង,អាវក្រោះការពារគ្រាប់ចំនួន ១, អាវកាក់ពាក់ពីលើឯកសណ្ឋាននគរបាលជាតិ, កាបូបដាក់សម្ភារ ៣ និងស្បែកជើងកវែង ១ គូផងដែរ៕