.jpg)
សាកសពក្មេងរងគ្រោះ និងទឹកស្រះដែលបណ្តាលឱ្យលង់ស្លាប់។ រូបថត នគរបាល
បន្ទាយមានជ័យ/ពោធិ៍សាត់ៈ យ៉ាងហោចណាស់ មានកុមារី ២ នាក់ ក្នុងចំណោមកុមារា-កុមារីចំនួន ៧ នាក់ បានលង់ទឹកស្លាប់ កាលថ្ងៃទី ២៧ ខែ មិថុនា ឆ្នាំ ២០២១ ដោយក្នុងនោះកុមារីម្នាក់ បានលង់ទឹកស្ទឹងស្លាប់ ក្នុងខេត្តបន្ទាយមានជ័យ ខណៈកុមារីម្នាក់ទៀត បានលង់ទឹកស្លាប់ពេលចុះងូតទឹកស្រះ ក្នុងខេត្តពោធិ៍សាត់។
លោក មាស រិទ្ធី អធិការនគរបាលស្រុកព្រះនេត្រព្រះ បានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែ មិថុនា ឆ្នាំ ២០២១ នេះថា កុមារីរងគ្រោះឈ្មោះ ធៀម ចរិយា អាយុ៩ឆ្នាំ មានទីលំនៅភូមិចារ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ បានលង់ទឹកស្លាប់ បន្ទាប់ពីនាង និងប្អូនប្រុសបង្កើតរបស់នាងឈ្មោះ ធៀម វាសនា អាយុ ៥ ឆ្នាំ ព្រមទាំងប្អូនស្រីជីដូនមួយរបស់នាង ២ នាក់ទៀត រួមមានឈ្មោះ វី វិជ្ជរ៉ា អាយុ ៩ ឆ្នាំ និង ឈ្មោះ វី វិសម័យអាយុ ៧ ឆ្នាំ បាននាំគ្នាទៅតាមរកពូរបស់ពួកគេឈ្មោះ អៀ តុងវឿ អាយុ ៣៣ ឆ្នាំ ដែលទៅរាវរកគ្រំ នៅក្នុងស្ទឹងបឹងចារ ដែលមានចម្ងាយប្រមាណ ៣០០ ម៉ែត្រ ពីផ្ទះរបស់ពួកគេ។
លោកបានបញ្ជាក់ថា៖ «លុះទៅដល់មាត់ស្ទឹង ពួកគេបាននាំគ្នាងូតទឹកលេងផង និងជួយរាវគ្រំឲ្យពូរបស់ពួកគេផង។ បន្ទាប់មកពួកគេក៏បានរអិលជើងធ្លាក់ចូលទៅក្នុងអន្លង់ទឹកជ្រៅ បណ្ដាលឲ្យលង់ទឹក។ ភ្លាមៗនោះពូរបស់ពួកគេ បានស្ទុះទៅជួយសង្គ្រោះពួកគេដែរ តែដោយសារតែគាត់ម្នាក់ឯង ធ្វើឲ្យកុមារី ធៀម ចរិយា ដែលត្រូវបានស្រង់ចេញពីបាតស្ទឹងចុងក្រោយគេនោះបានស្លាប់»។
បច្ចុប្បន្ន សពកុមារីរងគ្រោះ ត្រូវបានឪពុកម្ដាយរបស់នាង រៀបចំពិធីបុណ្យសពតាមប្រពៃណី។
ចំណែកលោក ស៊ុយ ម៉ៅ អធិការរង នៃអធិការដ្ឋាននគរបាលស្រុកក្រគរ ខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ថា យុវតីម្នាក់ ក្នុងចំណោមគ្នា៣នាក់ បានលង់ទឹកស្រះស្លាប់ ក្រោយពីពួកគេ ត្រឡប់ពីស្ទូងស្រូវនៅឯស្រែ ហើយនាំគ្នាចុះងូតទឹកស្រះលេង ដោយខ្វះការប្រុងប្រយ័ត្ន។
លោក ម៉ៅ បានបន្តថា យុវតីរងគ្រោះឈ្មោះ ម៉ៅ ស្រីរ័ត្នអាយុ១៤ឆ្នាំ មានទីលំនៅ ភូមិស្រែឫស្សី ឃុំក្បាលត្រាច ស្រុកក្រគរ ខេត្តពោធិ៍សាត់។ នៅមុនពេលកើតហេតុ នាងនិងយុវតី ២ នាក់ទៀត ដែលជាអ្នកជិតខាងរបស់នាង រួមមានឈ្មោះ មុំ សៀវម៉ី អាយុ ១៥ ឆ្នាំ និងឈ្មោះ សាន ស្រីនាត អាយុ ១៥ ឆ្នាំ បាននាំគ្នាត្រឡប់ពីស្ទូងស្រូវនៅឯស្រែ ដែលមានទីតាំងចម្ងាយប្រមាណ ២០០ ម៉េត្រ ពីស្រះទឹក ដែលជាចំណុចកើតហេតុ។
លោកបានបញ្ជាក់ថា៖ «តាមការអះអាងរបស់យុវតីឈ្មោះ សៀវម៉ី និង ស្រីនាត ពេលមកដល់ស្រះទឹក ពួកគេបាននាំគ្នាដោះអាវដៃវែង និងខោជើងវែង ដែលប្រឡាក់ភក់ពេលស្ទូងស្រូវ មកគក់ ហើយក៏នាំគ្នាចុះងូតទឹកលេង។ ប៉ុន្តែដោយស្រះនោះមានសភាពចោទនិងរអិល ស្រីរ័ត្ន [ជនរងគ្រោះ] ក៏បានផុងជើងទៅក្នុងទឹកជ្រៅ ហើយក៏លង់ទឹកតែម្ដង»។
លោក ម៉ៅ បានបន្តថា៖« ពេលនោះ ពួកនាងទាំង ២ បានស្រែកហៅអ្នកភូមិមកជួយ តែទំរាំអ្នកភូមិមកដល់ ស្រីរ័ត្ន ក៏បានលិចទៅក្នុងបាតស្រះ។ ក្រោយអ្នកភូមិរាវរកឃើញនិងស្រង់ពីក្នុងស្រះ ស្រីរ័ត្ន បានស្លាប់បាត់ទៅហើយ»។
បើតាមលោក ម៉ៅ ស្រះទឹកនោះមានជំរៅ ជាង ៤ ម៉ែត្រ និងមានច្រាំងចោត ហើយរអិលខ្លាំង ដែលងាយនឹងបណ្ដាលឲ្យអ្នកដែលមិនចេះហែលទឹក អាចផុងជើងធ្លាក់ទៅក្នុងទឹកជ្រៅ លង់ស្លាប់បាន។
ជាមួយគ្នានេះលោកបានអំពាវនាវដល់អ្នកភូមិសូមឱ្យបង្កើនការប្រុងប្រយ័ត្ន ហើយត្រូវណែនាំកុំឲ្យកុមារតូចៗចុះលេងទឹកស្រះ ទឹកអូរ ឬប្រឡាយ ព្រោះក្នុងរដូវវស្សានេះ ទឹកអូរ និងប្រឡាយមួយចំនួន មានទឹកជ្រៅ ដែលអាចបង្កឲ្យលង់ស្លាប់ បាន៕
