ឧត្តរមានជ័យៈ ឈើធ្នង់ ដែលជាប្រភេទឈើកម្រប្រមាណជាង ១០ ដើម ដែលមានទំហំមុខកាត់ ៣០ សង់ទីម៉ែត្រ នៅក្នុងតំបន់ដែនជម្រកសត្វព្រៃសង្ឃរុក្ខវន្ត ស្ថិតនៅក្នុងស្រុកអន្លង់វែង ខេត្តឧត្តរមានជ័យ ត្រូវបានគេលួចកាប់ និងជញ្ជូនចេញពីព្រៃនៅក្នុងខែមិថុនា និងឈើប្រមាណជាង ៤០ ដើមត្រូវបានគេលួចកាប់នៅក្នុងខែឧសភា ដោយការកាប់ទាំងនេះកើតឡើងនៅចន្លោះពេលនៃការដើរល្បាតនៅក្នុងតំបន់អភិរក្ស។
លោក ប៊ុន សាលួត ប្រធានសហព័ន្ធសហភាពសហគមន៍ដែនជម្រកសត្វព្រៃសង្ឃរុក្ខវន្ត ប្រាប់ភ្នំពេញប៉ុស្តិ៍នៅថ្ងៃទី ២៩ ខែ មិថុនា ឆ្នាំ ២០២១ នេះ ថា បច្ចុប្បន្ននេះ ក្រុមការងារសហព័ន្ធ និងមន្ត្រីនៃឧទ្យានុរក្ស ដែលការពារតំបន់អភិរក្សនេះបានកំពុងស្រាវជ្រាវរកមុខជនសង្ស័យដែលបានបំពានច្បាប់។
លោក ប៊ុន សាលួត បានថ្លែងដោយបានដាក់ការសង្ស័យបឋមទៅលើប្រជាពលរដ្ឋដែលរស់នៅជុំវិញដែនជម្រកសត្វព្រៃរុក្ខវន្ត ព្រោះធ្លាប់មានប្រជាពលរដ្ឋមួយចំនួនបានលួចចូលទៅមកកាប់ឈើនៅក្នុងតំបន់ហាមឃាត់នេះ។
លោក សាលួត ថ្លែងថា៖ «យើងសង្ស័យ តែជនដដែលៗ គឺប្រជាពលរដ្ឋរស់នៅជុំវិញព្រៃនេះ។ ខ្ញុំកំពុងធ្វើផែនការថ្មី ខ្ញុំស្នើសុំ មន្ត្រីទាហានចំនួន ៥ នាក់ទៀតឱ្យមកជួយការពារ និងដាក់តាមគោលដៅ។ បើមិនដូច្នោះទេ វាអស់ឈើពីព្រៃ»។
លោក ប៊ុន សាលួត បានអះអាងថា អ្នកដែលចូលទៅកាប់ឈើនេះ សុទ្ធតែជាអ្នកប្រើប្រាស់គ្រឿងញៀន ព្រោះនៅកន្លែងឈើដែលត្រូវបានគេកាប់នេះបន្សល់ទុកសុទ្ធគ្រឿងញៀន។
លោកថ្លែងថា៖ «បើសិន មានព្រះសង្ឃ ឬអ្នកការពារមានចំនួនតិចនឹងមិនរួចខ្លួនពីពួកវានោះទេ (អាចគ្រោះថ្នាក់ដោយសារពួកវា)»។
លោក ប៊ុន សាលួត ថ្លែងថា នៅក្នុងដែនជម្រកសត្វព្រៃសង្ឃរុក្ខវន្តនេះមានឈើធ្នង់ច្រើន បើធៀបទៅនឹងតំបន់ផ្សេងទៀត នៅក្នុងប្រទេសកម្ពុជា ហើយតំបន់នេះជាតំបន់ដែលទទួលបានពានរង្វាន់នៅលើពិភពលោក និងជាតំណាងឱ្យពិភពលោក ដូច្នេះត្រូវតែមានការចូលរួមការការពារពីគ្រប់មជ្ឈដ្ឋាន បើមិនចង់ឱ្យបាត់បង់។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យបានឱ្យដឹងថា មន្ត្រីបរិស្ថានក្នុងមូលដ្ឋានកំពុងតែធ្វើការស្រាវជ្រាវស្វែងរកជនល្មើស។
លោក ភួង លីណា ថ្លែងថា ការលួចកាប់ឈើធ្នង់នៅក្នុងតំបន់ហាមឃាត់នេះក្រុមជនល្មើសបានប្រើប្រាស់មធ្យោបាយថ្មីដោយប្រើរណារដៃកាត់ផ្ដួលរំលំ និងកាត់ជាកង់សម្រាប់ដាក់ស្ពាយនៅលើខ្នងមនុស្ស ដែលពីមុនពួកគេប្រើរណារយន្ត និងមធ្យោបាយដឹកជញ្ជូនដោយគោយន្តដែលបង្កឱ្យមានសំឡេងអាចឮដល់ក្រុមល្បាត។
លោក ភួង លីណា ថ្លែងថា៖ «ព្រៃរុក្ខវន្តនេះ យើងបានអភិរក្សបានល្អ ដែលមានឈើប្រណីត និងប្រភេទឈើលេខ ១ នៅសល់ វាមិនច្រើនទេ ប៉ុន្តែ បើធៀបជាមួយនឹងតំបន់ផ្សេងនៅទូទាំងប្រទេស គឺនៅតំបន់នេះ ហើយដែលនៅសល់ច្រើនជាងគេ។ ប៉ុន្តែខ្ញុំក៏នៅតែបារម្ភការលួចចូលទៅកាប់នៅតែបន្តកើតមាន ដោយសារកម្លាំងចុះល្បាតមានមិនគ្រប់គ្រាន់»៕