The Phnom Penh Post Search

Search form

Logo of Phnom Penh Post newspaper Phnom Penh Post - ៦ ​ខែ បង្ក្រាប​គ្រឿងញៀន​បាន​ជាង​ ៨០០ ​គីឡូ​ឃាត់ខ្លួន​អ្នក​ពាក់ព័ន្ធ​ជាង​ ៧ ០០០ ​នាក់




៦ ​ខែ បង្ក្រាប​គ្រឿងញៀន​បាន​ជាង​ ៨០០ ​គីឡូ​ឃាត់ខ្លួន​អ្នក​ពាក់ព័ន្ធ​ជាង​ ៧ ០០០ ​នាក់

Content image - Phnom Penh Post
ជនជាតិ​វៀតណាម និង​ចិន​ជួញដូរ​គ្រឿងញៀន​ត្រូវ​ចាប់ខ្លួន​។ រូប នគរបាល

៦ ​ខែ បង្ក្រាប​គ្រឿងញៀន​បាន​ជាង​ ៨០០ ​គីឡូ​ឃាត់ខ្លួន​អ្នក​ពាក់ព័ន្ធ​ជាង​ ៧ ០០០ ​នាក់

ភ្នំពេញៈ រយៈពេល​ ៦ ​ខែ ​ឆ្នាំ​ ២០២១ នេះ សមត្ថកិច្ច​បាន​បង្ក្រាប​គ្រឿងញៀន​ជាង ៨០០ ​គីឡូក្រាម និង​ឃាត់ខ្លួន​មនុស្ស​ជាង​ ៧ ​ពាន់​នាក់ និង​រកឃើញ​ដើម​កញ្ឆា​ជាង​ ១​ ម៉ឺន​ ៤ ពាន់​ដើម​។ នេះ​បើតាម​របាយការណ៍​មន្ទីរ​ប្រឆាំង​បទល្មើស​គ្រឿងញៀន​នៃ​អគ្គស្នងការដ្ឋាន​នគរបាលជាតិ​។

លោក​ មាស វិរិទ្ធ អ្នកនាំពាក្យ​ និង​ជា​អគ្គលេខាធិការ​នៃ​អគ្គលេខាធិការដ្ឋាន អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន​បានឱ្យ​ដឹងថា លទ្ធផល​នៃ​ការអនុវត្ត​ច្បាប់​ចាប់ពី​ខែមករា ដល់​ខែមិថុនា​នេះ​នគរបាល​បាន​បង្ក្រាប​បទល្មើស​គ្រឿងញៀន​ចំនួន​ ៣ ១៤៩ ​ករណី​ ក្នុង​នោះ​បាន​ឃាត់ខ្លួន​មនុស្ស​ចំនួន​ជាង​ ៧ ​ពាន់​នាក់​មាន​ជនបរទេស​ ១២០ ​នាក់​មាន​ ៨ ​សញ្ជាតិ និង​ដកហូត​គ្រឿងញៀន​បាន​ជាង​ ៨០០ ​គីឡូក្រាម​។ ក្រៅពីនេះ​ក៏បាន​រកឃើញ​ដើមកញ្ឆា​ជាង​ ១ ​ម៉ឺន​ ៤ ​ពាន់​ដើម​ផងដែរ​។

លោក​ថ្លែងថា​៖ «​ករណី​គ្រឿងញៀន​ក្នុង​រយៈពេល​ ៦ ​ខែ​មកនេះ កើតមានឡើង​តាម​រូបភាព ជួញដូរ រក្សាទុក កែច្នៃ ចាត់ចែង ប្រើប្រាស់ និង​មាន​ជាង​ ២០០ ​ករណី​ជា​ការបង្ក្រាប​ដោយ​អនុវត្តតាម​ដីកា​របស់​តុលាការ​»​។

របាយការណ៍​បាន​បញ្ជាក់ថា ការអនុវត្ត​ច្បាប់​រយៈពេល​ ៦ ​ខែ ពីថ្ងៃ​ទី​ ១ ខែមករា ដល់​ថ្ងៃទី​ ២៥ ​ខែ​ មិថុនា ឆ្នាំ​ ២០២១ ​កម្លាំង​ជំនាញ បង្ក្រាប​ករណី​គ្រឿងញៀន​សរុប​បាន​ ៣ ១៤៩ ​ករណី ឃាត់​មនុស្ស​បាន​សរុប ៧ ០៥៣ នាក់ ក្នុងនោះ​ស្រី ៣៧៧ ​នាក់​ និង​ជនបរទេស​ ១២០ ​នាក់ ស្រី​ ១០ ​នាក់ មាន​ ៨ ​សញ្ជាតិ​។

ក្រៅពី​ឃាត់ខ្លួន​មនុស្ស និង​ដកហូត​គ្រឿងញៀន​នគរបាល​ក៏​បាន​ឃាត់ទុក​នូវ​មធ្យោបាយ​ផ្សេងៗ​មួយចំនួន​ទៀត​រួមមាន រថយន្ដ​ ៤៧ ​គ្រឿង ម៉ូតូ​ ៨១៨ ​គ្រឿង អាវុធខ្លី​ ៥ ​ដើម អាវុធ​វែង​ ១៨ ​ដើម​ និង​អាវុធ​កែច្នៃ​ ១១ ​ដើម​។ លុយ​ខ្មែរ​ជាង ៨ ​លាន​រៀល លុយ​ដុល្លារ​ជាង ១ ២០០ ​ដុល្លារ លុយ​ថៃ​ជាង ២៤ ០០០ ​បាត និង​លុយ​វៀតណាម​ ២១ ០០០ ​ដុង​។

ក្នុង​ទិវា​អន្តរជាតិ​ប្រយុទ្ធប្រឆាំង​គ្រឿងញៀន​នៅ​ថ្ងៃទី​ ២៥ ខែមិថុនា លោកនាយក​រដ្ឋមន្ត្រី​ ហ៊ុន សែន បាន​ណែនាំ​ឱ្យ​មន្ត្រីក្រោម​ឱវាទ​របស់​លោក ពង្រឹង​កិច្ចសហប្រតិបត្តិការ​អន្តរជាតិ​បន្ថែមទៀត ដើម្បី​ទប់ស្កាត់​ការចរាចរ​គ្រឿងញៀន​ចូល​មក​ក្នុង​ប្រទេស​ឱ្យមាន​ប្រសិទ្ធភាព ខណៈ​លោក​ទទួល​ស្គាល់​ថា គ្រឿងញៀន​នៅតែ​ជា​បញ្ហា​គំរាមកំហែង​ដល់​ការអភិវឌ្ឍ​ប្រទេស​ជាតិ​។

លោក​ ហ៊ុន សែន ​ថ្លែងថា​៖ «​ក្រសួង​ស្ថាប័ន និង​អង្គភាព​ពាក់ព័ន្ធ​ទាំងអស់​ត្រូវ​បន្ត​យកចិត្ត​ទុកដាក់​ក្នុង​ការពង្រឹង និង​ពង្រីក​បន្ថែម​ឱ្យបាន​ទូលំទូលាយ​នូវ​កិច្ចសហប្រតិបត្តិការ​អន្តរជាតិ ទាំង​ក្នុង​ក្របខ័ណ្ឌ​ទ្វេភាគី ពហុភាគី តំបន់ និង​ជា​សកល​ ដើម្បី​ទប់ស្កាត់​ការចរាចរ​ជួញដូរ​គ្រឿងញៀន​ខុសច្បាប់​ឱ្យ​កាន់​តែមាន​ប្រសិទ្ធភាព​ខ្ពស់​»​។

តាម​សារលិខិត​របស់​លោក​​ ហ៊ុន សែន បទល្មើស​គ្រឿងញៀន​ចំនួន​ ១០ ៤៦១ ​ករណី​ត្រូវ​បាន​បង្ក្រាប​នៅក្នុង​ឆ្នាំ​ ២០២០ គឺ​បង្ក្រាបបាន​ច្រើនជាង​ឆ្នាំ​ ២០១៩ ​ប្រមាណ​ ៦,៧៩ ​ភាគរយ​។

ក្នុង​បទល្មើស​គ្រឿងញៀន​ដែល​ត្រូវបាន​បង្ក្រាប​ទាំងនោះ​មាន​ជនសង្ស័យ​ដែល​ពាក់ព័ន្ធ​នឹង​បទល្មើស​គ្រឿងញៀន​ចំនួន​ ២១ ៥៦៦ ​នាក់​ត្រូវ​បាន​ឃាត់ខ្លួន​គឺ​មាន​ចំនួន​ច្រើនជាង​ឆ្នាំ​ ២០១៩ ប្រមាណ​ ៥,២៥ ​ភាគរយ និង​ចាប់យក​គ្រឿងញៀន​គ្រប់​ប្រភេទ​បាន​ជាង​ ៣ ៨៧៥ ​គីឡូក្រាម ដែល​បរិមាណ​នេះ​មាន​ការកើនឡើង​ប្រមាណ ៥១៦ ​ភាគរយ បើ​ប្រៀបធៀប​ទៅនឹង​បរិមាណ​ដែល​ចាប់បាន​ក្នុង​ឆ្នាំ​ ២០១៩​។

លោកស្រី​ សឿ សុជាតា អនុរដ្ឋលេខាធិការ​ក្រសួង​អប់រំ យុវជន​ និង​កីឡា និង​ជា​ប្រធាន​ក្រុម​ការងារ​អភិវឌ្ឍន៍​សម្ភារ​ឧបទេស សម្រាប់​ការអប់រំ​បង្ការ​ទប់ស្កាត់​ការប្រើប្រាស់​គ្រឿងញៀន​ខុសច្បាប់​នៅ​តាម​គ្រឹះស្ថានសិក្សា​បាន​ថ្លែង​កាលពី​ម្សិលមិញ​ថា ក្រសួង​អប់រំ​បាន​យកចិត្ដ​ទុកដាក់ បញ្ជ្រាប​ចំណេះដឹង​លើ​បញ្ហា​គ្រោះថ្នាក់​ដោយ​ការប្រើប្រាស់​គ្រឿងញៀន​នេះ ដល់​សិស្សានុសិស្ស​នៅ​តាម​សាលារៀន​នៅ​ទូទាំង​ប្រទេស​។ ក្រសួង​ក៏​កំពុង​រៀបចំ​បង្កើត​បណ្ណាល័យ​ឌីជីថល ដើម្បី​ផ្សព្វផ្សាយ​ចំណេះដឹង និង​មេរៀន​អប់រំ​ពាក់ព័ន្ធ​នឹង​បញ្ហា​គ្រឿងញៀន​នេះ​ជាច្រើន​ទៀត​ដល់​សាធារណជន និង​សិស្សានុសិស្ស​។

លោកស្រី​ថ្លែងថា​៖ «​ក្រសួង​អប់រំ​បាន​រៀបចំ​ឱ្យមាន​សម្ភារ​ឧបទេស​សម្រាប់​ការអប់រំ​ក្នុង​ការបង្រៀន​ដល់​សិស្ស​នៅ​កម្រិត​បឋមសិក្សា និង​កម្រិត​មធ្យមសិក្សា​។ ការអប់រំ​នេះ​យើង​បានរៀបចំ​បណ្ដុះបណ្ដាល​ដល់​ក្រុម​ជន​បង្គោល និង​រៀបចំ​ជា​ក្រុមការងារ សម្រាប់​រៀបចំ​ជា​ឯកសារ​បង្រៀន​សៀវភៅ និង​ការបណ្ដុះបណ្ដាល​ពី​វិធីសាស្ដ្រ​បង្រៀន​លើ​បញ្ហា​គ្រឿងញៀន​នេះ​ដល់​សិស្ស​»​។

លោកស្រី​សង្ឃឹមថា តាមរយៈ​កិច្ចសហការ​រវាង​អ្នក​ពាក់ព័ន្ធ​គ្រប់ភាគី​ទាំង​ស្ថាប័នរដ្ឋ​ និង​សង្គម​ស៊ីវិល​បញ្ហា​គ្រឿងញៀន​នឹង​អាច​កាត់បន្ថយ និង​ឈានទៅ​លុបបំបាត់បាន​នា​ថ្ងៃ​អនាគត​៕

អត្ថបទគួរចាប់អារម្មណ៍