សៀមរាបៈ អាជ្ញាធរជាតិអប្សរាបាននិងកំពុងប្រមូល និងលើកថ្មប្រាសាទដែលធ្លាក់រាយប៉ាយក្នុងកសិន្ធុ បរិវេណប្រាសាទបាយ័នយកទៅរក្សាទុកនៅទីតាំងដែលមានសុវត្ថិភាព និងសម្រាប់ធ្វើការជួសជុលនាពេលខាងមុខ។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ ភ្នំពេញ ប៉ុស្តិ៍ នៅថ្ងៃទី ២៨ មិថុនា នេះឱ្យដឹងថា ការប្រមូលយកមករក្សាទុកនៅទីតាំងមានសុវត្ថិភាពនេះ បានចាប់ផ្តើមធ្វើតាំងពីកន្លះខែមុន ជាលទ្ធផលគឺមន្ត្រីនៃអាជ្ញាធរជាតិអប្សរាបានប្រមូលបានជាច្រើនពាន់ដុំក្នុងចំណោមថ្មប្រមាណជិត ៣ ០០០ ដុំ។
ថ្មទាំងនេះរាយប៉ាយនៅក្នុងកសិន្ធុ និងមិនមានសណ្តាប់ធ្នាប់ ព្រោះនៅក្នុងកសិន្ធុ នេះតែងតែមានទឹកដក់នៅពេលរដូវវស្សាមកដល់ដែលអាចនឹងធ្វើឱ្យប៉ះពាល់ដល់គុណភាពថ្ម។ មួយវិញទៀត អាជ្ញាធរជាតិអប្សរាមានបំណងក្នុងការរៀបថ្មទាំងនេះទៅតាមប្រភេទ និងក្រុម ដើម្បីចុះបញ្ជីសារពើភណ្ឌក្នុងការផ្តល់ភាពងាយស្រួលក្នុងការជួសជុលនាពេលអនាគត។
លោកថ្លែងថា៖ «យើងគ្រាន់តែចង់លើកតម្លៃនៃប្រាសាទឱ្យកាន់តែល្អប្រសើរជាពិសេសកសិន្ធុទឹករបស់ប្រាសាទ។ បេសកកម្មរបស់យើងត្រូវតែធ្វើអ៊ីចឹង»។
លោក កុសល ថ្លែងថា ថ្មរាយប៉ាយទាំងនេះត្រូវបានរលុះពីតួប្រាសាទ និងថ្មមកពីប្រាសាទនានា ដែលត្រូវបានដឹកយកមកទុកនៅទីនេះ។ ម្យ៉ាងវិញទៀត ចាប់តាំងពីប្រាសាទត្រូវបានចុះបញ្ជីជាបេតិកភណ្ឌពិភពលោក គឺអាជ្ញាធរជាតិអប្សរាបានខិតខំធ្វើឱ្យមានភាពនឹង និងភាពឈរ ព្រមទាំងមានសុវត្ថិភាពរបស់ប្រាសាទ ដែលឆ្លុះបញ្ចាំងពីកិច្ចការពារ និងអភិរក្សប្រាសាទ ដែលជាកេរមរតកដូនតា និងបេតិកភណ្ឌពិភពលោក។
លោក ស៊ឹម ថន អនុប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការបានឱ្យដឹងថា ថ្មប្រាសាទដែលស្ថិតនៅរាយប៉ាយក្នុងកសិន្ធុប្រាសាទបាយ័នរាប់រយឆ្នាំមកហើយក្នុងនោះមួយផ្នែករលុះបាក់ធ្លាក់ពីតួប្រាសាទក្បែរនោះ និងមួយផ្នែកទៀតត្រូវគេជញ្ជូនយកទៅដាក់ក្នុងពេលដែលបារាំងធ្វើការជួសជុលប្រាសាទបាយ័ន (ប្រហែលចន្លោះឆ្នាំ ១៩១៣-១៩២៩)។ ថ្មដែលបានស្រង់ចុះបញ្ជីមានច្រើនប្រភេទ៕