.jpg)
សមត្ថកិច្ចកំពុងអូសម៉ូតូចេញពីផ្ទះត្រូវភ្លើងឆេះពីម្សិលមិញ។ ហេង ជីវ័ន
ភ្នំពេញៈ មានមនុស្ស ៤ នាក់បានស្លាប់ និងម្នាក់ទៀតរងរបួសក្នុងគ្រោះអគ្គិភ័យមួយកាលពីវេលាម៉ោង ៤:២០ នាទីព្រឹកថ្ងៃទី ២៩ ខែមិថុនា ឆ្នាំ ២០២១ ស្ថិតនៅតាមបណ្ដោយផ្លូវ ២០០ ក្នុងសង្កាត់បឹងរាំង ខណ្ឌដូនពេញ។
លោក ព្រំ យ៉ន នាយការិយាល័យបង្ការពន្លត់អគ្គិភ័យ និង សង្គ្រោះនៃស្នងការដ្ឋាននគរបាលរាជធានីភ្នំពេញថ្លែងថា ទីតាំងដែលឆេះនោះគឺជាអគារផ្ទះល្វែងកម្ពស់ ៣ ជាន់ដែលជាហាង ឬសិប្បកម្មផលិតសាច់ប៉ាតេ។ ក្រោយប្រតិបត្តិការពន្លត់អគ្គិភ័យត្រូវបានបញ្ចប់ ក្រុមសមត្ថកិច្ចបានរុករកឃើញសពជនរងគ្រោះចំនួន ៤ នាក់។ លោកថា៖ «ក្រុមការងារយើង នៅមិនទាន់បានដឹងអំពីមូលហេតុដែលនាំឱ្យកើតមានគ្រោះអគ្គិភ័យដ៏អាក្រក់នេះនៅឡើយទេ»។
ក្រៅពីបង្កឱ្យមនុស្សចំនួន ៤ នាក់ស្លាប់ គ្រោះអគ្គិភ័យនេះក៏បានបង្កការខូចខាតទាំងស្រុងនូវសំណង់អគារផ្ទះជាន់ផ្ទាល់ដី ទំហំ ៩ ម៉ែត្រគុណ ៣០ ម៉ែត្រ និង សម្ភារក្នុងផ្ទះមួយចំនួនទៀត ព្រមទាំងមធ្យោបាយដឹកជញ្ជូន ដែលរួមមានរថយន្ត Ford Ranger Wildtrak១ គ្រឿងរថយន្ត Lexus ៣៣០ ពណ៌ស ១ គ្រឿង និងម៉ូតូសរុបចំនួន ៧ គ្រឿង ប៉ុន្តែមិនបង្កឱ្យឆេះរាលដាលដល់ផ្ទះអ្នកជិតខាងឡើយ។
លោកបន្តថា ក្នុងប្រតិបត្តិការពន្លត់អគ្គិភ័យនេះ មានមន្ត្រីកងពន្លត់អគ្គិភ័យម្នាក់ ឈ្មោះ ម៉ូច សីហា អាយុ ២៤ ឆ្នាំបានរងរបួសស្រាល។ សមត្ថកិច្ចបានប្រើពេលជាង ១ ម៉ោងទើបអាចពន្លត់អគ្គិភ័យនោះបានសម្រេច ដោយបានប្រើប្រាស់រថយន្តពន្លត់អគ្គិភ័យសរុប ៣៩ គ្រឿង និងប្រើប្រាស់ទឹកអស់ ១៦៤ ម៉ែត្រគុប។
លោក ប៊ុន ប្រុស នាយនគរបាលប៉ុស្តិ៍បឹងរាំង ប្រាប់ភ្នំពេញប៉ុស្តិ៍ថា នៅពេលនេះសមត្ថកិច្ចបានកំណត់អត្តសញ្ញាណរបស់ជនរងគ្រោះទាំង ៤ នាក់ ដែលបានស្លាប់នៅក្នុងហេតុការណ៍គ្រោះអគ្គិភ័យនោះហើយ ដែលជនរងគ្រោះទាំងអស់ គឺជាបុរស និង ជាកម្មករធ្វើការឱ្យសិប្បកម្មនេះ។
ជនរងគ្រោះទាំងនោះមាន ៣ នាក់មានលំនៅភូមិតាអុង ឃុំពាមឧកញ៉ាអុង ស្រុកល្វាឯម ខេត្តកណ្តាល រួមមានឈ្មោះ ខុន ដាវី អាយុ ១៩ ឆ្នាំ, ខុន ដាវីត អាយុ ១៨ ឆ្នាំអ្នកទាំង ២ ជាបងប្អូនបង្កើតនឹងគ្នា និងម្នាក់ទៀតឈ្មោះ សម្បត្តិ បញ្ញា អាយុ ១៨ ឆ្នាំ។ ចំណែកជនរងគ្រោះម្នាក់ទៀតត្រូវបានសាច់ញាតិបញ្ជាក់អត្តសញ្ញាណត្រឹមឈ្មោះហៅក្រៅថា លី អាយុ ១៨ ឆ្នាំមានលំនៅឃុំកំពង់ត្រាំង ស្រុកពារាំង ខេត្តព្រៃវែង។
លោក ប៊ុន ប្រុស បញ្ជាក់ថា៖ «នៅពេលនេះ សពជនរងគ្រោះទាំង ៤ ត្រូវបានសមត្ថកិច្ចជំនាញនាំយកទៅធ្វើកោសល្យវិច័យ។ ចំណែកមូលហេតុនៃការឆេះ នៅមិនទាន់អាចកំណត់បាននៅឡើយទេហើយនគរបាលជំនាញកំពុងបន្តនីតិវិធីស៊ើបអង្កេតរកការពិត»។
លោក ហុក ពេជ្រហោះ ម្ចាស់ទីតាំងសិប្បកម្មផលិតសាច់ប៉ាតេ មិនអាចទាក់ទងសុំការបំភ្លឺបានទេ ចំណែកសាច់ញាតិជនរងគ្រោះ ក៏មិនអាចស្នើសុំការបំភ្លឺបានដែរពីម្សិលមិញ។ ទោះបីបែបណា លោក ហុក ពេជ្រហឿន ដែលជាបងប្រុសបង្កើតលោក ពេជ្រហោះ បានប្រាប់ ភ្នំពេញ ប៉ុស្តិ៍ថា នៅពេលនេះ លោក និងប្អូនប្រុសរបស់លោកកំពុងសហការផ្ដល់ចម្លើយដល់សមត្ថកិច្ច និងកំពុងពិភាក្សាការផ្ដល់សំណងដល់គ្រួសារជនរងគ្រោះ។
លោកបញ្ជាក់ថា៖ «ខ្ញុំមិនស្ថិតក្នុងហេតុការណ៍នោះទេ ដូច្នេះខ្ញុំមិនដឹងថា តើអគ្គិភ័យនោះផ្ដើមចេញពីអ្វីនោះទេ។ ឥឡូវនេះខ្ញុំក៏កំពុងរង់ចាំលទ្ធផលពីមន្ត្រីជំនាញដែលកំពុងស្រាវជ្រាវលើករណីនេះដែរ»។
ការស្លាប់របស់ជនរងគ្រោះទាំង ៤ នាក់ខាងលើនេះបានធ្វើឱ្យចំនួនជនរងគ្រោះដែលបានស្លាប់ក្នុងឧបទ្ទវហេតុភ្លើងឆេះផ្ទះក្នុងឆ្នាំ ២០២១ គិតត្រឹមថ្ងៃទី ២៩ ខែមិថុនានេះ បានកើនឡើងដល់ ១៤ នាក់ និងរបួសកើនឡើងដល់ ៣១ នាក់។ នេះបើតាមលោក នេត វន្ថា ប្រធាននាយកដ្ឋានបង្ការ ពន្លត់អគ្គិភ័យ និងសង្គ្រោះនៃក្រសួងមហាផ្ទៃ។
លោកថ្លែងថា យោងតាមរបាយការណ៍ឆមាសទី ១ ឆ្នាំ ២០២១ ដែលគិតត្រឹមថ្ងៃទី ២០ ខែមិថុនាគ្រោះអគ្គិភ័យបានកើតឡើងនៅទូទាំងប្រទេសសរុបចំនួន ៤០៥១ លើកបានបង្កឱ្យមនុស្ស ១០ នាក់ស្លាប់ និង ៣០ នាក់ទៀតរងរបួសព្រមទាំងបានឆេះខូចខាតផ្ទះប្រជាពលរដ្ឋសរុបចំនួន ៣២៣ ខ្នង និងតូបលក់ដូរសរុប ៨៥ តូប។
លោកបញ្ជាក់ថា៖ «យោងតាមទិន្នន័យដែលនាយកដ្ឋានរបស់យើងទទួលបាន រាជធានីភ្នំពេញមានគ្រោះអគ្គិភ័យកើតឡើងច្រើនជាងគេ បន្ទាប់មកគឺខេត្តកណ្ដាល ស្ទឹងត្រែង បាត់ដំបង កំពង់ធំ និងខេត្តព្រះសីហនុ។ ចំណែកខេត្តមានគ្រោះអគ្គិភ័យកើតឡើងតិចជាងគេបំផុតនោះគឺខេត្តសៀមរាប និងខេត្តកែប»។
យោងតាមការសិក្សាស្រាវជ្រាវគ្រោះអគ្គិភ័យដែលបានកើតឡើងភាគច្រើនបណ្ដាល មកពីផ្ទុះឆ្លងចរន្តអគ្គិសនី ៣៩,៥៦ % ការប្រើភ្លើង (អុស, ធ្យូង, ចង្ក្រានហ្គាស និងធូប ទៀន) សរុប ៣៧,៣១ % និង ២៣,១៣% ទៀត នៅមិនទាន់ដឹងពីមូលហេតុច្បាស់លាស់៕
