.jpg)
សកម្មភាពឪពុកម្ដាយនាំកូនទៅពិនិត្យព្យាបាលជំងឺនៅមន្ទីរពេទ្យគន្ធបុប្ផារាជធានីភ្នំពេញ នៅដើមខែមិថុនានេះ ។ ហុង មិនា
ភ្នំពេញៈ នៅក្នុងខែមិថុនា ឆ្នាំ ២០២១ នេះ មន្ទីរពេទ្យគន្ធបុប្ផាបានពិនិត្យព្យាបាលដល់កុមារឈឺចំនួនជាង ២ ម៉ឺននាក់ ខណៈកុមារមានជំងឺធ្ងន់ៗជិត ៤ ពាន់នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យនេះ។
បើតាមរបាយការណ៍ក្នុងខែមិថុនា របស់មន្ទីរពេទ្យគន្ធបុប្ផាបានឱ្យដឹងថា៖ «កុមារឈឺចំនួន ២០ ៣០៨ នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ។ កុមារមានជំងឺធ្ងន់ៗ ៣ ៨២៤ នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ»។
របាយការណ៍បន្តថា កុមារចំនួន ១ ១៨១ នាក់ ត្រូវបានទទួលការវះកាត់។ ក្នុងនោះកុមារដែលទទួលការវះកាត់បេះដូងនិងភ្ជិតប្រហោងបេះដូងតាមសរសៃឈាមនៅគន្ធបុប្ផា ភ្នំពេញនិងសៀមរាបមានចំនួន ៣១ នាក់។
របាយការណ៍បញ្ជាក់ថា នៅផ្នែកសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) ស្ត្រីមានផ្ទៃពោះចំនួន ៣ ៨៩៥ នាក់ បានមកពិនិត្យតាមដានផ្ទៃពោះនិងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភពនិងសម្រាលកូនបានចំនួន ១ ៣៩២ នាក់ ។
មន្ទីរពេទ្យគន្ធបុប្ផាបានបញ្ជាក់ថា៖ «រាល់ការព្យាបាលទាំងអស់គឺឥតគិតថ្លៃសម្រាប់គ្រប់ៗគ្នាដោយពុំមានការរើសអើង! សូមអរគុណដល់បុគ្គលិកកម្ពុជាទាំង ២ ៥០០ នាក់ ដែលបានខិតខំបំពេញការងារប្រកបដោយវិជ្ជាជីវៈ»៕
