.jpg)
មន្ត្រីជំនាញពិនិត្យសត្វតោដែលជនជាតិចិនចិញ្ចឹមនៅក្នុងផ្ទះ។ រូបថត នគរបាល
ភ្នំពេញៈ បុរសជនជាតិចិនដែលចិញ្ចឹមសត្វតោមួយក្បាលដោយខុសច្បាប់ អាចប្រឈមនឹងការពិន័យអន្តរការណ៍ជាប្រាក់ប្រមាណ ៣ ម៉ឺនដុល្លារ ដោយមន្ត្រី បានអះអាងថា ក្នុងករណីជនជាតិចិននោះ មិនបង់សំណង់ជូនរដ្ឋ អាចនឹងបញ្ចូនសំណុំរឿងទៅតុលាការ ចាត់ការតាមនីតិវិធី។
កាលពីថ្ងៃទី ២៧ ខែមិថុនាឆ្នាំ ២០២១ អាជ្ញាធរចម្រុះរាជធានីភ្នំពេញ រួមមានព្រះរាជអាជ្ញារងម្នាក់ សហការជាមួយអង្គការ Wildlife Alliance បានរឹបអូសសត្វតោចិញ្ចឹមមួយក្បាល នៅក្នុងផ្ទះវីឡាមួយកន្លែង ស្ថិតនៅផ្ទះលេខ ២២ ផ្លូវ ៣០៦ ភូមិ ៧ សង្កាត់បឹងកេងកង ១ រាជធានីភ្នំពេញ។
សត្វតោនោះ ត្រូវបានដឹងថា ជាសត្វតោឈ្មោលមានអាយុ ១៨ ខែ និងទម្ងន់ ៧០ គីឡូក្រាម ហើយក្រោយការដកហូត ក្រុមជួយសង្គ្រោះ បានបញ្ជូនសត្វតោនេះទៅកាន់មជ្ឍមណ្ឌលសង្គ្រោះសត្វព្រៃភ្នំតាម៉ៅ ដែលនឹងក្លាយទៅជាទីជម្រកមួយរបស់វា និងផ្តល់ការថែទាំប្រកបដោយវិជ្ជាជីវៈនាពេលអនាគត។
លោក គាំ សីហា នាយករងខណ្ឌទទួលបន្ទុករួមខណ្ឌរដ្ឋបាលព្រៃឈើភ្នំពេញបានប្រាប់ភ្នំពេញប៉ុស្តិ៍នៅថ្ងៃទី ២៨ មិថុនាថា ដោយសាតែការស្រាវជ្រាវរកឃើញថា ម្ចាស់សត្វតោជាជនជាតិចិននេះ គ្រាន់តែយកសត្វតោនេះមកចិញ្ចឹមដោយគ្មានច្បាប់អនុញ្ញាត ដូច្នេះទោសទណ្ឌដែលជនជាតិចិននេះ អាចនឹងទទួល គឺប្រឈមនឹងការពិន័យជាអន្តរការណ៍ប៉ុណ្ណោះ បើក្នុងករណី សមត្ថកិច្ច រកឃើញថា ជនជាតិចិននេះ យកសត្វតោនេះក្នុងចេតនាធ្វើអាជីវកម្ម នោះរូបគេ នឹងប្រឈមមានទោសតាមច្បាប់ស្តីពីការជួញដូរសត្វព្រៃ ហើយអាចនឹងត្រូវចាប់ខ្លួនបញ្ចូនទៅតុលាការ។
លោក គាំ សីហា បានបញ្ជាក់ថា៖«នៅក្នុងច្បាប់យើងនិយាយពីការពិន័យ ដើម្បីឲ្យគាត់រួចផុតពីការចោទប្រកាន់តាមផ្លូវតុលាការ ក្នុងបទល្មើសដែលគាត់បានប្រព្រឹត្ត។ ដូច្នេះ គាត់ ត្រូវទទួលពិន័យអន្តរការណ៍ជាប្រាក់គុណនឹង ២ ទៅ៣ ដងនៃតម្លៃសត្វតោដែលគាត់ចិញ្ចឹមនេះ ហើយបើយើងកំណត់តម្លៃតោនេះ ១ម៉ឺនដុល្លារ នោះគាត់អាចប្រឈមនឹងការពិន័យប្រមាណ ៣ ម៉ឺនដុល្លារ»។
លោក គាំ សីហា បានអះអាងថា បើសិនជាជនជាតិចិនរូបនេះ មិនព្រមបង់ប្រាក់ពិន័យតាមការកំណត់ចូលរដ្ឋនោះទេ សមត្ថកិច្ច ក៏នឹងបញ្ចូនសំណុំរឿងនេះ ទៅអយ្យការអមសាលាដំបូងរាជធានីភ្នំពេញ ដើម្បីពិនិត្យ និងធ្វើការចោទប្រកាន់បន្តផងដែរ។
តាមសេចក្តីប្រកាសព័ត៌មានរបស់អង្គការ Wildlife Alliance ដែលភ្នំពេញប៉ុស្តិ៍ទទួលបាននៅថ្ងៃទី ២៨ មិថុនា បានឲ្យដឹងថា ដើម្បីឱ្យម្ចាស់អាចលេងជាមួយសត្វតោនេះ ដោយគ្មានហានិភ័យ ម្ចាស់ដែលជាជនជាតិចិនបានដកធ្មេញ និងកាត់ក្រញ៉ាំរបស់សត្វតោនេះ។ ដូច្នេះ អង្គការនេះ បាននិយាយថា ការធ្វើយ៉ាងដូច្នេះ បានធ្វើឲ្យប៉ះពាល់ដល់ការរស់នៅជាប្រចាំថ្ងៃរបស់សត្វតោនេះ ដូច្នេះ ការបញ្ចូនវា ទៅមជ្ឈមណ្ឌលសង្គ្រោះសត្វព្រៃភ្នំតាម៉ៅ គឺជាជម្រើសមួយដ៏ល្អបំផុត ព្រោះមានការថែទាំប្រកបដោយវិជ្ជាជីវៈ។
អង្គការនេះ បានបញ្ជាក់ថា៖«ឥឡូវនេះ សត្វតោនេះ មានសុវត្ថិភាព និងត្រូវបានគេមើលថែយ៉ាងត្រឹមត្រូវ នៅមជ្ឈមណ្ឌលសង្គ្រោះសត្វព្រៃភ្នំតាម៉ៅ ដោយរដ្ឋបាលព្រៃឈើកម្ពុជា។ ដូចនេះ សត្វនីមួយៗ គឺកំពុងទទួលបានមើលថែពីបុគ្គលិកនៅមជ្ឈមណ្ឌលសង្គ្រោះសត្វព្រៃភ្នំតាម៉ៅ។ ហើយបុគ្គលនៃមជ្ឍមណ្ឌលនេះ នឹងធានាថា សត្វតោនេះ ទទួលបានអ្វីគ្រប់យ៉ាងដែលវាត្រូវការ»។
យោងតាមរដ្ឋបាលព្រៃឈើ បានឲ្យដឹងថា សត្វតោមួយក្បាលនេះ ជាប្រភេទសត្វតោមកពីតំបន់អាហ្វ្រិក ដែលវាចូលចិត្តរស់នៅក្នុងវាលស្មៅ។ សត្វតោនេះ ត្រូវបានបុរសជនជាតិចិន ទិញមកចិញ្ចឹមក្នុងតម្លៃ១ម៉ឺនដុល្លារ ក្នុងមួយក្បាល។
យោងតាមច្បាប់ស្តីពីព្រៃឈើ មាត្រា ៤៩ ចែងថា ការយកធ្វើជាកម្មសិទ្ធិ សន្និធិ ឬថែរក្សាជាលក្ខណៈសួនសត្វ ឬគ្រួសារនូវប្រភេទសត្វក្នុងក្រុមជិតផុតពូជ ត្រូវបានហាមឃាត់ ហើយច្បាប់ស្តីពីតំបន់ការពារធម្មជាតិ មាត្រា ៥៨ ការនាំចូល នាំចេញនូវប្រភេទសត្វ រុក្ខជាតិនិង គ្រាប់រុក្ខជាតិត្រូវស្នើសុំច្បាប់អនុញ្ញាត៕
វីដេអូ៖
