The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​ប្រកាស​បិទ​បញ្ចប់​ យុទ្ធនាការ​ក្រោយ​អនុវត្ដ​ជាង ១ ឆ្នាំ ដោះស្រាយ​សំណុំ​រឿង​កក​ស្ទះ​ចាស់-ថ្មី បាន​ជិត ១​សែន​សំណុំ​រឿង




ក្រសួង​ប្រកាស​បិទ​បញ្ចប់​ យុទ្ធនាការ​ក្រោយ​អនុវត្ដ​ជាង ១ ឆ្នាំ ដោះស្រាយ​សំណុំ​រឿង​កក​ស្ទះ​ចាស់-ថ្មី បាន​ជិត ១​សែន​សំណុំ​រឿង

Content image - Phnom Penh Post
រដ្ឋមន្ត្រីក្រសួងយុត្តិធម៌ កើត រិទ្ធ។

ក្រសួង​ប្រកាស​បិទ​បញ្ចប់​ យុទ្ធនាការ​ក្រោយ​អនុវត្ដ​ជាង ១ ឆ្នាំ ដោះស្រាយ​សំណុំ​រឿង​កក​ស្ទះ​ចាស់-ថ្មី បាន​ជិត ១​សែន​សំណុំ​រឿង

ភ្នំពេញៈ ក្រសួង​យុត្តិធម៌​ថ្ងៃនេះ ប្រកាស​បិទ​បញ្ចប់​យុទ្ធនាការ​ដោះស្រាយ​ការ​កកស្ទះ​សំណុំ​រឿង​នៅ​តាម​សាលា​ដំបូង​រាជធានី​ខេត្ត​ក្រោយ​អនុវត្ដ​រយៈពេល ១ឆ្នាំ ១ខែ គិត​ថ្ងៃ​ទី​១៨ ខែ​ឧសភា​ឆ្នាំ​មុន ដោយ​ដោះស្រាយ​បាន​សំណុំ​រឿង​ព្រហ្មទណ្ឌ​កកស្ទះ​សរុប​ជាង ៣៧ ៩០០ សំណុំរឿង និង​សំណុំ​រឿង​ព្រហ្មទណ្ឌ​ដែល​ចូល​ថ្មី​បាន​ជាង ៦២ ៨០០ សំណុំ​រឿង។

យោង​តាម​សេចក្ដី​ប្រកាស​ព័ត៌មាន​របស់​ក្រសួង​យុត្ដិធម៌​បាន​ឱ្យ​ដឹង​ថា នៅ​ក្នុង​រយៈពេល ១​ឆ្នាំ ១​ខែ គិត​ពី​ថ្ងៃ​ទី​១៨ ខែ​ឧសភា ឆ្នាំ ២០២០ ដែល​ជា​ថ្ងៃ​នៃ​ការ​ប្រកាស​បើក​យុទ្ធនាការ​ដោះស្រាយ​ការ​កក​ស្ទះ​សំណុំ​រឿង​នៅ​តាម​សាលា​ដំបូង​រាជធានី ខេត្ត រហូត​ដល់​ថ្ងៃ​ទី​១៧ ​ខែមិថុនា ឆ្នាំ​២០២១។

តាម​រយៈ​យុទ្ធ​នាការនេះ​សាលា​ដំបូង​រាជធានី ខេត្ត ទូទាំង​ប្រទេស​បាន​ដោះស្រាយ​សំណុំ​រឿង​ព្រហ្មទណ្ឌ​ដែល​កកស្ទះ​ទាំង​ដំណាក់​កាលអយ្យការ​ទាំង​ដំណាក់​កាល​ស៊ើបសួរ និង​ទាំង​ដំណាក់​កាល​ជំនុំ​ជម្រះ​មាន​ចំនួន​សរុប​ជាង ៣៧ ៩០០ រឿង ស្មើ​នឹង ៩៦ % នៃ​សំណុំ​រឿង ព្រហ្មទណ្ឌ​ដែល​កកស្ទះ​សរុប​ជាង ៣៩៥០០ រឿង (សំណុំ​រឿង​ដែល​ត្រូវ​បាន​ជំនុំ​ជម្រះ​រួច​មាន​ចំនួន​ជាង ១២ ៦០០ រឿង ស្មើ​នឹង ៩៧ % នៃ​ចំនួន​សំណុំ​រឿង​សរុប​ជាង ១៣ ០០០ រឿង ក្នុង​ដំណាក់​កាល​ជំនុំ​ជម្រះ)។

ក្រសួង​បាន​ឱ្យ​ដឹង​ថា បន្ថែម​ពី​នេះ សាលា​ដំបូង​រាជធានី ខេត្ត​ទូទាំង​ប្រទេស ​ក៏​បាន​ដោះស្រាយ​សំណុំ​រឿង​ព្រហ្មទណ្ឌ​ដែល​ចូល​ថ្មី បាន​ចំនួនជាង ៦២ ៨០០ រឿង ស្មើ​នឹង​ជាង ៧៨ % នៃ​ចំនួន​សំណុំ​រឿង​ចូល​ថ្មី សរុប​ជាង ៨០ ៤០០ រឿង​ផង​ដែរ។

ក្រសួង​បញ្ជាក់​ថា ផ្អែក​លើ​លទ្ធផល​ដែល​សម្រេច​បាន​នេះ ជាមួយ​នឹង​ការ​ខិតខំ ប្រឹងប្រែង​របស់​សាលា​ដំបូង និង​អយ្យការអម​សាលា​ដំបូងរាជធានី ខេត្ត ប្រកប​ដោយ​ឆន្ទៈ និង​ការ​ទទួល​ខុស​ត្រូវ​ខ្ពស់ និង​ដោយ​មាន​ការ​គាំទ្រ​ពី​គ្រប់​តួ​អង្គ​ពាក់ព័ន្ធ​ទាំង​អស់ បើ​ទោះបី​ជា​កម្ពុជា បាននិង​កំពុង​ស្ថិត​ក្នុង​កាលៈទេសៈ​ដ៏​លំបាក​នៃ​ការ​ប្រយុទ្ធ​និង​ទប់​ស្កាត់​ការ​ឆ្លង​រាលដាល​ជំងឺ​កូវីដ​១៩ នៅ​ក្នុង​ព្រឹត្តិការណ៍ សហគមន៍ ២០ កុម្ភៈ ២០២១ ក៏​ដោយ ក៏​សាលា​ដំបូង​រាជធានី​ខេត្ត​ចំនួន ២២ ក្នុង​ចំណោម​សាលា​ដំបូង​សរុប​ទាំងអស់​ចំនួន ២៤ បាន​ប្រកាស​ជា​បន្ត​បន្ទាប់​នូវ ជោគជ័យ​របស់​ខ្លួន​ក្នុង​ការ​អនុវត្ត​យុទ្ធនាការ។

ទន្ទឹមនេះ សាលា​ដំបូង​ចំនួន ២ ទៀត គឺ​សាលា​ដំបូង​រាជធានី​ភ្នំពេញ និង​សាលា​ដំបូង​ខេត្ត​ព្រះសីហនុ ដែល​ជា​សាលា​ដំបូង​មាន​សំណុំ​រឿងច្រើន​ជាង​គេ និង​មាន​ទីតាំង​ស្ថិត​នៅ​ក្នុង​តំបន់​បិទ​ខ្ទប់ ដោយសារ​ផល​ប៉ះពាល់​នៃ​ការ​ឆ្លង​រាលដាល​នៃ​ជំងឺ​កូវីដ១៩ មិន​ទាន់​អាច​សម្រេច​គោលដៅ និង​ប្រកាស​អំពី​ជោគ​ជ័យ​នៃ​ការ​អនុវត្ត​យុទ្ធនាការ​នេះ​នៅ​ឡើយ​ទេ។

យោង​តាម​ផែន​ការ​ការងារ និង​ថវិកា​រយៈពេល ១ឆ្នាំ សម្រាប់​អនុវត្ត​យុទ្ធនាការ​នេះ និង​បន្ទាប់​ពី​បាន​ប្រជុំ​ពិភាក្សា​ជាមួយ​សាលា​ដំបូង​នៅ​ទូទាំង​ប្រទេស​រួច​មក ក្រសួង​យុត្តិធម៌​សម្រេច​ប្រកាស​បិទ​បញ្ចប់ យុទ្ធនាការ​ដោះស្រាយ​ការ​កកស្ទះ​សំណុំ​រឿង​នៅ​តាម​សាលា​ដំបូង​រាជធានី ខេត្ត និង​រំសាយ​គណៈកម្មការ​ដឹកនាំ​យុទ្ធនាការ​ដោះស្រាយ​ការ​កក​ស្ទះ​សំណុំ​រឿង​នៅ​តាម​សាលា​ដំបូង​រាជធានី ខេត្ត (គយកស) ដើម្បី​បង្កលក្ខណៈឱ្យ​ក្រុម​ការងារ យុទ្ធនាការ​ដែល​បាន​ចុះ​ធ្វើ​ការងារ​ជាប់​ជា​ប្រចាំ​ជាមួយ​សាលា​ដំបូង​កន្លង​មក អាច​ប្រមូល​ផ្ដុំ​ការ​យក​ចិត្ត​ទុក​ដាក់​លើការងារ អាទិភាព​ផ្សេង​ទៀត​របស់​ក្រសួង​យុត្តិធម៌។

ជាមួយគ្នានេះ គ.យ.ក.ស ក៏​មាន​សង្ឃឹម​ជឿ​ជាក់​ថា សាលា​ដំបូង​រាជធានី ភ្នំពេញ និង​សាលា​ដំបូង​ខេត្ត​ព្រះសីហនុ នឹង​បន្ត​ខិត​ខំ​ដោះស្រាយ​សំណុំ​រឿង​នៅ​ក្នុង​សមត្ថកិច្ច​របស់​ខ្លួន​ឱ្យ​បាន​ច្រើន​បន្ថែម ទៀត ស្រប​តាម​គោលការណ៍​អនុវត្ត​ដែល​មាន​នៅ​ក្នុង​យុទ្ធនាការ​កន្លង​មក ហើយ​ឈាន​ទៅ​ប្រកាស​ជោគ​ជ័យ​នា​ពេល​ដ៏​ខ្លី​ខាង​មុខ​នេះ៕

អត្ថបទគួរចាប់អារម្មណ៍