.jpg)
កម្មករប្រមូលសំរាមដាក់ឡាននៅតំបន់មួយក្នុងសង្កាត់ចាក់អង្រែលើ។ ហ៊ាន រង្សី
ភ្នំពេញៈ រដ្ឋបាលរាជធានី-ភ្នំពេញបានឱ្យដឹងថា ប្រតិបត្តិករប្រមូលសំរាមថ្មីចំនួន ៣ នឹងចាប់ផ្តើមសម្អាត ប្រមូល និងដឹកជញ្ជូនសំរាម សំណល់រឹង នៅតាមតំបន់ចំនួន ៣ នៃខណ្ឌទាំង ១៤ ដោយឡែកពីគ្នា ចាប់ពីថ្ងៃទី ១ ខែ កក្កដា ឆ្នាំ ២០២១ តទៅ ដែលការផ្លាស់ប្តូរប្រតិបត្តិករចាស់ទៅថ្មីបែបនេះ អាចប្រឈមជាមួយនឹងបញ្ហារអាក់រអួលខ្លះៗ។
សេចក្តីជូនដំណឹងរដ្ឋបាលរាជធានីភ្នំពេញចុះថ្ងៃទី ៣០ មិថុនា បានឱ្យដឹងទៀតថា ក្រុមហ៊ុន 800 Super/Global Action for Environment Awareness Public Limited នឹងត្រូវផ្តល់សេវាក្នុងតំបន់ទី១ ដែលមាន ៥ ខណ្ឌ គឺខណ្ឌទួលគោក ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ និងខណ្ឌព្រែកព្នៅ។
ចំណែកក្រុមហ៊ុន Mizuda Group Co, Ltd នឹងត្រូវផ្តល់សេវាក្នុងតំបន់ទី២ ដែលមាន ៥ ខណ្ឌ គឺ ខណ្ឌដូនពេញ ខណ្ឌ៧មករា ខណ្ឌដង្កោ ខណ្ឌពោធិ៍សែនជ័យ និងខណ្ឌកំបូល ខណៈក្រុមហ៊ុន CINTRI (Cambodia/Everbright (China) នឹងត្រូវផ្តល់សេវាក្នុងតំបន់ទី៣ ដែលមាន ៤ ខណ្ឌ គឺ ខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ។
សេចក្ដីជូនដំណឹងដដែលនេះបានបញ្ជាក់ថា៖ «ក្នុងដំណាក់កាលអន្តរកាលនៃការផ្ទេរការផ្តល់សេវាប្រមូល និងដឹកជញ្ជូនសំរាម សំណល់រឹងពីប្រតិបត្តិករចាស់ ទៅប្រតិបត្តិករថ្មី គឺអាចនឹងមានភាពរអាក់រអួលខ្លះៗនៃការផ្តល់សេវា ជាពិសេសនៅតំបន់ដែលទទួលខុសត្រូវដោយប្រតិបត្តិករថ្មី»។
ដូច្នេះរដ្ឋបាលរាជធានីភ្នំពេញសូមអំពាវនាវដល់បងប្អូនប្រជាពលរដ្ឋទាំងអស់ នៅរាជធានីភ្នំពេញ មេត្តាវេចខ្ចប់ ទុកដាក់ និងបញ្ចេញសំរាម សំណល់រឹងរបស់ខ្លួន តាមការកំណត់ឱ្យបានត្រឹមត្រូវ ដើម្បីចូលរួមថែរក្សាអនាម័យ និងបរិស្ថាននៅរាជធានីភ្នំពេញឱ្យបានស្អាតល្អជានិច្ច និងមេត្តាយោគយល់ចំពោះភាពរអាក់រអួលនៃការចាប់ផ្តើមដំបូងនេះ។
លោក ពៅ តារា ជាពលរដ្ឋម្នាក់រស់នៅតំបន់ភ្នំពេញថ្មីរំពឹងថា ដំណើរការថ្មីនៃប្រតិបត្តិការរបស់ក្រុមហ៊ុនទាំង ៣ នេះនឹងធ្វើឱ្យបញ្ហាជុំវិញសំរាម លែងសូវកើតមាន។
ការរំពឹងយ៉ាងដូច្នេះ ក៏ព្រោះតែលោកយល់ថា៖ «បើពីមុនយើងមានតែក្រុមហ៊ុនស៊ីនទ្រី ១ ដល់ពេលឥឡូវ យើងមានក្រុមហ៊ុន ២ បន្ថែមទៀត អ៊ីចឹងយើងមានការប្រកួតប្រជែង។ នៅពេលខាងក្រុមហ៊ុនមានតែម្នាក់មានតែឯង មិនសូវជាគិតគូរប៉ុន្មានទេ និងមានការខ្វះចន្លោះច្រើន ដល់ពេលមានដៃគូប្រកួតប្រជែងបែបនេះ ខ្ញុំគិតថា នឹងល្អប្រសើរជាងមុន»។
ក្រៅពីភាពល្អប្រសើរនៃការប្រមូលសំរាមលោក ពៅ តារាសង្ឃឹមថា ការប្រកួតប្រជែងបែបនេះនឹងចូលរួមផ្តល់អត្ថប្រយោជន៍ជាច្រើនដល់បុគ្គលប្រមូលសំរាមឱ្យពួកគាត់មានកម្លាំងចិត្ត កាន់តែខ្លាំងក្នុងការបំពេញការងាររបស់ពួកគាត់។
ជាមួយនឹងការប្រកាសពីប្រតិបត្តិការថ្មីនេះ ក្រុមហ៊ុន អិលវីអិមស៊ី ហូលឌីង កាលពីថ្ងៃទី ២៩ ខែមិថុនា បានចុះអនុស្សរណៈនៃការយោគយល់គ្នា (MOU) ជាមួយនឹងក្រសួងបរិស្ថាន ជុំវិញកិច្ចសហប្រតិបត្តិការកិច្ចគាំពារបរិស្ថាន និងការផ្គត់ផ្គង់រថយន្តដឹកសំរាមនៅកម្ពុជា។
លោក ជា ស៊ីណា អគ្គនាយកនៃអគ្គនាយកដ្ឋានគាំពារបរិស្ថានបាននិយាយថា ការចុះអនុស្សរណៈនៃការយោគយល់គ្នានេះ ដើម្បីបង្កើតសហប្រតិបត្តិការរវាងភាគីទាំង ២ លើការពង្រឹងការគ្រប់គ្រងសំរាម សំណល់រឹងទីប្រជុំជន ដោយមានការបញ្ជាទិញ និងផ្គត់ផ្គង់រថយន្ដដឹកសំរាមផងដែរ។
បន្ថែមពីនេះលោកថា ភាគីទាំង ២ ក៏ធ្វើការរួមគ្នាក្នុងការលើកកម្ពស់អនាម័យ សោភណភាព បរិស្ថានចូលរួមលើកកម្ពស់ផលិតផល ដែលផលិតក្នុងស្រុក ជំរុញលើកទឹកចិត្តដល់ប្រជាជនកម្ពុជាឱ្យមានការស្នេហាជាតិទៀតផង។
ក្រុមហ៊ុន អិលវីអិមស៊ីហូលឌីង គឺជាក្រុមហ៊ុនតំណាងចែកចាយផ្តាច់មុខរថយន្ត SsangYong ដែលជារថយន្តស៊េរីទំនើបមានដូចជា រថយន្ត SUV, Compact SUV, រថយន្ត PickUp ដែលពេញនិយមនៅកម្ពុជា។
លោកស្រី ម៉ៅ គន្ធា ជាអគ្គនាយកប្រតិបត្តិក្រុមហ៊ុន អិលវីអិមស៊ី ហូលឌីង បាននិយាយថា ក្រុមហ៊ុនខ្លួនក៏ធ្វើការចែកចាយផ្គត់ផ្គង់រថយន្តដឹកសំរាមដែលដំឡើងនៅក្នុងប្រទេសកម្ពុជាក៏ដូចជាផ្ទេរបច្ចេកវិទ្យា ព្រមទាំងជំនាញក្នុងការដំឡើងរថយន្ដ និងទទួលខុសត្រូវក្នុងការផ្គត់ផ្គង់គ្រឿងបន្លាស់ ការធានា និងសេវាកម្មជួសជុលផងដែរ៕
វីដេអូ៖
