.jpg)
លោក ហ៊ុន សែន និងលោក ហេង សំរិន ក្នុងពិធីនៅពហុកីឡដ្ឋានជាតិអូឡាំពិកពីឆ្នាំ ២០១៩។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា (CPP) និងប្រធានរដ្ឋសភាលោក ហេង សំរិន ប្រធានកិត្តិយសគណបក្សនេះបានលើកឡើងត្រួសៗពីប្រវត្តិតស៊ូ និងសមិទ្ធផលនានាដែលរដ្ឋាភិបាលដឹកនាំដោយគណបក្សប្រជាជនសម្រេចបាន ជាពិសេសក្នុងរយៈពេល ៤២ ឆ្នាំចុងក្រោយ ដើម្បីបុព្វហេតុប្រជាជន និងប្រទេសកម្ពុជា។
ការលើកឡើងទាំងនេះធ្វើឡើងតាមរយៈផ្ញើសារក្នុងទិវារំឭកខួបលើកទី៧០ នៃថ្ងៃបង្កើតគណបក្សប្រជាជនកម្ពុជានាថ្ងៃទី ២៨ ខែមិថុនា ឆ្នាំ ១៩៥១ ដែលមានឈ្មោះដើមថា បក្សប្រជាជនបដិវត្តន៍ខ្មែរ ដោយមានប្រភពពីចលនាតស៊ូស្នេហាជាតិប្រឆាំងពួកអាណានិគមនិយម ដើម្បីឯករាជ្យជាតិ។
នៅក្នុងសារដដែលលោកនាយករដ្ឋមន្ត្រី ហ៊ុន សែន បានឱ្យដឹងថា ក្នុងរយៈពេល ៧០ ឆ្នាំនេះ គណបក្សបានដឹកនាំប្រជាជនតស៊ូប្រយុទ្ធយ៉ាងអង់អាច ដើម្បីរំដោះប្រទេសជាតិពីការឈ្លានពានត្រួតត្រារបស់ពួកបរទេស និងវាយផ្តួលរំលំរបបប្រល័យពូជសាសន៍ ប៉ុល ពត ដែលបានបញ្ចប់ទាំងស្រុងសម័យកាលដ៏ខ្មៅងងឹតបំផុតនៃកម្ពុជា ហើយបើកឡើងទំព័រប្រវត្តិសាស្ត្រលើមាគ៌ាសន្តិភាព បង្រួបបង្រួមជាតិ ប្រជាធិបតេយ្យ និងអភិវឌ្ឍន៍។
លោក ហ៊ុន សែន បានរៀបរាប់ថា រយៈពេល ៤២ ឆ្នាំកន្លងទៅ បន្ទាប់ពីបានទទួលជ័យជម្នះលើរបប ប៉ុល ពត នាថ្ងៃទី ៧ ខែមករា ឆ្នាំ ១៩៧៩ គណបក្សប្រជាជនកម្ពុជាបានដឹកនាំប្រទេសសម្រេចបានសមិទ្ធផលដ៏ធំធេងក្នុងបុព្វហេតុនៃការការពារការរស់ឡើងវិញរបស់ប្រជាជន រាំងស្កាត់ការប៉ុនប៉ងវិលត្រឡប់មកវិញនៃរបបប្រល័យពូជសាសន៍, ការស្តារ និងកសាងប្រទេសឡើងវិញពីបាតដៃទទេឱ្យមានស្ថិរភាពជាជំហានៗ បង្កើតបានបុព្វបទ និងលក្ខណសម្បត្តិជាមូលដ្ឋានសម្រាប់ការបង្រួបបង្រួមជាតិ,ការបង្កើតរដ្ឋធម្មនុញ្ញថ្មី និងព្រះរាជាណាចក្រកម្ពុជាទី ២ នាឆ្នាំ ១៩៩៣, ការបង្កើតសន្តិភាពពេញលេញជូនជាតិ ចាប់ពីចុងឆ្នាំ ១៩៩៨ មក តាមរយៈនយោបាយឈ្នះ ឈ្នះ, ការលើកស្ទួយលទ្ធិប្រជាធិបតេយ្យ និងសិទ្ធិសេរីភាពរបស់ពលរដ្ឋ និងការអភិវឌ្ឍសង្គមសេដ្ឋកិច្ចធ្វើឱ្យប្រជាជនមានជីវភាពកាន់តែប្រសើរឡើង ហើយកំពុងរួមរស់ជាមួយគ្នាយ៉ាងសុខដុមរមនា។
លោកបានបញ្ជាក់ថា៖ «ជោគជ័យរបស់គណបក្សប្រជាជនកម្ពុជាក្នុងគ្រប់ការបោះឆ្នោតកន្លងមកតាមគោលការណ៍លទ្ធិប្រជាធិបតេយ្យសេរីពហុបក្ស ទាំងនៅថ្នាក់ជាតិទាំងនៅថ្នាក់ក្រោមជាតិ គឺជាសក្ខីភាពបញ្ជាក់ច្បាស់ថា ប្រជាជនមានជំនឿទុកចិត្តយ៉ាងមុតមាំលើគណបក្សក្នុងការដឹកនាំប្រទេសតាមមាគ៌ាមួយដ៏ត្រឹមត្រូវដែលនាំមកសន្តិភាព ស្ថិរភាព ការរីកចម្រើន និងសុភមង្គលរបស់ប្រជាជន»។
លោកនាយករដ្ឋមន្ត្រី ហ៊ុន សែន បាន ចាត់ទុកការផ្តល់យុត្តិធម៌ និងការគាំទ្រឥតរង្គោះរង្គើដល់គណបក្សនៅគ្រប់កាលៈទេសៈថា ជាការធ្វើឱ្យគណបក្សមានលទ្ធភាពគ្រប់គ្រាន់ក្នុងការបម្រើជាតិ និងប្រជាជន។ ឆ្លើយតបទៅនឹងការជឿទុកចិត្តនេះគណបក្សនឹងបន្តពុះពារធ្វើអ្វីៗគ្រប់យ៉ាង ដើម្បីការពារឯករាជ្យ និងអធិបតេយ្យជាតិ ថែរក្សាសន្តិភាព ស្ថិរភាពនយោបាយ សន្តិសុខ និងស្ថិរភាព ម៉ាក្រូសេដ្ឋកិច្ច ពង្រឹងលទ្ធិប្រជាធិបតេយ្យឱ្យចាក់ឫសយ៉ាងរឹងមាំ។
បើតាមលោក ហ៊ុន សែន ទោះបីពុំមានការជួបជុំធំ ដើម្បីរំឭកខួបលើកទី ៧០ នៃថ្ងៃកំណើតគណបក្សប្រជាជនកម្ពុជា ដោយសារតែជំងឺកូវីដ ១៩ ក្តី ក៏ស្មារតីចងចាំ គុណូបការៈដ៏ថ្លៃថ្លាបំផុតរបស់បុព្វការីជន យុទ្ធជន យុទ្ធនារី និងអ្នកស្នេហាជាតិគ្រប់ជំនាន់ នៅតែស្ថិតក្នុងដួងចិត្តរបស់យើងជានិច្ច។
លោកបានមានប្រសាសន៍យ៉ាងដូច្នេះថា៖ «យើងជាខ្មែរទាំងអស់គ្នាប្តេជ្ញាប្រែក្លាយស្មារតីនេះឱ្យទៅជាសកម្មភាពដ៏ខ្លាំងក្លា ស្រុះដៃគា្នដោយឆន្ទៈតែមួយ ដើម្បីបន្តកសាង និងការពារមាតុភូមិយើងឆ្ពោះទៅរកអនាគតដ៏ត្រចះត្រចង់»។
ដោយឡែកនៅក្នុងសារលិខិតរបស់លោក ហេង សំរិន ប្រធានរដ្ឋសភា និងប្រធានកិត្តិយសគណបក្សប្រជាជនកម្ពុជាបានឱ្យដឹងថា គណបក្សប្រជាជនកម្ពុជាមានប្រភពកើតចេញពីចលនាតស៊ូស្នេហាជាតិប្រឆាំងរបបអាណានិគមនិយមបារាំង ដើម្បីឯករាជ្យជាតិ។ នៅក្នុងរយៈពេល ៧០ ឆ្នាំមកនេះគណបក្សបានខិតខំតស៊ូលះបង់ និងចូលរួមយ៉ាងសកម្មក្នុងការបម្រើការពារ និងអភិវឌ្ឍប្រទេសជាតិដោយបានឆ្លងកាត់ឧបសគ្គរាប់រយជំពូក។
លោកបានបន្តថា គណបក្សប្រជាជនកម្ពុជាបានដឹកនាំចលនាតស៊ូប្រឆាំងរបបអាណានិគមនិយម ដើម្បីឯករាជ្យជាតិ បន្ទាប់មកពីឆ្នាំ ១៩៥៣ ដល់ឆ្នាំ ១៩៧០ បានចូលរួមយ៉ាងសកម្មក្នុងការការពារឯករាជ្យ សន្តិភាព និងអធិបតេយ្យជាតិ។ គណបក្សបានបន្តតស៊ូ ដើម្បីរំដោះជាតិពីការឈ្លានពានរបស់បរទេសពីភ្លើងសង្គ្រាមឆ្នាំ ១៩៧០-១៩៧៥ និងបានរំដោះប្រទេសជាតិចេញផុតពីរបបប្រល័យពូជសាសន៍ ប៉ុល ពត នាថ្ងៃទី ៧ ខែ មករា ឆ្នាំ ១៩៧៩។
លោកបានថ្លែងថា៖ «យើងមិនអាចរៀបរាប់អស់ពីអ្វីដែលយើងបានឆ្លងកាត់នៅក្នុងរយៈពេល ៧០ ឆ្នាំមកនេះបានអស់នាពេលនេះបាននោះឡើយ។
ប៉ុន្តែជាសក្ខីភាពទោះបីត្រូវប្រឈមនឹងការវិវឌ្ឍដ៏ឆាប់រហ័ស និងស្មុគស្មាញបំផុតនៃសភាពការណ៍ជាតិអន្តរជាតិយ៉ាងណាក្តីគណបក្សប្រជាជនកម្ពុជាបានស្ថិតនៅរួមសុខរួមទុក្ខជាមួយប្រជាជនក្នុងគ្រប់កាលៈទេសៈពោលគឺ "គណបក្សប្រជាជនកម្ពុជាកើតចេញពីប្រជាជន ដើម្បីប្រជាជន និងសម្រាប់ប្រជាជន"»។
បើតាម លោក ហេង សំរិន បន្ទាប់ពីថ្ងៃជ័យជម្នះ ៧ មករា គណបក្សប្រជាជនកម្ពុជា បានដឹកនាំស្តារ និងកសាងប្រទេសជាតិឡើងវិញពីបាតដៃទទេ។ ដៃម្ខាងយើងអភិវឌ្ឍប្រទេសជាតិ ដៃម្ខាងយើងខិតខំទប់ស្កាត់មិនឱ្យរបបប្រល័យពូជសាសន៍វិលត្រឡប់មកជាថ្មី រួមនឹងការខិតខំកសាងអភិវឌ្ឍន៍ប្រទេសជាតិធ្វើការបង្រួបបង្រួមជាតិ ដើម្បីបញ្ចប់សង្គ្រាមផ្ទៃក្នុងបានទាំងស្រុងធ្វើឱ្យជាតិខ្មែរទាំងមូលរស់នៅក្រោមដំបូលបាវចនាតែមួយគឺ ជាតិ សាសនា និងព្រះមហាក្សត្រ។
ទោះបីមិនអាចរៀបចំពិធីមីទ្ទីងជាទ្រង់ទ្រាយធំដើម្បីអបអរសាទរថ្ងៃបង្កើតគណបក្សប្រជាជនកម្ពុជាបានដូចឆ្នាំមុនៗក្ដី ក៏លោក ហេង សំរិន បានអំពាវនាវឱ្យគណៈកម្មាធិការគណបក្សនៅគ្រប់ថ្នាក់បន្តលើកកម្ពស់ប្រពៃណីស្នេហាជាតិ ស្រឡាញ់ប្រជាជន ខិតខំពង្រឹងសាមគ្គីភាព ឯកភាពផ្ទៃក្នុងដើម្បីសម្រេចបានសមិទ្ធផលធំៗ និងថ្មីៗថែមទៀត។
ចំណែកលោក ស៊ី ជីនភីង អគ្គលេខាធិការបក្សកុម្មុយនីស្តចិន (CPC) និងជាប្រធានាធិបតីចិនកាលពីម្សិលមិញនេះ ក៏បានផ្ញើសារជូនលោកនាយករដ្ឋមន្ត្រី ហ៊ុន សែន ដើម្បីអបអរសាទរគណបក្សប្រជាជនកម្ពុជាក្នុងឱកាសគម្រប់ខួប ៧០ ឆ្នាំរបស់ខ្លួនផងដែរ។ នេះបើតាមការចុះផ្សាយរបស់សារព័ត៌មានចិន xinhua នៅថ្ងៃទី ២៨ ខែ មិថុនា ឆ្នាំ ២០២១។
លោក ស៊ី ជីនភីង ថ្លែងថា អស់រយៈពេលជាយូរមកហើយគណបក្សប្រជាជនកម្ពុជាបានបង្រួបបង្រួម និងដឹកនាំប្រជាជនកម្ពុជាក្នុងការជំរុញបុព្វហេតុនៃការកសាងអភិវឌ្ឍជាតិបានរួមចំណែកជាវិជ្ជមានដល់ស្ថិរភាព និងវិបុលភាពក្នុងតំបន់។
យ៉ាងណាក្ដី លោក ឯម សុវណ្ណារ៉ា អ្នកវិភាគនយោបាយកម្ពុជាថ្លែងថា គណបក្សប្រជាជនត្រូវបានបង្កើតឡើងដោយបក្សកុម្មុយនីស្តឥណ្ឌូចិន និងបានកាន់អំណាចបច្ចុប្បន្ននេះដឹកនាំដោយឯកបក្ស និងអនុវត្តស្រដៀងបក្សកុម្មុយនីស្តច្រើន បើទោះរដ្ឋធម្មនុញ្ញកម្ពុជាចែងពីរបបពីសេរីពហុបក្សក៏ដោយ ក្នុងនោះប្រព័ន្ធផ្សព្វផ្សាយនៅកម្ពុជាបានរួមតូចដោយមិនសូវផ្សព្វផ្សាយពីភាពអវិជ្ជមានរបស់រដ្ឋាភិបាល។
លោក សុវណ្ណារ៉ា បន្តថា បើទោះបីគណបក្សប្រជាជនកម្ពុជាបានប្រកាសពីការនៅរួមសុខរួមទុក្ខ និងមិនរត់ចោលពលរដ្ឋក៏ដោយ ក៏ប៉ុន្តែស្ថានភាពជាក់ស្តែងពលរដ្ឋមានសិទ្ធិអំណាចតែក្នុងថ្ងៃបោះឆ្នោតប៉ុណ្ណោះ ហើយនៅថ្ងៃធម្មតាវិញ គឺពលរដ្ឋពិបាកក្នុងការស្នើសុំសេវាសាធារណៈផ្សេងៗពីរដ្ឋអំណាច។
លោកបានបញ្ជាក់ថា៖ «ខ្ញុំមើលទៅអត់ទាន់ពេញលេញចំពោះការដឹកនាំរបស់គណបក្សប្រជាជន គឺនៅមានខ្វះចន្លោះច្រើន ដូចជាខ្វះមតិរិះគន់ [គណបក្សប្រឆាំង] ហើយមតិរិះគន់នេះ ត្រូវបានគណបក្សកាន់អំណាចចាត់ទុកថា ជាអ្នកប្រឆាំង អ៊ីចឹង វាអត់មានអីរីកចម្រើនទេ។ ប្រទេសប្រជាធិបតេយ្យគេឱ្យតម្លៃទៅលើការរិះគន់ឱ្យមានការកែតម្រូវទើបសង្គមមួយមានការរីកចម្រើន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយថ្លែងថា ៧០ ឆ្នាំកន្លងមកនេះ គណបក្សប្រជាជនកម្ពុជាបានឆ្លងកាត់នូវប្រវត្តិសាស្ត្រច្រើនដំណាក់កាល និងបានកសាងនូវសមិទ្ធផលធំៗជាច្រើន ជូនជាតិមាតុភូមិ។
លោកបានបន្តថា ចាប់តាំងឆ្នាំ ១៩៧៩ រហូតមកដល់បច្ចុប្បន្ននេះ គណបក្សប្រជាជនកម្ពុជាបាននាំមកនូវការរំដោះប្រជាពលរដ្ឋចេញពីរបបកម្ពុជាប្រជាធិបតេយ្យ (ខ្មែរក្រហម) ការបង្រួបបង្រួមជាតិការនាំមកសន្តិភាពពេញលេញបរិបូរណ៍ ការដឹកនាំអភិវឌ្ឍជាតិលើគ្រប់វិស័យ និងការនាំមកនូវកិត្យានុភាពជាតិ និងនាំមកឱ្យកម្ពុជាមានតួនាទីដ៏មានសារៈសំខាន់ខ្លាំងឡើងៗ នៅលើឆាកអន្តរជាតិ។
លោក គិន ភា ថ្លែងថា៖ «នេះ គឺជាចំណុចកត់សម្គាល់សំខាន់ៗរបស់ខ្ញុំចំពោះគណបក្សប្រជាជនកម្ពុជាក្នុងការដឹកនាំក្នុងរយៈពេល ៧០ ឆ្នាំកន្លងមកនេះ»៕
