.jpg)
ប្រជាពលរដ្ឋទទួលជំនួយជាស្បៀងអាហារពី WFP នៅខេត្តកំពង់ធំ កាលពីថ្ងៃទី ៣០ មិថុនា។ រូបថត WFP
ភ្នំពេញៈ កម្មវិធីស្បៀងអាហារពិភពលោក (WFP) សហការជាមួយក្រសួងអប់រំ យុវជន និងកីឡា ផ្តល់ស្បៀងដល់ប្រជាពលរដ្ឋចំនួន ២០ ម៉ឺននាក់ ដែលជាគ្រួសារក្រីក្រ ងាយរងគ្រោះ (IDPoor) និងមានកូនចុះឈ្មោះចូលរៀននៅតាមសាលា ដោយមានការគាំទ្រពីកម្មវិធីផ្ដល់ស្បៀងអាហារតាមសាលារៀនក្នុងខេត្តគោលដៅចំនួន ៥ ខេត្ដ។ នេះបើតាមសេចក្ដីប្រកាសព័ត៌មានពីម្សិលមិញ។
សេចក្តីប្រកាសព័ត៌មានរបស់កម្មវិធីស្បៀងអាហារពិភពលោកបានឱ្យដឹងថា ថ្ងៃទី ២៩ ខែមិថុនា កម្មវិធីស្បៀងអាហារពិភពលោកបានសហការជាមួយក្រសួងអប់រំ ចែកស្បៀង ដល់ក្រុមគ្រួសារងាយរងគ្រោះចំនួន ៣៩ ៦៥០ គ្រួសារ ដែលក្នុងនោះមានប្រជាពលរដ្ឋសរុបដែលទទួលបានជំនួយនេះប្រមាណ ២០០ ០០០ នាក់ ក្នុងខេត្តគោលដៅចំនួន ៥ ខេត្ត។
សេចក្ដីប្រកាសបញ្ជាក់ថា៖ «ការផ្ដល់ជំនួយនេះ សម្រាប់ផ្តល់ជូនដល់ក្រុមគ្រួសារដែលអាជ្ញាធរកំណត់ថា ជាគ្រួសារងាយរងគ្រោះមានបណ្ណអត្តសញ្ញាណ គ្រួសារក្រីក្រ និងមានកូនចុះឈ្មោះចូលរៀននៅតាមសាលាដែលមានការគាំទ្រពីកម្មវិធីផ្ដល់ស្បៀងអាហារតាមសាលារៀនរបស់កម្មវិធីស្បៀងអាហារពិភពលោក និងក្រសួងអប់រំ»។
លោកស្រី ក្លែរកូណាន់ តំណាង WFP ប្រចាំនៅកម្ពុជា ថ្លែងថា ក្នុងអំឡុងពេលមានតម្រូវការខ្ពស់ ជំនួយស្បៀងរបស់កម្មវិធីស្បៀងអាហារពិភពលោក និងក្រសួងអប់រំ គឺជាការរួមចំណែកបំពេញបន្ថែមដល់ជំនួយគាំពារសង្គមរបស់រាជរដ្ឋាភិបាលកម្ពុជាដែលបានពង្រីកវិសាលភាពរបស់ខ្លួនក្នុងប៉ុន្មានខែថ្មីៗនេះ។ ជំនួយនេះនឹងរួមចំណែកក្នុងការបំពេញតម្រូវការរបស់ក្រុមគ្រួសារងាយរងគ្រោះ ជាពិសេស និងធានាថា កុមារ នឹងមានអាហារទទួលទានក្នុងពេលមានវិបត្តិ។
លោកស្រីថ្លែងថា៖ «យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះដៃគូទាំងអស់ដែលបានផ្ដល់ការគាំទ្រ ជាពិសេស ក្រសួងអប់រំ យុវជន និងកីឡា និងក្រុមប្រឹក្សាជាតិគាំពារសង្គម»។
បើតាមលោកស្រី ក្លែរ កូណាន់ នេះគឺជាការចែកស្បៀងជុំទី៤ ក្នុងគោលបំណងកាត់បន្ថយផលប៉ះពាល់របស់ជំងឺកូវីដ ១៩ ទៅលើសេដ្ឋកិច្ចគ្រួសារងាយរងគ្រោះ។ ការចែកស្បៀងត្រូវបានធ្វើឡើងតាមរយៈបណ្តាញសាលារៀន ដោយមានការគាំទ្រពីមន្ទីរអប់រំ រដ្ឋបាលសាលារៀន អាជ្ញាធរភូមិឃុំ និងដៃគូអង្គការមិនមែនរដ្ឋាភិបាល។
លោកស្រីឱ្យដឹងថា របបស្បៀងនេះ រួមមាន អង្ករ ២៥ គីឡូក្រាម ត្រីខកំប៉ុង និងប្រេងឆា។ ក្រៅពីនេះកម្មវិធីស្បៀងអាហារពិភពលោកកំពុងធ្វើការយ៉ាងជិតស្និទ្ធជាមួយក្រសួងអប់រំ និងដៃគូដទៃទៀត ដើម្បីកែលម្អហេដ្ឋារចនាសម្ព័ន្ធសាលារៀន និងអគារសិក្សាដែលជាវិធានការត្រៀមសម្រាប់ ការចូលរៀនវិញប្រកបដោយសុវត្ថិភាព។
បើតាម WFP ប្រចាំកម្ពុជា ជាធម្មតា កម្មវិធីផ្ដល់ស្បៀងអាហារតាមសាលារៀនរបស់កម្មវិធីស្បៀងអាហារពិភពលោក និងក្រសួងអប់រំ បានផ្តល់នូវអាហារសុខភាព និងមានជីវជាតិដល់កុមារ ២២៣ ០០០ នាក់នៅតាមសាលាគោលដៅចំនួន ៩០៨ ក្នុងខេត្តចំនួន ៥ គឺ ខេត្តសៀមរាប ឧត្តរមានជ័យ កំពង់ធំ កំពង់ឆ្នាំង និងខេត្តពោធិ៍សាត់។
WFP បញ្ជាក់ថា អាហារូបត្ថម្ភល្អមានសារៈសំខាន់ណាស់សម្រាប់ការអភិវឌ្ឍផ្លូវចិត្ត និងរាងកាយរបស់កុមារ។ ការសិក្សាបានបង្ហាញថា ការផ្ដល់អាហារតាមសាលារៀនជួយឱ្យសិស្សផ្តោតអារម្មណ៍ និងរៀនសូត្រឆាប់ចេះចាំ រួមចំណែកឱ្យមានលទ្ធផលនៃការអប់រំប្រសើរឡើង ព្រមទាំងជួយសម្រាលបន្ទុកសេដ្ឋកិច្ចរបស់ក្រុមគ្រួសារសិស្សផងដែរ។
ចាប់តាំងពីមានការឆ្លងរាលដាលនៃជំងឺកូវីដ ១៩ និងការផ្អាកដំណើរការសាលារៀន សិស្សមិនបានទទួលទានអាហារពេលព្រឹក ដែលមានជីវជាតិទៀតទេ។ បញ្ហានេះបានជះឥទ្ធិពលដល់កុមារមកពីគ្រួសារក្រីក្របំផុតដែលភាគច្រើនរងការលំបាកដោយសារការបាត់បង់ចំណូល និងការងារ។
WFP អះអាងថា កម្មវិធីផ្តល់ស្បៀងអាហារតាមសាលារៀននៅកម្ពុជា និងជំនួយស្បៀងពិសេសនេះអាចប្រព្រឹត្តទៅបានដោយមានជំនួយឧបត្ថម្ភពីរាជរដ្ឋាភិបាលកម្ពុជា រដ្ឋាភិបាលជប៉ុន ទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងក្រសួងកសិកម្មនៃសហរដ្ឋអាមេរិក (USDA)។
លោក រស់ សុវាចា អ្នកនាំពាក្យក្រសួងអប់រំ ថ្លែងពីម្សិលមិញថា អាហារូបត្ថម្ភល្អ ចូលរួមលើកកម្ពស់គុណភាពរៀន និងបង្រៀន ថែមទាំងបណ្តាលឱ្យគុណភាពជីវិតរឹតតែប្រសើរ។
លោកថា៖ «សូមអបអរសាទរជាមួយអង្គការស្បៀងអាហារពិភពលោកដែលបានបន្តលើកកម្ពស់អាហារូបត្ថម្ភ។ ក្រសួងអប់រំបន្តលើកកម្ពស់ជីវភាពមាតាបិតា និងកុមារតូច ជាពិសេសដើម្បីដោះស្រាយកង្វះអាហារូបត្ថម្ភកុមារមួយចំនួនតូចដោយធ្វើការអនុវត្តប្រកាសអន្តរក្រសួង ស្តីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកូនអាយុក្រោម ២ ឆ្នាំនៃគ្រួសារមានបណ្ណសមធម៌ ឬបណ្ណអាទិភាព»៕
