.jpg)
សត្វគោដែលមានជំងឺដុំពកស្បែក។ រូបថត ហ្វេសប៊ុក
ប.មានជ័យ/ឧត្តរមានជ័យៈ មន្ត្រីបសុពេទ្យនៅខេត្តបន្ទាយមានជ័យ និងឧត្តរមានជ័យកំពុងចុះព្យាបាលជំងឺដុំពកស្បែកគោ ក្របី ជាង ៥០០ ក្បាល ដែលកំពុងកើតមានរាយប៉ាយដោយកន្លែង ព្រមទាំងធ្វើការអប់រំណែនាំប្រជាពលរដ្ឋឱ្យមានការយល់ដឹងពីវិធីការពារ កុំឱ្យជំងឺនោះមានការឆ្លងបន្តពីភូមិមួយទៅភូមិមួយ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យប្រាប់ភ្នំពេញប៉ុស្តិ៍ពីម្សិលមិញថា មន្ត្រីបសុពេទ្យខេត្តបន្ទាយមានជ័យកំពុងម្នីម្នាចុះទៅជួយព្យាបាលសត្វគោក្របីជូនដល់ប្រជាពលរដ្ឋនៅភូមិកូនត្រី ឃុំកូប ស្រុកអូរជ្រៅ ព្រមទាំងតាមដានស្ថានភាពជំងឺដុំពកស្បែកគោដែលកំពុងកើតមាននៅដោយកន្លែង។
លោកបានថ្លែងថា៖ «និយាយរួមទៅជំងឺហ្នឹងវាឈឺរប៉េះរប៉ោះ។ បើយើងព្យាបាលនៅភូមិមួយជាអ៊ីចឹង វាលោតទៅភូមិមួយផ្សេងទៀត យើងក៏តាមទៅព្យាបាលនៅទីនោះទៀតអ៊ីចឹងទៅ»។
បើតាមលោក ហ៊ុយ ទូច ជំងឺដុំពកស្បែកគោក្របី ដែលកើតមាននៅខេត្តបន្ទាយមានជ័យបានកើតមានរាយប៉ាយនៅចំនួន ៤ ស្រុក គឺនៅស្រុកអូរជ្រៅ ថ្មពួក ព្រះនេត្រព្រះ និងស្រុកភ្នំស្រុក ក្នុងនោះមានសត្វគោឈឺចំនួនជាង ២០០ ក្បាល ដែលបានព្យាបាលឱ្យជាឡើងវិញស្ទើរទាំងអស់។ លោកថាជំងឺស្បែកគោក្របីនេះមិនទាន់មានថ្នាំវ៉ាក់សាំងនៅឡើយទេ ប៉ុន្តែមន្ត្រីបសុពេទ្យអាចព្យាបាលបានក្នុងករណីទើបកើតឡើងភ្លាមៗ។
លោក ហ៊ុយ ទូច បញ្ជាក់ថា ការព្យាបាលជំងឺដុំពកស្បែកគោក្របីនេះមិនមានជាបញ្ហាលំបាកអ្វីឡើយ ប្រសិនបើប្រជាពលរដ្ឋ រាយការណ៍ទាន់ពេលវេលា។ ប៉ុន្តែអ្វីជាបញ្ហាបារម្ភនោះ គឺនៅពេលមានសត្វឈឺ ដូចជាគោ ក្របី ជាដើមនេះ តែងមានឈ្មួញកណ្តាលចុះមកបង្អាប់ និងបន្ថោកតម្លៃ កុហកបោកប្រាស់ឱ្យប្រជាពលរដ្ឋមានការភ័យខ្លាចដើម្បីលក់សត្វគោក្របីឱ្យទៅពួកគេ។
លោកទូចបានថ្លែងថា៖ «ប្រជាពលរដ្ឋ កាលណាគាត់ចាញ់បោកពួកហ្នឹង គាត់ខាតហើយ។ ឧបមាថា គោ ១ ក្បាលថ្លៃ ៥ លានរៀល ដល់ពេលឈឺបន្តិចបន្តួចពួកនោះមកបង្អាប់គាត់លក់បានតែ ៧០ ម៉ឺន ឬ ៨០ ម៉ឺនរៀលអាហ្នឹងជាបញ្ហាមួយដែលធ្វើឱ្យប៉ះពាល់ដល់សេដ្ឋកិច្ចនៅក្នុងសង្គមគ្រួសាររបស់គាត់»។
លោក សូត្រ ស៊ីសុខឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្ដឧត្ដរមានជ័យថ្លែងថា មានសត្វគោចំនួនជាង ៣០០ ក្បាល កើតជំងឺស្បែកពក ស្ថិតនៅដោយកន្លែងក្នុងស្រុកអន្លង់វែង និងសង្កាត់បន្សាយរាក់ ក្រុងសំរោង។ សត្វគោទាំងនោះត្រូវបានព្យាបាលឱ្យជាសះស្បើយស្ទើរតែទាំងអស់ព្រមទាំងគ្រប់គ្រង់ស្ថានភាពបានយ៉ាងល្អ។
លោកប្រធានមន្ទីរថ្លែងថា៖ «យើងព្យាបាលជាជិតអស់ហើយ នៅសល់តិចតួច ប៉ុន្តែសល់តិចតួចហ្នឹងមិនមែនវាស្ងាត់លែងមានជំងឺហ្នឹងទេ។ យើងខ្លាចវាមានការចម្លងតាមរយៈសត្វមូស សត្វរបោម និងសត្វចៃអីហ្នឹង ព្រោះការរាលដាលក្នុងពេលឥឡូវមិនដូចមុនទេ ពីមុន វារាលដាលពីសត្វមួយទៅសត្វមួយទៀតដោយសារវានៅក្នុងហ្វូងហើយពលរដ្ឋលែងវាចោល តែឥឡូវម្ចាស់គេគ្រប់គ្រងនៅក្នុងក្រោលត្រឹមត្រូវ»។
លោក ស៊ីសុខឃាង បញ្ជាក់ថា មន្ត្រីបសុពេទ្យបានចុះទៅអប់រំណែនាំប្រជាពលរដ្ឋឱ្យបាញ់ផ្សែងសម្លាប់មូសដើម្បីការពារកុំឱ្យមានការចម្លងជំងឺ។ ប៉ុន្តែទោះបីជាមានការបាញ់ផ្សែងការពារក៏ដោយ គោក្របីអាចឆ្លងនៅពេលលែងគោឱ្យស៊ីស្មៅ ពិសេសពេលពលរដ្ឋយកគោទៅឃ្វាល។
ក្រៅពីនោះមន្ត្រីបសុពេទ្យក៏បានណែនាំឱ្យពលរដ្ឋរាយការណ៍ឱ្យបានលឿនបំផុត ដើម្បីឆាប់ទទួលបានការព្យាបាល កុំឱ្យសត្វគោឈឺធ្ងន់ដែលមិនអាចសង្គ្រោះបាន។ លោកបញ្ជាក់ថា ជំងឺដុំពកស្បែកគោនេះ កើតឡើងតែលើគោក្របីតែប៉ុណ្ណោះ មិនចម្លងដល់មនុស្សឡើយ។ ភាគច្រើនកើតមាននៅរដូវវស្សា ដែលមានសត្វល្អិតជាភ្នាក់ងារចម្លង។
លោក មុត រ៉េន ប្រជាពលរដ្ឋនៅឃុំបត់ត្រង់ ស្រុកមង្គលបុរី ខេត្តបន្ទាយមានជ័យថ្លែងថា លោកកំពុងមានការព្រួយបារម្ភពីការចម្លងជំងឺនេះមកលើសត្វគោរបស់លោក ទោះជាពេលនេះមិនទាន់មានការឆ្លងរាលដាលដល់ភូមិឃុំដែលលោករស់នៅក៏ដោយ។
លោក រ៉េន និយាយថា៖ «ខ្ញុំបានទាក់ទងទៅមន្ត្រីជំនាញដើម្បីទទួលបានការណែនាំ និងជួយអន្តរាគមន៍ ទោះបីពេលនេះគោខ្ញុំមិនទាន់ឈឺអីក៏ដោយ ប៉ុន្តែបើមានវ៉ាក់សាំងការពារកាន់តែល្អ»៕
