.jpg)
ជនសង្ស័យ(ឆ្វេង)និងសកម្មភាពបំផ្លាញដើមកញ្ឆាកាលពីថ្ងៃទី២៧ មិថុនា ។ រូបថត កងរាជអាវុធហត្ថ
ភ្នំពេញៈ តុលាការខេត្តតាកែវសម្រេចចេញដីកាឃុំខ្លួនជនសង្ស័យម្នាក់នៅថ្ងៃទី ២៩ មិថុនា បន្ទាប់ពីចាប់ខ្លួនបាន ២ ថ្ងៃ ពាក់ព័ន្ធករណីលួចដាំដើមកញ្ជាស្រស់បានចំនួន ៣២០ ដើម នៅក្នុងភូមិសាស្ត្រ ឃុំគិរីចុងកោះ ស្រុកគិរីវង់ ខេត្តតាកែវ តែត្រូវបានសមត្ថកិច្ចកងរាជអាវុធហត្ថចុះកាប់បំផ្លាញចោល។
លោក លឹម សុខន អ្នកនាំពាក្យតុលាការខេត្តតាកែវប្រាប់នៅថ្ងៃទី ២៩ មិថុនាថា បុរសរូបនេះឈ្មោះ លា បុល អាយុ ៣៥ ឆ្នាំ ត្រូវបានចៅក្រមស៊ើបសួរសម្រេចចេញដីកាឃុំនៅក្នុងពន្ធនាគារខេត្តនៅព្រឹកថ្ងៃទី ២៩ មិថុនា។ ការឃុំខ្លួននេះ បន្ទាប់ពីកម្លាំងកងរាជអាវុធហត្ថខេត្តតាកែវបញ្ជូនខ្លួនដល់តុលាការកាលពីថ្ងៃទី ២៨ មិថុនា។
លោកមានប្រសាសន៍ថា៖ «ជនត្រូវចោទត្រូវបានលោកស្រីព្រះរាជអាជ្ញារង កែវ គន្ធា ចោទប្រកាន់ពីបទដាំរុក្ខជាតិដែលមានសារធាតុញៀនដែលច្បាប់ហាមឃាត់តាមបញ្ញត្តិមាត្រា៣៨នៃច្បាប់ស្តីពីការត្រួតពិនិត្យគ្រឿងញៀន»។
ពាក់ព័ន្ធនឹងការឃាត់ខ្លួនជនសង្ស័យរូបនេះ លោក ង៉ែត ចន្ធី មេបញ្ជាការរងទទួលការងារយុត្តិធម៌នៃបញ្ជាការដ្ឋានកងរាជអាវុធហត្ថខេត្តតាកែវឱ្យដឹងនៅថ្ងៃទី ២៩ ខែមិថុនាថា ការចុះកម្ទេចដើមកញ្ជានៅទីតាំងដាំនេះ គឺអនុវត្តតាមបញ្ជារបស់លោកឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវនិងមានការសម្របសម្រួលនីតិវិធីផ្លូវច្បាប់ពីលោក ជីវ ចាន់ តារាព្រះរាជអាជ្ញាអមសាលាដំបូងខេត្តតាកែវ ។
លោកបានបន្តថា ការងារនេះដឹកនាំដោយលោក អនុសេនីយ៍ឯក អុល សំអឿន មេបញ្ជាការរងស្រុកគិរីវង់ និងដោយសហការជាមួយកម្លាំងកងរាជអាវុធហត្ថស្រុកគិរីវង់ឃាត់ខ្លួនជនសង្ស័យបានម្នាក់ឈ្មោះ លា បុល អាយុ ៣៥ ឆ្នាំ រស់នៅភូមិចេកឃុំគិរីចុងកោះ ស្រុកគិរីវង់ខេត្តតាកែវ។
បើតាមលោក ចន្ធី៖ «ជនជាប់ពាក់ព័ន្ធបទល្មើសដាំកញ្ជានេះមិនមែនមានតែជនសង្ស័យម្នាក់នេះទេ នៅមានបក្ខពួកជាមេខ្លោងផ្សេងទៀត ប៉ុន្តែយើងស្គាល់អត្តសញ្ញាណាហើយ»។
លោកបញ្ជាក់ប្រាប់ថា ការបង្ក្រាបបទល្មើសនេះកម្លាំងសមត្ថកិច្ចកងរាជអាវុធហត្ថរបស់លោកបានកម្ទេចអាងទឹកសម្រាប់ស្តុកទឹកដាំដើមកញ្ជាបាន ១ កន្លែង នៅចំណុចជួរភ្នំទទឹង ក្នុងភូមិសាស្ត្រ ឃុំគិរីចុងកោះស្រុកគិរីវង់ និងកាប់រំលំបំផ្លាញដើមកញ្ជាស្រស់បានចំនួន ៣២០ ដើម លើផ្ទៃដី ១៨៥ ម៉ែត្រការ៉េ។
ពាក់ព័ន្ធនឹងករណីកញ្ជានេះដែរ កាលពីព្រឹកថ្ងៃទី ២៨ ខែ មិថុនា ឆ្នាំ ២០២១ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានបញ្ជាដល់កម្លាំងជំនាញនគរបាលស្រុកគិរីវង់និងកម្លាំងប៉ុស្តិ៍នគរបាលរដ្ឋបាលឃុំទាំង ១២ ឱ្យឡើងរុករកនិងបានកាប់ដុតបំផ្លាញដំណាំកញ្ឆាបានចំនួន ១១ ទីតាំង នៅចំណុចដុបថ្មចង្ក្រានក្នុងភូមិសាស្ត្រឃុំព្រះបាទជាន់ជុំ ស្រុកគិរីវង់។នេះបើតាមការបង្ហោះលើហ្វេសប៊ុករបស់ស្នងការដ្ឋាននគរបាលខេត្តតាកែវពីថ្ងៃ២៨ ខែមិថុនា ។
ហ្វេសប៊ុកដដែលឱ្យដឹងថា ប្រតិបត្តិនេះសមត្ថកិច្ចបានបំផ្លាញដើមកញ្ជាលើផ្ទៃដីប្រមាណ ២ ៨១៨ ម៉ែត្រការ៉េ អាងស្តុកទឹកសិប្បនិម្មិត ៩ អាង និងកំពុងបន្តស្រាវជ្រាវស្វែងរកជនល្មើសដែលលួចដាំដំណាំកញ្ឆា ដើម្បីយកមកផ្តន្ទាទោសតាមច្បាប់ ៕
