តាកែវៈ លោក ញឹក រតនពេជ្រ ប្រធានមជ្ឈមណ្ឌលសួនសត្វភ្នំតាម៉ៅឱ្យដឹងថា សត្វតោឈ្មោលមួយក្បាលដែលទើបត្រូវបានដកហូតនឹងត្រូវដាក់ឱ្យរស់នៅជាមួយសត្វតោចំនួន ៤ ក្បាលផ្សេងទៀតក្នុងមជ្ឈមណ្ឌល បន្ទាប់ពីវាអាចបន្ស៊ាំខ្លួនរស់នៅក្នុងព្រៃបានក្នុងពេលខាងមុខ ខណៈម្ចាស់សត្វតោដែលជាជនជាតិចិនមានចេតនាចង់ស្នើសុំចិញ្ចឹមសត្វតោនេះ ដោយស្របច្បាប់វិញ។
កាលពីថ្ងៃទី ២៧ ខែ មិថុនា ឆ្នាំ ២០២១ អាជ្ញាធរចម្រុះរាជធានីភ្នំពេញសហការជាមួយអង្គការ Wildlife Alliance បានរឹបអូសសត្វតោចិញ្ចឹម ១ ក្បាល នៅក្នុងផ្ទះវីឡា ១ កន្លែង ស្ថិតនៅផ្ទះលេខ ២២ ផ្លូវ ៣០៦ ភូមិ ៧ សង្កាត់បឹងកេងកង ១ រាជធានីភ្នំពេញ។
សត្វតោនោះមានអាយុ ១៨ ខែ និងទម្ងន់ ៧០ គីឡូក្រាម ហើយក្រោយការដកហូត ក្រុមជួយសង្គ្រោះបានបញ្ជូនសត្វតោនេះទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ។
ស្របពេលមានការជជែកគ្នាច្រើននៅតាមបណ្តាញសង្គមជុំវិញបញ្ហានេះ មានគណនីហ្វេសប៊ុកមួយដែលឈ្មោះថា Qi Xiao ដែលទំនងជាម្ចាស់សត្វតោបានសរសេរបង្ហោះកាលពីថ្ងៃទី ២៩ មិថុនាថា រូបគេនឹងទទួលយកការពិន័យដែលរដ្ឋដាក់ពិន័យ ចំពោះអំពើល្មើសក្នុងការចិញ្ចឹមសត្វព្រៃ ដោយគ្មានការអនុញ្ញាត។ ប៉ុន្តែរូបគេនឹងសុំសិទ្ធិចិញ្ចឹមដោយស្របច្បាប់ដោយគ្រាន់តែសង្ឃឹមថា រដ្ឋាភិបាលអាចបើកចិត្ត និងអនុញ្ញាតឱ្យលោកបានទទួលយកតោរបស់ខ្លួនមកចិញ្ចឹមវិញ។
គណនីនេះបញ្ជាក់ថា៖ «ខ្ញុំគ្រាន់តែស្រឡាញ់សត្វប៉ុណ្ណោះមិនមែនត្រឹមតែជាសត្វតោ និងឆ្កែទេ នៅមានសត្វពពែទៀតចិញ្ចឹមជាមួយសត្វតោជាមួយគ្នា។ ដើម្បីកុំឱ្យសត្វតោបំភ័យប្រជាជន ខ្ញុំបានធ្វើរបងរនាំងខ្ពស់បាំង ហើយវាមានសុខភាពល្អ មិនដែលត្រូវបានគេធ្វើបាបរំលោភបំពាន»។
គណនីនេះបានសរសេរបន្តទៀតថាសត្វតោនេះបានស៊ីសាច់គោឆ្អិន ៦ គីឡូក្រាមក្នុង ១ ថ្ងៃ ទឹកដោះគោ ១ គីឡូក្រាម។ «វាត្រូវបានខ្ញុំចិញ្ចឹមតាំងពីនៅតូចហើយក៏មានមនោសញ្ចេតនា»។
ភ្នំពេញ ប៉ុស្តិ៍ បានព្យាយាមទាក់ទងទៅអ្នកបកប្រែរបស់ម្ចាស់តោដែលជាជនជាតិចិន ប៉ុន្តែត្រូវបានបដិសេធធ្វើអត្ថាធិប្បាយ។
ចំណែកលោក គាំ សីហា នាយករងខណ្ឌទទួលបន្ទុករួមខណ្ឌរដ្ឋបាលព្រៃឈើភ្នំពេញ និងលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានថ្លែងដូចគ្នាថា ពួកលោកសុំពេលធ្វើការស្រាវជ្រាវលើករណីនេះជាមុនសិន។
លោក ញឹក រតនពេជ្រ ប្រធានមជ្ឈមណ្ឌលសួនសត្វភ្នំតាម៉ៅថ្លែងពីម្សិលមិញ ដោយប្រាប់ពីស្ថានភាពការវិវឌ្ឍថ្មីៗនៃសត្វតោនោះ។ លោកបញ្ជាក់ថា៖ «យើងមើលទឹកមុខវាគឺវាបង្ហាញពីការមិនសប្បាយចិត្តអ៊ីចឹងហើយនៅពេលបានម្ចាស់វា ទៅលេង គឺបានបន្ថយសម្ពាធខ្លះដល់វា។ តែពេលវេលានឹងធ្វើឱ្យការផ្លាស់ប្តូររបស់វា ទៅតាមលក្ខខណ្ឌធម្មជាតិ និងអាចរស់នៅក្នុងព្រៃបានវិញឆាប់ៗ»។
លោក ញឹក រតនពេជ្រ នៅតែយល់ថា សត្វតោនេះគួរតែត្រូវបានត្រឡប់មករស់នៅក្នុងព្រៃជាមួយសត្វព្រៃដទៃទៀតឱ្យស្របតាមស្ថានភាពជីវសាស្ត្រនៃសត្វព្រៃវិញព្រោះវា បានរងគ្រោះដោយការបន្សុំា ដើម្បីមករស់នៅដូចសត្វស្រុកម្តងរួចមកហើយ។
លោកបានរៀបរាប់ថា៖ «ពីក្នុងដំណាក់កាលពីការរស់នៅក្នុងព្រៃ មករស់នៅជាមួយមនុស្ស គឺវាមានការលំបាក ១ ហើយ ដែលជាបញ្ហាក្នុងជីវិតរបស់វា ធ្មេញត្រូវកាត់ ក្រញាំត្រូវដក។ នៅពេលវាផ្លាស់ប្តូរពីការរស់នៅជាមួយមនុស្ស មករស់ក្នុងព្រៃវិញវាក៏ជួបការពិបាកម្តងទៀតហើយ។ ដូច្នេះយើងទាមទារឱ្យវាត្រឡប់មករស់នៅ និងស៊ីសាច់ស្រស់ជាអាហារតាមធម្មជាតិរបស់វាវិញ»។
បើតាម លោក រតន ពេជ្រ នៅពេលសត្វតោ ១ ក្បាលនេះ អាចបន្សុំាទៅនឹងធម្មជាតិបានហើយ នោះមន្ត្រីនឹងបញ្ជូនវាឱ្យទៅរស់នៅជាមួយសត្វតោចំនួន ៤ ក្បាលផ្សេងទៀត ដើម្បីឱ្យវាមានជីវិតរស់នៅជាសត្វព្រៃតាមបែបធម្មជាតិ៕
វីដេអូ៖