The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​អ្នក​បើកបរ​រថយន្ត​ដឹកប្រេង​​ក្រុមហ៊ុន​ ហុងអ៊ីន ​ប្រមាណ​ជាង ​៥០ នាក់​ តវ៉ា​សុំឱ្យមាន​ច្បាប់​ការងារ​ត្រឹម​ត្រូវ

ក្រុម​អ្នក​បើកបរ​រថយន្ត​ដឹកប្រេង​​ក្រុមហ៊ុន​ ហុងអ៊ីន ​ប្រមាណ​ជាង ​៥០ នាក់​ តវ៉ា​សុំឱ្យមាន​ច្បាប់​ការងារ​ត្រឹម​ត្រូវ

Content image - Phnom Penh Post
ក្រុមអ្នកបើកបររថយន្តដឹកប្រេងក្រុមហ៊ុន ហុងអុីន តវ៉ាសុំឱ្យមានច្បាប់ការងារ និងសុំបណ្តេញមេការថ្មីចេញ លើនៅខណ្ឌពោធិ៍សែនជ័យ នាថ្ងៃនេះ។ រូបថត CEN

ក្រុម​អ្នក​បើកបរ​រថយន្ត​ដឹកប្រេង​​ក្រុមហ៊ុន​ ហុងអ៊ីន ​ប្រមាណ​ជាង ​៥០ នាក់​ តវ៉ា​សុំឱ្យមាន​ច្បាប់​ការងារ​ត្រឹម​ត្រូវ

ភ្នំពេញៈ ក្រុម​អ្នក​បើក​រថយន្ត​ដឹកប្រេង ​និ ង​ព្រូរ​ថយន្ត​ក្រុមហ៊ុន​ហុងអ៊ីន​ប្រមាណ​ជាង​ ៥០ នាក់ ​នាំគ្នា​តវ៉ា​នៅមុខ​ក្រុមហ៊ុន​ស្ថិត​នៅ​តាម​បណ្តោយ​ផ្លូវ​ជាតិ​លេខ៤ ​ក្នុង​សង្កាត់​ចោមចៅ​ទី៣ ​ខណ្ឌ​ពោធិ៍​សែនជ័យ ​ដោយ​មិនព្រម​ចូល​ធ្វើការងារ ​អស់​រយៈ​ពេល​១សប្តាហ៍​មក​ហើយ ​ចាប់ពី​ថ្ងៃទី២១ ​មិថុនា​មក។ ពួកគេ​ទាមទារ​ឲ្យ​ម្ចាស់​ក្រុមហ៊ុន​ធ្វើតាម​ការសន្យា​ដក​មេការ​ថ្មី​ចេញ ​និង​មាន​ច្បាប់​ការងារ​ត្រឹម​ត្រូវ។

ក្រុម​អ្នក​បើក​រថយន្ត​ដឹក​ប្រេង​ក្រុមហ៊ុន​ហុងអ៊ីន ​ប្រាប់​ភ្នំពេញ​ប៉ុស្តិ៍​សុំ​មិនឱ្យ​បញ្ចេញ​ឈ្មោះ​នាថ្ងៃនេះ​ថា ​ ការតវ៉ា​បានធ្វើ​ឡើង​ចាប់តាំង​ពី​ថ្ងៃទី២១ ​មិថុនា ​រហូត​មកដល់​រសៀល​ថ្ងៃទី២៨ ​ខែមិថុនា ​នៅ​តែមិនទាន់​មាន​ដំណោះ​ស្រាយអ្វី​ឡើយ។​ លោក​ថា ​ការតវ៉ា​នេះ ​គោល​បំណង​សំខាន់​បំផុត​គឺ​ទាមទារ​ឲ្យ​ម្ចាស់ក្រុម​ហ៊ុន ​មាន​ច្បាប់​ការងារ​ត្រឹម​ត្រូវ​សម្រាប់​អ្នក​បើកបរ​រថយន្ត ​ក៏ដូចជា​ព្រូរ​ថយន្ត។ ជាពិសេស​ត្រូវ​ដក​មេការ​ថ្មី​ដែល​ទើប​ចូល​ធ្វើ​ការងារ​ក្នុង​រយៈពេល​ខ្លី ​ប៉ុន្តែ​មិនមាន​ការ​ទទួល​ខុស​ត្រូវ​ច្បាស់​លាស់។

ក្រុម​អ្នក​បើកបរ​ប្រាប់ថា​៖«យើង​ស្នើសុំ​ឲ្យ​មាន​ច្បាប់​ការងារ។ ព្រោះ​កន្លង​មក​ពេល​មាន​គ្រោះថ្នាក់​ ព្រូឡាន​ត្រូវ​បាត់បង់​ជីវិត ​ហើយ​អ្នក​បើកបរ​របួស​ធ្ងន់​មិនមាន​ការទទួល​ខុស​ត្រូវ​ពី​ខាង​ក្រុម​ហ៊ុន។ គ្មាន​ធានា​រ៉ាប់រង​ គ្មាន​អី​ឲ្យ​មក​ពួក​ខ្ញុំ​ទេ។ គាត់​[ម្ចាស់​ក្រុមហ៊ុន]​មាន​តែ​ធានា​រ៉ាប់រង​ទ្រព្យ​សម្បត្តិ ​របស់​គាត់​ហ្នឹង។ អ៊ីចឹង​ ពួកយើង​ស្នើសុំ​គាត់​ ឲ្យ​គាត់​រៀបចំ​អាហ្នឹង​ឲ្យ​យើង​ តែ​គាត់​អត់​ធ្វើឲ្យ​យើង ​បែរជា​ឲ្យ​មេការ​ថ្មី​ដែល​យើង​មិនដែល​ស្គាល់​មក​គ្រប់គ្រង​បង្ក​បញ្ហា​ដល់​ពួក​ខ្ញុំ​ជា​ច្រើន»។

បើ​តាម​ការអះអាង​របស់​ពួកគេ ​អ្នក​បើកបរ​រថយន្ត​នៅ​ក្រុមហ៊ុន​ហុងអ៊ីន​សុទ្ធតែ​បានធ្វើ​ការងារ​យូរ​ឆ្នាំ​មក​ហើយ ​ខ្លះ​៥ឆ្នាំ​ ខ្លះ​១០​ទៅ​១៥ឆ្នាំ ​មិន​ដែល​មាន​បញ្ហា​អ្វី​ក្នុង​កិច្ចការងារ​នោះ​ទេ។ ប៉ុន្តែ​ថ្មីៗ​នេះ​ម្ចាស់ក្រុមហ៊ុន​ធ្វើការ​បិទ​សិទ្ធិ​គាប​សង្កត់​ ធ្វើឲ្យ​កម្មករ​ជាអ្នក​បើក​បរ​រថយន្ត ​និង​ព្រូ មាន​ការលំ​បាក។

អ្នក​បើកបរ​រថយន្ត​ប្រាប់ថា​៖«បងប្អូន​ខ្លះ​គាត់​សុំ​ចេញ​ទៅ​ចាក់​វ៉ាក់សាំង ​ម្ចាស់​ក្រុមហ៊ុន​បានសរសេរ​ក្រដាស​ឲ្យ​ចេញ​ តែ​ដល់​ពេល​ចាក់​ហើយ ​គេ​សុំ​ចូល​កន្លែង​វិញ ​គាត់​អត់ឲ្យ​ចូល​ទេ ​បែរជា​ឲ្យទៅ​ធ្វើ​ចត្តាឡីស័ក​១៤ថ្ងៃ​រង់ចាំ​ក្រុម​ហ៊ុន​ផ្តល់​ដំណឹង​តាម​ក្រោយ។ ពេល​ដល់​ថ្ងៃ​កំណត់​ស្រាប់តែ​មាន​លិខិត១​ថ្មី​ទៀត​បញ្ឈប់​មេការ​បាត់​»[មេការ​ចាស់]។

​លោក​និយាយទៀត​ថា ​ក្រោយ​ពេល​បាន​ដក​មេការ​ចាស់​ចេញ​ហើយ ​ម្ចាស់​ក្រុមហ៊ុន​បានដាក់​មេការ​ថ្មី​ចូល ​និង​បាន​ដោះ​ដូរ​អ្នក​ធ្វើការ​ផ្នែក​រដ្ឋបាល​ផ្សេងៗ​ទៀត​ផង​ដែរ។ លោក​ថា​មូលហេតុ​ដែលនាំ​ឲ្យ​មានការ​ធ្វើ​កូដកម្ម ​គឺ ​នៅពេល​ដែល​ក្រុម​អ្នក​បើកបរ​ប្រមាណ​ជាង​៣០នាក់ ​មកពី​ស្រស់​ស្រូប​អាហារ​ពេល​ព្រឹក​ថ្ងៃទី២១ ​មិថុនា​ម៉ោង៨ ​ម្ចាស់​ក្រុមហ៊ុន​បាន​ហាម​ឃាត់​មិនឱ្យ​អ្នកបើកបរ​រថយន្ត​ចូល​ធ្វើការ​ដូច​សព្វ​ដង។

លោក​ថា​៖«ប្រាក់ខែ​មិន​មែន​ជាបញ្ហា​ចោទ​ទេ ​តែ​រឿង​សំខាន់​គាត់​អត់​ព្រម​ដក​មេការ​តាម​ដែល​គាត់​បានសន្យា​ជាមួយ​ពួក​ខ្ញុំ ​ដែល​គាត់​ថា​នឹង​ដកចេញ​នៅ​ថ្ងៃទី២០ ​ខែមិថុនា​នេះ។ មេការ​ថ្មី​នេះ​អត់​មាន​ទំនួល​ខុសត្រូ​វអី​ទេ ​អ៊ីចឹង​យើង​មិន​អាច​ទទួល​យក​បាន​ឡើយ។ បើ​គាត់​ចេញ​ច្បាប់​ការងារ​ឲ្យ​ពួក​ខ្ញុំ ​ហើយ​ដក​មេការ​ថ្មី​នោះ​ចេញ​ទៅ​ អាហ្នឹង​ពួក​យើង​ចូល​ធ្វើការ​​ធម្មតា​វិញ​ហើយ»។

ដោយ​សារតែ​ការតវ៉ា​មិនមាន​លទ្ធផល ​ក្រុម​អ្នក​បើក​រថយន្ត​បាន​កំណត់​លក្ខខណ្ឌ​ចំនួន៥ ​ដើម្បី​បន្ត​ធ្វើការ​ទាមទារ​ឲ្យ​ក្រុមហ៊ុន​ដោះ​ស្រាយ។ ទាំង៥​ចំណុច​ដែល​ក្រុម​អ្នក​បើក​រថយន្ត​ដឹកប្រេង ​និង​ព្រូ ​ទាមទារ​នោះ ​រួមមាន ​ទី១ ​សុំឲ្យ​ដក​មេ​ការ​ឈ្មោះ ​ស៊ុ ផល្លី ​ចេញ​ពី​ក្រុមហ៊ុន ​ទី២​សុំ​ទាមទារ​ច្បាប់​ការងារ​ពី​ក្រសួង​ការងារ ​ទី៣​សុំកុំ​ឲ្យ​ក្រុមហ៊ុន​បញ្ឈប់​បុគ្គលិក​ណា​ម្នាក់ ​ដែល​គ្មាន​កំហុស​ចេញ ​ទី៤​សុំឲ្យ​មាន​ការធានា​រ៉ាប់រង ​លើ​អាយុ​ជិវិត​បុគ្គលិក​ទាំងអស់ ​ដែល​កំពុង​បំពេញ​ការងារ ​និង​ទី៥​សុំ​សិទ្ធិ​សេរីភាព​ម៉ោង​ចេញ​ចូល ​និង​មាន​ច្បាប់​ឈប់​សម្រាក​ពេល​ឈឺ​ថ្កាត់។

ទោះ​យ៉ាងណា ​នៅ​រសៀល​ថ្ងៃទី២៨​ ខែមិថុនា​នេះ ​ភ្នំពេញ​ប៉ុស្តិ៍​មិនអាច​ទាក់ទង​សុំ​ការបំភ្លឺ​ពី​តំណាង​ក្រុមហ៊ុន​ហុង​អ៊ីន​បាន​ទេ៕

អត្ថបទគួរចាប់អារម្មណ៍