The Phnom Penh Post Search

Search form

Logo of Phnom Penh Post newspaper Phnom Penh Post - បុរស​ជា​ឪពុកចុង​ដែល​រំលោភ​កូនស្រី​ចុង​អាយុ​ ១៤ ​ឆ្នាំ ​ត្រូវបាន​តុលាការ​ចេញ​ដីកាឃុំខ្លួន




បុរស​ជា​ឪពុកចុង​ដែល​រំលោភ​កូនស្រី​ចុង​អាយុ​ ១៤ ​ឆ្នាំ ​ត្រូវបាន​តុលាការ​ចេញ​ដីកាឃុំខ្លួន

Content image - Phnom Penh Post
ជនសង្ស័យត្រូវសមត្ថកិច្ចឃាត់ខ្លួន ករណីរំលោភកូនចុង។ រូបថត ប៉ូលិស

បុរស​ជា​ឪពុកចុង​ដែល​រំលោភ​កូនស្រី​ចុង​អាយុ​ ១៤ ​ឆ្នាំ ​ត្រូវបាន​តុលាការ​ចេញ​ដីកាឃុំខ្លួន

កណ្តាលៈ បុរស​ម្នាក់​ត្រូវបាន​តុលាការ​ចេញ​ដីកាឃុំខ្លួន​ដាក់​ពន្ធនាគារ​ខេត្តកណ្តាល កាលពី​ថ្ងៃទី​ ២៧ មិថុនា ពាក់ព័ន្ធ​ការរំលោភ​សេពសន្ថវៈ​លើ​កូនស្រី​ចុង​ម្នាក់​អាយុ​ ១៤ ​ឆ្នាំ​នៅ​ឃុំ​ស្វាយប្រទាល ស្រុក​ស្អាង បន្ទាប់ពី​ចាប់ខ្លួនបាន​ ២ ​ថ្ងៃ​។

យោងតាម​ដីកា​ដែល ​ភ្នំពេញ ប៉ុស្តិ៍​ ទទួលបាន​នៅ​ថ្ងៃទី​ ២៨ ​មិថុនា និង​ចុះហត្ថលេខា​ដោយ​លោក​ចៅក្រម​ស៊ើបសួរ ជួន វណ្ណៈ នា​ថ្ងៃទី​ ២៧ មិថុនា បាន​បង្ហាញថា ជន​ត្រូវ​ចោទ​ឈ្មោះ​ ប៉ិច សុភាព ភេទ​ប្រុស អាយុ​ ៣៩ ​ឆ្នាំ​មាន​របរ​ជា​កសិករ​រស់នៅ​ឃុំ​ស្វាយ​ប្រទាល ស្រុក​ស្អាង ខេត្តកណ្តាល​។

ក្នុង​ដីកា​បង្គាប់​ឱ្យ​ឃុំខ្លួន​នោះបាន​បញ្ជាក់ថា​៖ «​ជននេះ​ត្រូវ​ចោទ​ពី​បទរំលោភ​សេពសន្ថវៈ​មាន​ស្ថាន​ទម្ងន់ទោស​ទាក់ទង​នឹង​ជនរងគ្រោះ​តាម​បញ្ញត្តិ​មាត្រា​ ២៤១ ​នៃ​ក្រមព្រហ្មទណ្ឌ​»​។

ពាក់ព័ន្ធ​មាត្រា​ ២៤១ ​នេះ ប្រសិនបើ​តុលាការ​រកឃើញ​ថា ជន​ត្រូវ​ចោទ​ពិតជា​បាន​ប្រព្រឹត្ត​មែន​នោះ​នឹងត្រូវ​ប្រឈម​ជាប់​ពន្ធនាគារ​ពី​ ៧ ទៅ​ ១៥ ​ឆ្នាំ​។

លោក​ សូ សារិន អ្នកនាំពាក្យ​តុលាការ​ខេត្តកណ្តាល បញ្ជាក់​ពី​ម្សិលមិញថា ករណីនេះ​លោក​មិនទាន់​បានទទួល​ព័ត៌មាន​ពី​ខាង​ចៅក្រម​នៅឡើយ​ទេ​។

លោក​ គុណ គា នាយ​នគរបាល​ប៉ុស្តិ៍​រដ្ឋបាល​ឃុំ​ស្វាយប្រទាល​ឱ្យដឹង​តាម​សម្តី​ក្មេងរងគ្រោះ​នៅ​ថ្ងៃទី​ ២៨ មិថុនា​ថា ក្មេងរងគ្រោះ​ឈ្មោះ ម.ថ. អាយុ​ ១៤ ​ឆ្នាំ​។ នៅមុន​ឆ្នាំ​ ២០១៦ ម្តាយ​របស់​ក្មេងរងគ្រោះ​បាន​លែងលះ​ជាមួយ​ប្តី និង​បាន​យក​ជន​ត្រូវ​ចោទ​ជា​ប្តី​ប្រពន្ធ​នឹង​គ្នា​។ ក្រោយពី​បានរួមរស់​ជាមួយ​គ្នា គឺ​បុរស​ជា​ឪពុកចុង​ម្នាក់នេះ​ឧស្សាហ៍​ប្រឡែង​លេង​ជាមួយ​នាង និង​រួមរ័ក​ខ្លួន​ផង (​ក្មេងរងគ្រោះ​)​។

លោក​បន្តថា រាល់​ពេលដែល​ឪពុកចុង​ប្រព្រឹត្ត​លើ​រូបនាង​ម្តងៗ​គឺ​នាង​តែងតែ​ទទួលរង​ការសម្លុត គំរាម​មិនឱ្យ​យក​រឿងនេះ​ទៅ​និយាយប្រាប់​នរណា​ឱ្យដឹង​ទេ​។ បើ​រឿងនេះ​បែកធ្លាយ​ដល់​ម្តាយ​នាង​ ឬ​ទៅដល់​នរណាម្នាក់​នឹងត្រូវ​សម្លាប់ចោល​។

បើតាម​នាយប៉ុស្តិ៍​រូបនេះ​នៅ​ថ្ងៃទី​ ២៤ មិថុនា ម្តាយ​ក្មេងស្រី​រងគ្រោះ​បាន​ដេញ​វ៉ៃ​ក្មេង​រងគ្រោះ​នោះ ហើយ​នាង​បាន​រត់ទៅ​ផ្ទះ​អ្នកជិតខាង និង​បាន​និយាយ​ប្រាប់​ស្ត្រី​អ្នករស់នៅ​ជិតខាង​នោះ​ថា នាង​មិន​ហ៊ាន​ត្រឡប់​ទៅផ្ទះ​វិញ​ទេ ព្រោះ​ខ្លាច​ឪពុកចុង​ចាប់រំលោភ​នាង​ទៀត​។ ក្រោយពី​ដឹង​រឿង​នេះ​ហើយ​ស្ត្រី​ម្នាក់​នោះបាន​ប្រាប់​បន្តទៅ​អ្នកផ្សេង ហើយ​ក៏​រាយការណ៍​ដល់​សមត្ថកិច្ច​របស់លោក​។

លោក​បន្តថា បន្ទាប់ពី​ទទួលបាន​សេចក្តី​រាយការណ៍​កម្លាំង​សមត្ថកិច្ច​បាន​ចុះ​ដល់ផ្ទះ​កើតហេតុ​នៅ​ថ្ងៃទី​ ២៥ មិថុនា ហើយ​បាន​ហៅ​ក្មេងរងគ្រោះ និង​បុរស​ជា​ឪពុកចុង​នោះ​សាកសួរ​នៅ​ប៉ុស្តិ៍នគរបាល​របស់លោក​។ ពេលនោះ​ក្មេង​រងគ្រោះ​បាន​រៀបរាប់ថា​នាង​ត្រូវបាន ឪពុកចុង​ចាប់រំលោភ​ច្រើនដង​មកហើយ និង​តែងតែ​គំរាម​មិនឱ្យ​នាង​និយាយប្រាប់​ម្តាយ​ ឬ​ក៏​នរណា​ឱ្យ​ដឹង​ទេ បើ​ហ៊ាន​និយាយ​ឪពុកចុង​នោះ​នឹង​សម្លាប់​នាង​ចោល​។

លោក​បន្តថា​៖ «​ខ្ញុំ​សួរ​នាំទៅ​ទើប​បុរស​នោះ​សារភាព​ថា គាត់​ពិតជា​បាន​រំលោភ​កូនស្រី​ចុង​របស់គាត់​មែន និង​ទើបតែ​បាន​ ២ ​ដង​ទេ​។ យើង​ស្តាប់​សម្តី​ក្មេង​រងគ្រោះ និង​ឪពុកចុង​ទៅ​ឃើញ​ថា អង្គហេតុ​ស៊ីចង្វាក់​គ្នា ទើប​យើង​សម្រេច​ឃាត់ខ្លួន​តែម្តង​»៕

អត្ថបទគួរចាប់អារម្មណ៍