.jpg)
ក្រុមហ៊ុន Facebook និងអង្គការ APLE ដាក់ឱ្យដំណើរការយុទ្ធនាការប្រយុទ្ធប្រឆាំងនឹងការកេងប្រវ័ញ្ចលើកុមារតាមអនឡាញ ដើម្បីប្រយុទ្ធប្រឆាំងនឹងការកេងប្រវ័ញ្ចកុមារតាមអនឡាញ ដោយត្រូវរាយការណ៍ និងកុំចែករំលែក។ រូបថត APLE Cambodia
ភ្នំពេញៈ ក្រុមហ៊ុន Facebook និងអង្គការសកម្មភាពដើម្បីកុមារ (APLE) កាលពីថ្ងៃទី ២៩ ខែមិថុនាបានដាក់ដំណើរការយុទ្ធនាការមួយឈ្មោះថា #ReportItDontShareIt ដើម្បីប្រយុទ្ធប្រឆាំងនឹងការកេងប្រវ័ញ្ចកុមារតាមអនឡាញ ដោយត្រូវរាយការណ៍ និងកុំចែករំលែក។
អង្គការ APLE កម្ពុជាបានបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ២៩ ខែមិថុនាថា៖ «ប្រសិនបើកុមារម្នាក់ស្ថិតក្នុងហានិភ័យគេអាចទូរស័ព្ទ និងរាយការណ៍ករណីនេះទៅកាន់នគរបាលតាមរយៈលេខសង្គ្រោះបន្ទាន់ ១២៨៨ ឬទូរស័ព្ទទៅកាន់អង្គការ APLE ដែលមានលេខ ០៩២ ៣១១ ៥១១»។
«ប្រសិនបើនរណាម្នាក់ឃើញរូបភាពបែបរំលោភបំពានកុមារនៅលើបណ្ដាញសង្គម Facebook ពួកគេអាចរាយការណ៍រូបថត ឬវីដេអូនោះទៅកាន់ក្រុមហ៊ុនហ្វេសប៊ុក និងមន្ត្រីអនុវត្តច្បាប់ ដោយមិនត្រូវចែករំលែក ទាញយក ឬបញ្ចេញមតិយោបល់នៅលើមាតិកានោះឡើយ»។
យុទ្ធនាការនេះមានគោលបំណង ដើម្បីអប់រំសាធារណជនអំពីគ្រោះថ្នាក់ដែលបង្កឡើង ដោយការចែករំលែករូបភាព ឬវីដេអូរំលោភបំពានផ្លូវភេទកុមារ និងរបៀបរាយការណ៍មាតិកាប្រភេទនេះទៅកាន់មន្ត្រីអនុវត្តន៍ច្បាប់ និងក្រុមហ៊ុន Facebook។
អង្គការ APLE កម្ពុជាបានបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ២៩ ខែមិថុនាថា យុទ្ធនាការនេះបានទទួលការគាំទ្រពីក្រសួងប្រៃសណីយ៍ និងទូរគមនាគមន៍ និងក្រុមប្រឹក្សាជាតិកម្ពុជាដើម្បីកុមារ។ ក្រសួងប្រៃសណីយ៍ និងទូរគមនាគមន៍ គឺជាក្រសួងនាំមុខយ៉ាងសកម្មក្នុងការជំរុញគិតគូរពីសុវត្ថិភាពកុមារកម្ពុជាលើប្រព័ន្ធអនឡាញ ហើយបានផ្តួចផ្តើមរួចមកនូវយុទ្ធនាការលើកកម្ពស់ការយល់ដឹងក្នុងចំណោមសាធារណជនពីហានិភ័យដែលអាចកើតមានឡើងលើបណ្តាញអ៊ីនធឺណិតនាពេលកន្លងមក។
លោក សំលៀង សីលា នាយកប្រតិបត្តិអង្គការ APLE បានថ្លែងក្នុងសេចក្តីប្រកាសព័ត៌មាននេះថា៖ «យើងមានក្តីរីករាយយ៉ាងខ្លាំងដែលបានធ្វើការងារជាមួយក្រុមហ៊ុន Facebook ដើម្បីដាក់ដំណើរការយុទ្ធនាការនេះដែលនឹងអាចឱ្យមានការយល់ដឹងកាន់តែប្រសើរអំពីថា តើការចែករំលែករូបភាព ឬវីដេអូរំលោភបំពានផ្លូវភេទកុមារតាមអនឡាញមានផលប៉ះពាល់ខ្លាំងដល់កុមារដែលត្រូវបានបង្ហាញក្នុងមាតិកានោះកម្រិតណា និងថា តើមនុស្សពេញវ័យ អាចធ្វើអ្វីបានដើម្បីទប់ស្កាត់ការចែកចាយរូបភាពរំលោភបំពានកុមារទាំងនេះ។
អង្គការ APLE អំពាវនាវជាបន្ទាន់ទៅកាន់សាធារណជនឱ្យចូលរួមគាំទ្រដល់ការបង្ការការរំលោភបំពានផ្លូវភេទកុមារតាមអនឡាញតាមរយៈការចែករំលែកវីដេអូយុទ្ធនាការនេះ និងរាយការណ៍អំពីបទល្មើស។
លោក សំលៀង សីលា ប្រាប់ភ្នំពេញប៉ុស្តិ៍នៅថ្ងៃទី ៣០ ខែមិថុនាថា ចាប់ពីដើមឆ្នាំ ២០២១ រហូតមកដល់ពេលនេះមានជាង ៥០ ករណីត្រូវបានរាយការណ៍តាមរយៈទូរស័ព្ទបន្ទាន់ពាក់ព័ន្ធនឹងការសង្ស័យលើការប្រព្រឹត្តអំពើកេងប្រវ័ញ្ចលើកុមារតាមប្រព័ន្ធអ៊ីនធឺណិតដែលនៅក្នុងនោះមានការផ្សព្វផ្សាយ និងផលិតរូបភាពអាសអាភាស និងការគំរាមកំហែងខាងផ្លូវភេទ។
លោកថ្លែងថា៖ «យុទ្ធនាការនេះគឺសំដៅចង់អប់រំណែនាំអ្នកដែលប្រើបណ្តាញហ្វេសប៊ុកទាំងអស់ ជាសាធារណជនហ្នឹងឱ្យដឹងថារូបភាពទាំងអស់ហ្នឹងមិនគួរចែកចាយទេហើយបើគាត់ឃើញមានការចែកចាយនៅក្នុងបណ្តាញសង្គមហ្វេសប៊ុក ឬកម្មវិធីអនឡាញផ្សេងទៀតគាត់អាចរាយការណ៍តាមរយៈហ្វេសប៊ុក ឬក៏តាមរយៈអង្គការ Aple ឬក៏ទៅសមត្ថកិច្ចផ្ទាល់»។
លោក សូវិ សុទ្ធី រដ្ឋលេខាធិការក្រសួងប្រៃសណីយ៍ និងទូរគមនាគមន៍ប្រាប់ភ្នំពេញ-ប៉ុស្តិ៍នៅថ្ងៃទី ៣០ ខែមិថុនាថាថ្មីៗនេះក្រសួងប្រៃសណីយ៍ និងទូរគមនាគមន៍បានគាំទ្រដល់ក្រុមហ៊ុន FACEBOOK និងអង្គការ APLE ដើម្បីផ្សព្វផ្សាយពីប្រព័ន្ធរាយការណ៍ប្រកបដោយភាពសម្ងាត់ លើករណីរំលោភបំពានកុមារតាមប្រព័ន្ធអនឡាញនៅកម្ពុជា។
លោកថ្លែងថា ក្រសួងរបស់លោកបានជួយពង្រីកការផ្សព្វផ្សាយ និងលើកកម្ពស់ការយល់ដឹងពីប្រព័ន្ធរាយការណ៍ និងផលប្រយោជន៍នៃការរាយការណ៍បន្ថែមទៀតដល់សាធារណជនគោលដៅកាន់តែច្រើន។ ក្រសួងក៏បានលើកទឹកចិត្តដល់ប្រតិបត្តិករទូរគមនាគមន៍ ក្រុមហ៊ុនថ្នាលឌីជីថល និងអ្នកបង្កើតមាតិកាព័ត៌មានផ្សេងៗទៀតទាំងនៅក្នុងស្រុក និងក្រៅស្រុកគិតគូរពីសុវត្ថិភាពកុមារលើបណ្តាញអ៊ីនធឺណិត និងដាក់បញ្ចូលអន្តរាគមន៍នានាទៅក្នុងគោលនយោបាយរបស់ក្រុមហ៊ុនខ្លួន។
កាលពីខែកុម្ភៈ ឆ្នាំ ២០២១ ក្រសួងប្រៃសណីយ៍ បានផ្តួចផ្តើមរៀបចំយុទ្ធនាការដែលមានឈ្មោះថា «យុទ្ធនាការគិតគូរកូន» ក្នុងគោលបំណងលើកកម្ពស់ការយល់ដឹងអំពីហានិភ័យនៃប្រព័ន្ធអនឡាញចំពោះកុមារដោយផ្តល់ព័ត៌មាន និង គន្លឹះសំខាន់ៗ ដល់កុមារមាតា-បិតា អាណាព្យាបាល និងអ្នកពាក់ព័ន្ធអំពីហានិភ័យវិធីសាស្ត្រការពារ និងដោះស្រាយបញ្ហានានាដែលអាចកើតមានឡើងពេលកុមារប្រើប្រាស់ប្រព័ន្ធអ៊ីនធឺណិត។
លោក សុទ្ធី ថ្លែងថា យុទ្ធនាការនេះត្រូវបានចាប់ផ្តើមស្របពេលដែលមានកុមារច្រើនឡើងកំពុងប្រើប្រាស់ប្រព័ន្ធនេះ ហើយបញ្ហានៃការរំលោភបំពានជាច្រើនបានកើនឡើងគួរឱ្យកត់សម្គាល់ជាពិសេសក្នុងអំឡុងពេល រីករាលដាលនៃជំងឺកូវីដ ១៩។
លោកថ្លែងថា៖ «ក្រសួងប្រៃសណីយ៍ និងទូរគមនាគមន៍តែងបានគាំទ្រ និងជំរុញដល់ប្រតិបត្តិករទូរគមនាគមន៍ អ្នកបង្កើតមាតិកា និងក្រុមហ៊ុនថ្នាលឌីជីថលផ្សេងទៀតឱ្យចូលរួមបានកាន់តែច្រើនក្នុងកិច្ចការពារកុមារលើប្រព័ន្ធអនឡាញដើម្បីធានាថា កុមារកម្ពុជាមានឱកាសក្នុងការប្រើប្រាស់បច្ចេកវិទ្យាឌីជីថលប្រកបដោយសុវត្ថិភាព»។
អ្នកនាង Malina Enlund ប្រធានផ្នែកគោលនយោបាយសុវត្ថិភាពប្រចាំតំបន់អាស៊ីប៉ាស៊ីហ្វិករបស់ក្រុមហ៊ុន Facebook បានថ្លែងក្នុងសេចក្តីប្រកាសព័ត៌មានថា ការបង្ការ និងការលុបបំបាត់ការកេងប្រវ័ញ្ច និងការរំលោភបំពានផ្លូវភេទកុមារតាមអនឡាញតម្រូវឱ្យមានវិធីសាស្ត្រឆ្លងឧស្សាហកម្មមួយ។
អ្នកនាងថា៖ «ក្រុមហ៊ុន Facebook ប្តេជ្ញាចិត្តចំពោះការធ្វើការងាររបស់យើងដើម្បីការងារកុមារទាំងនៅក្នុង និងក្រៅកម្មវិធីបណ្តាញសង្គមនានា (Apps) របស់យើង។ យើងកំពុងជ្រើសយកវិធីសាស្ត្រផ្អែកលើការស្រាវជ្រាវ ដើម្បីបង្កើតដំណោះស្រាយប្រកបដោយប្រសិទ្ធភាពដែលរារាំងដល់ការចែករំលែកសម្ភារកេងប្រវ័ញ្ចកុមារ»៕
