ភ្នំពេញៈ ក្នុងខែមិថុនា ឆ្នាំ ២០២១ មន្ទីរពេទ្យគន្ធបុប្ផា បានពិនិត្យព្យាបាលដល់កុមារឈឺជាង ២ ម៉ឺននាក់គឺកើនឡើងជាង ១ ពាន់នាក់ បើធៀបនឹងខែឧសភា ដែលមានចំនួនជិត ២ ម៉ឺននាក់។
បើតាមរបាយការណ៍ពីមន្ទីរពេទ្យគន្ធបុប្ផា បានឱ្យដឹងថា ក្នុងខែមិថុនា កុមារឈឺចំនួន ២០ ៣០៨ នាក់ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ គឺបានកើនឡើងចំនួន ១ ៤៩៤ នាក់ បើធៀបនឹងខែមុនដែលមាន ១៨ ៨១៤ នាក់។ កុមារមានជំងឺធ្ងន់ៗ ៣ ៨២៤ នាក់ត្រូវបានដាក់ឲ្យសម្រាកព្យាបាល នៅក្នុងមន្ទីរពេទ្យកើនឡើង ៩៤ នាក់ បើធៀបនឹងខែមុនដែលមាន ៣ ៧៣០ នាក់។
កុមារចំនួន ១ ១៨១ នាក់ត្រូវបានទទួលការវះកាត់កើនឡើង ៦៧ នាក់ បើធៀបនឹងខែមុនដែលមាន ១ ១១៤ នាក់។
កុមារដែលទទួលការវះកាត់បេះដូង និងភ្ជិតប្រហោងបេះដូងតាមសរសៃឈាមនៅគន្ធបុប្ផាភ្នំពេញ និងសៀមរាបមានចំនួន ៣១ នាក់ កើនឡើង ៣ នាក់ បើធៀបនឹងខែមុនដែលមាន ២៨ នាក់។
របាយការណ៍បញ្ជាក់ថា នៅផ្នែកសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) ស្ត្រីមានផ្ទៃពោះចំនួន ៣ ៨៩៥ នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភព គឺកើនឡើង ៣៨១ នាក់ បើធៀបនឹងខែមុនដែលមាន ៣ ៥១៤ នាក់ និងសម្រាលកូនបានចំនួន ១ ៣៩២ នាក់ កើនឡើង ៩៥ នាក់ បើធៀបនឹងខែមុនដែលមានចំនួន ១ ២៩៧ នាក់។
មន្ទីរពេទ្យគន្ធបុប្ផាបញ្ជាក់ក្នុងរបាយការណ៍ថា៖ «រាល់ការព្យាបាលទាំងអស់ គឺឥតគិតថ្លៃ សម្រាប់គ្រប់ៗគ្នា ដោយពុំមានការរើសអើង! សូមអរគុណ ដល់បុគ្គលិកកម្ពុជាទាំង ២ ៥០០ នាក់ ដែលបានខិតខំបំពេញការងារ ប្រកបដោយវិជ្ជាជីវៈ»។
លោក Denis Laurent អគ្គនាយកមូលនិធិគន្ធបុប្ផាស្វ៊ីស ប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែមិថុនាថា តួលេខនេះគឺជាការប្រែប្រួលប្រចាំខែធម្មតា។ លោកថា៖ «យើងនៅតែមានការព្យាបាលករណីធ្ងន់ធ្ងរជាច្រើន»។
ក្នុងខែឧសភាចំនួនកុមារដែលពិនិត្យព្យាបាលនៅក្នុងផ្នែកពិគ្រោះជំងឺក្រៅសម្រាកព្យាបាលជំងឺធ្ងន់ៗ និងទទួលការវះកាត់បេះដូង និងភ្ជិតប្រហោងបេះដូង តាមសរសៃឈាមនៅមន្ទីរពេទ្យគន្ធបុប្ផាបានថយបើធៀបនឹងខែមេសា ដោយសារតែការបិទខ្ទប់ទីក្រុង និងការរឹតត្បិតការធ្វើដំណើរឆ្លងខេត្ត ដើម្បីទប់ស្កាត់ការឆ្លងរាលដាលជំងឺកូវីដ។
កាលពីថ្ងៃទី ១ ខែមិថុនា កាកបាទក្រហមកម្ពុជាបានឧបត្ថម្ភថវិកាចំនួន ១ លានដុល្លារដល់មន្ទីរពេទ្យគន្ធបុប្ផា។
នៅក្នុងលិខិតថ្លែងអំណរគុណផ្ញើទៅកាន់លោកស្រី ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា លោក Denis Laurent ថ្លែងថា មូលនិធិគន្ធបុប្ផាស្វ៊ីសបានចាត់ចែងវិធានការសំខាន់ៗមួយចំនួន ដើម្បីធានាក្នុងការបន្តសកម្មភាព «ដ៏អស្ចារ្យ និងកម្រិតខ្ពស់» របស់មន្ទីរពេទ្យគន្ធបុប្ជា ដែលមានបុគ្គលិកកម្ពុជាចំនួន ២ ៥០០ នាក់ ក្នុងស្មារតីរបស់សពស្ថាបនិកមន្ទីរពេទ្យ គន្ធបុប្ផា លោកវេជ្ជបណ្ឌិត Beat Richner។
លោក Denis Laurent បានបញ្ជាក់ថា៖ «យើងអាចធានាបានថា ថវិកានេះនឹងជួយយើងក្នុងការជួយសង្គ្រោះដល់ជីវិតកុមារកម្ពុជាជាច្រើននាក់ ឬទប់ស្កាត់ភាពពិការរបស់ពួកគេ»៕
វីដេអូ៖