បាត់ដំបងៈ បុរស ២ នាក់បានឆេះស្លាប់នៅក្នុងភ្នក់ភ្លើង បន្ទាប់ពីមានឧបទ្ទវហេតុគ្រោះថ្នាក់ចរាចរណ៍ម៉ូតូ ២ គ្រឿង បុកគ្នានៅលើកំណាត់ផ្លូវជាតិលេខ ៥៧ ស្ថិតនៅក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ខេត្តបាត់ដំបង។ នេះបើតាមការអះអាងរបស់សមត្ថកិច្ចនគរបាលជំនាញ។
លោក ប៉ូវ វណ្ណឌី ស្នងការរងទទួលបន្ទុក សណ្ដាប់ធ្នាប់ចរាចរណ៍ផ្លូវគោក ខេត្តបាត់ដំបងបានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ២៨ ខែមិថុនាថា ហេតុការណ៍ដ៏អាក្រក់ និង គួរឱ្យរន្ធត់នេះបានកើតឡើងនៅយប់ថ្ងៃទី ២៦ ខែ មិថុនា ឆ្នាំ ២០២១។ ជនរងគ្រោះនៅក្នុងហេតុការណ៍នេះរួមមានឈ្មោះ ឡាន ហូ អាយុ ៧២ ឆ្នាំ មានទីលំនៅភូមិដំណាក់ហ្លួង សង្កាត់វត្តគរ ក្រុងបាត់ដំបង ខេត្តបាត់ដំបង និង ម្នាក់ទៀតឈ្មោះ សាន់ សឿត អាយុ ៤៥ ឆ្នាំ រស់នៅភូមិចែងមានជ័យ ឃុំចែងមានជ័យ ស្រុកបាណន់ ខេត្តបាត់ដំបង។
លោក វណ្ណឌី បានបញ្ជាក់ថា៖ «តាមការបំភ្លឺរបស់សាក្សីនៅក្បែរកន្លែងកើតហេតុ និងដែលបានឃើញហេតុការណ៍នៃគ្រោះថ្នាក់ចរាចរណ៍ បង្កជាគ្រោះអគ្គិភ័យនេះ គឺផ្ដើមចេញពីជនរងគ្រោះ ឈ្មោះ ឡាន ហូ។ គេឃើញគាត់បើកម៉ូតូ ដឹកសាំងមួយប៊ីដុង ហើយបត់បញ្ច្រាសទិស ឬ គំនូសសញ្ញាចរាចរណ៍ទៅបុកម៉ូតូជាមួយម៉ូតូជនរងគ្រោះម្នាក់ទៀត បណ្ដាលឱ្យដួលបោកសង្កត់លើគ្នា ហើយបែកធ្លាយប៊ីដុងសាំង ហូរទៅលើភ្នក់ភ្លើងសំរាមមួយ ដែលនៅក្បែរចិញ្ចើមផ្លូវនោះ បណ្ដាលឱ្យឆាបឆេះ ជនរងគ្រោះទាំង ២ រហូតដល់ស្លាប់តែម្ដង»។
បើតាមសម្ដីលោក វណ្ណឌី ក្រោយកើតហេតុ សពជនបង្កនិង ជនរងគ្រោះក្នុងគ្រោះថ្នាក់ចរាចរណ៍នេះត្រូវបានសមត្ថកិច្ចប្រគល់ជូនសាច់ញាតិទៅធ្វើបុណ្យតាមប្រពៃណី និងបានសម្រេចបិទសំណុំរឿងមិនចាត់ការស្រាវជ្រាវបន្ថែមទៀតនោះទេ ដោយអះអាងថា ជនបង្ក និងជនរងគ្រោះបានស្លាប់នៅក្នុងហេតុការណ៍នោះទាំងអស់ទៅហើយ។ មន្ត្រីនគរបាលជំនាញ បានចាត់ទុកករណីគ្រោះថ្នាក់ចរាចរណ៍បង្កជាគ្រោះអគ្គិភ័យបណ្ដាលឱ្យស្លាប់មនុស្សនោះ ជាករណីកម្រមួយ៕