ភ្នំពេញៈ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព (NPMEC) កំពុងបំពាក់បំប៉នជំនាញបន្ថែមដល់កងកម្លាំងមួកខៀវរបស់កម្ពុជាលើបច្ចេកទេសចាក់ និងរក្សាទុកវ៉ាក់សាំងការពារមេរោគកូវីដ ១៩ និងការតាមដានស្ថានភាពក្រោយការចាក់វ៉ាក់សាំង ដើម្បីចាក់ជូនដល់កម្លាំងរក្សាសន្ដិភាព និងប្រជាពលរដ្ឋនៅក្នុងប្រទេសគោលដៅនៃបេសកកម្ម។ នេះបើតាមមន្ត្រីនាំពាក្យមជ្ឈមណ្ឌលនេះកាលពីថ្ងៃទី ២៨ មិថុនា។
លោកស្រី កុសល ម៉ាលីនដា មន្ត្រីនាំពាក្យ NPMEC ប្រាប់ភ្នំពេញ-ប៉ុស្ដិ៍ថា បច្ចុប្បន្ន កងកម្លាំងមួកខៀវរបស់កម្ពុជា ដែលកំពុងបំពេញបេសកកម្មរក្សាសន្តិភាពនៅតាមបណ្តាប្រទេសនានា ដែលអង្គការសហប្រជាជាតិ (UN) បានស្នើសុំនោះ គឺបានចូលរួមចាក់វ៉ាក់សាំងគ្រប់គ្នារួចហើយ។
ពួកគេក៏បានចូលរួមបេសកកម្មចាក់វ៉ាក់សាំងដល់កម្លាំងផ្សេងទៀតឈរជើងនៅតំបន់ដែលកម្លាំងរបស់កម្ពុជាកំពុងបំពេញបេសកកម្មផងដែរ។ តាមការជូនដំណឹងបឋមរបស់ UN កម្ពុជាគ្រោងប្ដូរវេនកងកម្លាំងមួកខៀវទៅប្រទេសម៉ាលីនាខែកញ្ញាខាងមុខ។ បើសិនជាមិនមានករណីប្រែប្រួលទេ គឺរក្សាការប្ដូរវេននៅពេលនេះដដែល ព្រោះគ្រប់រយៈពេល ១ ឆ្នាំល្មមសម្រាប់កងកម្លាំងដែលបានចេញទៅបំពេញបេសកកម្មកាលពីខែកញ្ញា ឆ្នាំ ២០២០។
លោកស្រីថ្លែងថា៖ «សម្រាប់ប្រទេសម៉ាលីយើងមានកងកម្លាំង ២ ក្រុមសរុបទៅមានកងកម្លាំងចំនួន ២៩៨ នាក់ ដែលយើងត្រូវប្ដូរវេននៅខែកញ្ញាខាងមុខ»។
លោកស្រីបញ្ជាក់ថាគ្រប់កងកម្លាំងមួកខៀវដែលបានចូលរួមបេសកកម្មស្ថិតនៅក្រោមឆត្ររបស់អង្គការសហប្រជាជាតិ គឺតម្រូវឱ្យចាក់វ៉ាក់សាំងការពារមេរោគកូវីដ ១៩ គ្រប់គ្នាទាំងអស់មុននឹងធ្វើដំណើរបេសកកម្ម។ លោកស្រី ម៉ាលីនដា ថ្លែងថា ទាក់ទងនឹងកងកម្លាំងមួកខៀវរបស់កម្ពុជា ក្នុងការត្រៀមប្ដូរវេនទៅចូលរួមបេសកកម្មរក្សាសន្ដិភាព គឺ NPMEC បានបណ្ដុះបណ្ដាលបន្ថែមទៀតលើការចាក់វ៉ាក់សាំង និងការរក្សាទុកវ៉ាក់សាំង ព្រោះជាតម្រូវការនៃរបត់ថ្មី ដើម្បីឆ្លើយតបទៅនឹងការរីករាលដាលនៃជំងឺកូវីដ ១៩។
លោកស្រីបន្តថា ការចូលរួមរបស់កងកម្លាំងកម្ពុជាក្នុងយុទ្ធនាការចាក់វ៉ាក់សាំងជូនប្រជាពលរដ្ឋ គឺដើម្បីដកបទពិសោធបន្ថែមនៅពេលដែលប្ដូរវេនក្នុងបេសកកម្មនាពេលខាងមុខ។ ការអនុវត្ដការចាក់វ៉ាក់សាំងនេះ កងកម្លាំងទទួលបានជំនាញបន្ថែមក្នុងការរក្សាទុកវ៉ាក់សាំង ការចាក់វ៉ាក់សាំង សម្រាប់ត្រៀមនៅពេលដែលអង្គការសហប្រជាជាតិស្នើឱ្យកងកម្លាំងចាក់ជូនប្រជាពលរដ្ឋ។
បើតាមលោកស្រី ម៉ាលីនដា បច្ចុប្បន្ន កងកម្លាំងមួកខៀវរបស់កម្ពុជា ដែលឈរជើងអនុវត្ដបេសកកម្មនៅប្រទេសម៉ាលី មិនត្រឹមតែបានចាក់វ៉ាក់សាំងដល់កងកម្លាំងកម្ពុជាខ្លួនឯងប៉ុណ្ណោះទេ ប៉ុន្ដែក៏បានចាក់ជូនដល់កងកម្លាំងប្រទេសផ្សេងទៀតដែលឈរជើងនៅតំបន់នោះតាមការស្នើសុំរបស់ អង្គការសហប្រជាជាតិ។
លោកស្រីបញ្ជាក់ថា៖ «គេផ្ដល់ថ្នាំមកខាងយើង ហើយការរក្សាទុកដាក់វ៉ាក់សាំងនេះ ខាងក្រុមការងារអង្គការសហប្រជាជាតិបានបង្រៀនដល់កងកម្លាំងយើងរួចហើយដែរ។ ដូច្នេះយើងសិក្សារៀនសូត្រពីគាត់ហើយ យើងចាក់ជូនកងកម្លាំងយើងផង និងចាក់ជូនដល់កងកម្លាំងប្រទេសផ្សេងទៀតផង ដែលឈរជើងនៅក្បែរទីតាំងបេសកកម្ម»។
លោកស្រីបានបន្តថា៖ «អង្គការសហប្រជាជាតិបានស្នើឱ្យយើងបង្កើនចំណេះ ជំនាញផ្នែកនេះ (ការចាក់ និងរក្សាទុកវ៉ាក់សាំងការពារមេរោគកូវីដ ១៩) ហើយនៅពេលដែលយើងចូលរួមបេសកកម្ម គឺយើងចេះរក្សាទុក ចេះចាក់វ៉ាក់សាំង និងចេះអង្កេតមើលពីស្ថានភាពអ្នកដែលបានចាក់រួចហើយនោះមានការប្រែប្រួលយ៉ាងណាខ្លះជាដើម»។
លោក សែម សុវណ្ណនី អគ្គនាយក NPMEC បានថ្លែងកាលពីថ្ងៃទី ២៦ ខែមិថុនា ថា ក្រុមពេទ្យយោធាមួយចំនួនដែលកំពុងស្ម័គ្រចិត្តចុះយុទ្ធនាការចាក់វ៉ាក់សាំងការពារជំងឺកូវីដ ១៩ ជូនបណ្តាពលរដ្ឋទូទៅនៅក្នុងស្រុក អាចនឹងត្រូវបានស្នើសុំការស្ម័គ្រចិត្តបញ្ជូនចូលរួមបំពេញបេសកកម្មថែរក្សាសន្តិភាពអង្គការសហប្រជាជាតិលើការងារចាក់វ៉ាក់សាំងកូវីដ ១៩ ជូនកងកម្លាំងមួកខៀវ និងពលរដ្ឋស៊ីវិលនៅតាមប្រទេសគោលដៅ។
លោកថ្លែងថា លោកនឹងស្នើប្រមុខថ្នាក់ដឹកនាំក្រសួងការពារជាតិ សុំរៀបចំក្រុមពេទ្យយោធាមួយចំនួនដែលកំពុងអនុវត្តផ្ទាល់ចាក់វ៉ាក់សាំងការពារកូវីដ ១៩ ជូនពលរដ្ឋនៅក្នុងប្រទេសកម្ពុជាឱ្យចូលរួមបំពេញបេសកកម្មសកម្មភាពមនុស្សធម៌ចាក់វ៉ាក់សាំងការពារកូវីដ ១៩ នៅក្រៅប្រទេស។
បើតាមលោកស្រី ម៉ាលីនដា បច្ចុប្បន្ន ទ័ពមួកខៀវរបស់កម្ពុជាប្រមាណ ៧៨៧ នាក់កំពុងឈរជើងបំពេញបេសកកម្មរក្សាសន្តិភាពនៅតាមបណ្តាប្រទេសចំនួន ៥ រួមមាន ប្រទេសស៊ូដង់ ស៊ូដង់ខាងត្បូង ប្រទេសលីបង់ សាធារណរដ្ឋអាហ្វ្រិកកណ្តាល និងប្រទេសម៉ាលី៕