.jpg)
បុរសជាជនសង្ស័យ និងជនរងគ្រោះ ករណីទំនាស់ព្រំដី នៅភូមិឃូស្វាយ ឃុំបុសស្បូវ ស្រុកព្រះនេត្រព្រះ កាលពីថ្ងៃទី ២៦ មិថុនា។ រូបថត ប៉ូលិស
បន្ទាយមានជ័យៈ ជនសង្ស័យក្នុងអំពើឃាតកម្មម្នាក់ត្រូវបាននគរបាលបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី ២៨ មិថុនា ១ ថ្ងៃ បន្ទាប់ពីបង្កហេតុ និងចាប់ខ្លួនពាក់ព័ន្ធការប្រើពូថៅវាយសម្លាប់ស្ត្រីចំណាស់ម្នាក់ក្នុងរឿងទំនាស់ព្រំដី នៅភូមិឃូស្វាយ ឃុំបុសស្បូវ ស្រុកព្រះនេត្រព្រះ កាលពីថ្ងៃទី ២៦ មិថុនា។
លោក ភឿង ម៉ាន់សិង្ហ នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបន្ទាយមានជ័យបានប្រាប់នៅថ្ងៃទី ២៨ មិថុនាថា ជនសង្ស័យឈ្មោះ ចយ សឺន ភេទប្រុស អាយុ ៦៩ ឆ្នាំ។ ចំណែកស្ត្រីរងគ្រោះឈ្មោះ សួ សួង ភេទស្រី អាយុ ៧៤ ឆ្នាំ។ ពួកគេរស់នៅក្នុងភូមិឃូស្វាយ ឃុំបុសស្បូវ ស្រុកព្រះនេត្រព្រះ ខេត្តបន្ទាយមានជ័យ។
លោកថា៖ «ជនសង្ស័យពិតជាបានបង្កបទល្មើសជាក់ស្តែង។ ប៉ុន្តែជានីតិវិធី គឺតុលាការនឹងបន្តសាកសួរតាមផ្លូវ [ច្បាប់] ទៀត»។
ករណីនេះដែរ លោក មាស ឫទ្ធី អធិការនគរបាលស្រុកព្រះនេត្រព្រះឱ្យដឹងនៅថ្ងៃទី ២៨ មិថុនា ថា ភ្លាមៗ បន្ទាប់ពីកើតហេតុកាលពីថ្ងៃទី ២៦ មិថុនានោះ លោក សិទ្ធ ឡោះ ស្នងការនគរបាលខេត្តបន្ទាយមានជ័យ និងព្រះរាជអាជ្ញាបានបញ្ជាឱ្យលោកដាក់កម្លាំងតាមគោលដៅធ្វើយ៉ាងណាតាមចាប់ជនសង្ស័យឱ្យបាន។ លុះនៅវេលាម៉ោងប្រហែល ៦ ល្ងាចថ្ងៃទី ២៧ មិថុនា ស្រាប់តែ ជនសង្ស័យលបចេញពីក្នុងព្រៃក្បែរភូមិបំណងចូលផ្ទះរបស់គាត់ក៏ត្រូវសមត្ថកិច្ចរបស់លោកព័ទ្ធចាប់បានតែម្តង។
លោកប្រាប់តាមសម្តីរបស់ជនសង្ស័យថា៖ «គាត់ពិតជាបានសម្លាប់ស្ត្រីរងគ្រោះពិតប្រាកដមែន ព្រោះគាត់មានគំនុំជាមួយជនរងគ្រោះពាក់ព័ន្ធនឹងបញ្ហាព្រំដី។ គាត់យកខ្នងពូថៅវាយក្បាលស្ត្រីរងគ្រោះ»។
លោក ធឿន សុខា នាយរងនគរបាលប៉ុស្តិ៍ ឃុំបុសស្បូវប្រាប់ភ្នំពេញប៉ុស្តិ៍តាមសម្តីសាច់ញាតិស្ត្រីរងគ្រោះនៅថ្ងៃទី ២៨ មិថុនាថា រវាងផ្ទះស្ត្រីរងគ្រោះ និងផ្ទះរបស់ជនសង្ស័យនៅឆ្ងាយពីគ្នា។ ប៉ុន្តែស្ថិតក្នុងភូមិឃូស្វាយជាមួយគ្នា។ ចំពោះទំនាស់ដែលនាំឱ្យមានការសម្លាប់នេះ គឺដោយហេតុថា ស្ត្រីរងគ្រោះមានក្មួយស្រីម្នាក់មានព្រំដីនៅជាប់នឹងដីរបស់ជនសង្ស័យដែរ។ ប៉ុន្តែស្ត្រីរងគ្រោះជាអ្នកគ្រប់គ្រងដីនោះក្រោយពីក្មួយស្រីបង្កើតរបស់ជនរងគ្រោះបានស្លាប់ទាំងប្តីប្រពន្ធចោលដីគ្មានអ្នកគ្រប់គ្រង។
លោកបន្តថា រឿងទំនាស់ព្រំដីនេះបានកើតឡើងពីការធ្វើរបងចូលដីគ្នា ប៉ុន្តែត្រូវបានអាជ្ញាធរឃុំហៅភាគីទាំងសងខាងទៅសម្រុះសម្រួលគ្នានៅសាលាឃុំបុសស្បូវ រួចរាល់អស់ហើយ។ ប៉ុន្តែប្រហែលជាការដោះស្រាយនោះមិនសមបំណងរបស់ជនសង្ស័យ ទើបកើតជារឿងគំនុំ។ លុះដល់ថ្ងៃទី ២៦ មិថុនា ខណៈស្ត្រីរងគ្រោះកំពុងដេកលើកម្រាលឥដ្ឋយោលអង្រឹងចៅប្រុសរបស់គាត់អាយុ ៨ ឆ្នាំស្រាប់តែជនសង្ស័យលបចូលក្នុងបន្ទប់ជាន់ផ្ទាល់ដីវាយស្ត្រីរងគ្រោះនឹងខ្នងពូថៅចំក្បាលពីក្រោយ និងចំផ្ទៃមុខរហូតស្លាប់នៅកន្លែងកើតហេតុ។
លោកថា ពេលនោះចៅរបស់ស្ត្រីរងគ្រោះឃើញជនសង្ស័យវាយសម្លាប់យាយរបស់ខ្លួន ក៏ចុះពីអង្រឹងរត់ទៅពួនក្នុងទូដាក់ខោអាវ រហូតទាល់តែជនសង្ស័យចេញពីកន្លែងកើតហេតុ ទើបបានចៅរបស់ស្ត្រីរងគ្រោះចេញក្រៅផ្ទះប្រាប់អ្នកជិតខាងហើយប្រជាពលរដ្ឋបានរាយការណ៍បន្តប្រាប់សមត្ថកិច្ចរបស់លោកតែម្តង។
លោកប្រាប់ថា៖ «សមត្ថកិច្ចខ្ញុំបានសាកសួរក្មេងប្រុសម្នាក់នោះ ហើយគេបាននិយាយប្រាប់ថា គេឃើញតាម្នាក់ឈ្មោះ សឺន ជាអ្នកវាយយាយរបស់គេ។ ដោយសារបានតម្រុយពីក្មេងនេះហើយទើបយើងចាប់បានជនសង្ស័យ»។
លោកបញ្ជាក់ថា ជនសង្ស័យបានសារភាពប្រាប់សមត្ថកិច្ចថា រូបគេពិតជាបានសម្លាប់ស្ត្រីរងគ្រោះប្រាកដមែន ព្រោះរឿងទំនាស់ព្រំដី។ ប៉ុន្តែគាត់បានយកខ្នងពូថៅវាយក្បាល និងផ្ទៃមុខជនរងគ្រោះ តែគាត់មិនបានកាប់ទេ៕
