.jpg)
លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន។ រូបថត សហការី
សៀមរាបៈ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអំពាវនាវដល់ប្រទេសម្ចាស់ជំនួយដៃគូអភិវឌ្ឍន៍ និងគ្រប់ភាគីពាក់ព័ន្ធសកម្មភាពមីន ចាំបាច់ត្រូវបន្តរួបរួមគ្នា និងប្តេជ្ញាគាំទ្រគ្នាទៅវិញទៅមក ដើម្បីបង្កើនសមត្ថភាពវិ ស័យសកម្មភាពមីន ដើម្បីធានាឲ្យបានសុខសន្តិភាព និងការអភិវឌ្ឍប្រកបដោយចីរភាព។
លោក លី ធុជ បានថ្លែងក្នុងសុន្ទរកថាបើកសិក្ខាសាលាស្តីពីការសម្រេចបាននូវការអភិវឌ្ឍប្រកបដោយចីរភាព និងការអភិវឌ្ឍប្រកបដោយបរិយាប័ន្ននៅក្នុងប្រទេសដែលរងផលប៉ះពាល់ដោយគ្រាប់មីន និងសំណល់ជាតិផ្ទុះពីសង្គ្រាម កាលពី ថ្ងៃទី ១ ខែ កក្កដា ឆ្នាំ ២០២១ នៅខេត្តសៀមរាប។ សិក្ខាសាលានេះឧបត្ថម្ភគាំទ្រដោយស្ថានទូតឥណ្ឌូនេស៊ីប្រចាំនៅកម្ពុជា។
លោកបានថ្លែងថា៖ «ខ្ញុំសូមអំពាវនាវឲ្យប្រទេសម្ចាស់ជំនួយ ដៃគូអភិវឌ្ឍន៍ និងគ្រប់ភាគីពាក់ព័ន្ធសកម្មភាពមីន ចាំបាច់ត្រូវបន្តរួបរួមគ្នា និងប្តេជ្ញាគាំទ្រគ្នាទៅវិញទៅមក ដើម្បីបង្កើនសមត្ថភាពវិស័យសកម្មភាពមីន ដើម្បីធានាឲ្យបានសុខសន្តិភាព និងការអភិវឌ្ឍប្រកបដោយចីរភាព»។
លោក លី ធុជ បានថ្លែងដោយសង្ឃឹមថា តាមរយៈសិក្ខាសាលានេះ នឹងផ្តល់នូវទិសដៅត្រឹមត្រូវឆ្ពោះទៅរកការបង្កើនប្រសិទ្ធភាពសកម្មភាពមីនក្នុងការជួយសម្រេចបាននូវចក្ខុវិស័យរបៀបវារៈឆ្នាំ ២០៣០ នៃការធានាថា «គ្មាននរណាម្នាក់នៅសេសសល់ក្លាយជាការពិត ដែលរាល់លទ្ធផលនៃការពិភាក្សា នឹងត្រូវបានប្រែក្លាយទៅជាសកម្មភាពប្រកបដោយអត្ថន័យនៅថ្នាក់ជាតិ និងថ្នាក់តំបន់។
លោកថ្លែថា៖ «ខ្ញុំសូមវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការជាប្រវត្តិសាស្ត្ររវាងកម្ពុជា និងឥណ្ឌូនេស៊ីក្នុងការចូលរួមគាំទ្រដល់ការអភិវឌ្ឍ និងការធានាបាននូវស្ថេរភាពនយោបាយ»។
លោកបានលើកឡើងថា សកម្មភាពមីនពិតជាមានតួនាទីសំខាន់ក្នុងការដោះស្រាយបញ្ហាប្រឈមមនុស្សធម៌ជាបន្ទាន់ ដែលបណ្តាលមកពីវត្តមាននៃគ្រាប់មីនគ្រាប់បែកចង្កោម និងសំណល់ជាតិផ្ទុះដទៃទៀតក្នុងសម័យសង្គ្រាម ព្រមទាំងបានធ្វើឲ្យបណ្តាប្រទេសដែលនៅតែរងផលប៉ះពាល់យ៉ាងធ្ងន់ធ្ងរដូចជា កម្ពុជា ឡាវ មីយ៉ាន់ម៉ា ថៃ វៀតណាម និងហ្វីលីពីនត្រូវការការគាំទ្របន្ទាន់ពីបណ្តាប្រទេសដែលមិនរងផលប៉ះពាល់ និងប្រទេសម្ចាស់ជំនួយ។
លោកថ្លែងថា រយៈពេល ៣០ ឆ្នាំចុងក្រោយនេះ សកម្មភាពមីន និងសហគមន៍អភិវឌ្ឍន៍ បានធ្វើការរួមគ្នាជាដៃគូយ៉ាងជិតស្និទ្ធក្នុងការរំដោះផ្ទៃដីជូនបងប្អូនប្រជាពលរដ្ឋប្រកបដោយសុវត្ថិភាព ផ្តល់នូវផលវិជ្ជមានភ្លាមៗ និងបានរួមចំណែកដល់ការស្តារឡើងវិញ និងកិច្ចខិតខំប្រឹងប្រែងអភិវឌ្ឍន៍រយៈពេលវែងនៅក្នុងប្រទេសដូចជា កម្ពុជា ឡាវ វៀតណាម និងថៃ។
រាជរដ្ឋាភិបាលកម្ពុជា បានបង្ហាញពីការប្តេជ្ញាចិត្តរឹងមាំ និងស្ថិតស្ថេររបស់ខ្លួនក្នុងការកម្ចាត់គ្រាប់មីនដែលត្រូវបានស្គាល់អោយអស់នៅត្រឹមឆ្នាំ ២០២៥ ព្រមទាំងបានចាត់ទុកវិស័យបោសសម្អាតមីន ចូលរួមគាំពារដល់សុខសន្តិភាព និងការអភិវឌ្ឍប្រកបដោយចីរភាព។
លោក Sudirman Haseng ឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំនៅកម្ពុជា ថ្លែងក្នុងសុន្ទរកថាថា ឥណ្ឌូនេស៊ីប្តេជ្ញាចូលរួមយ៉ាងសកម្មក្នុងសកម្មភាពកម្ចាត់មីន។ ការប្តេជ្ញាចិត្តរបស់ឥណ្ឌូនេស៊ីត្រូវបានបញ្ជូនជាចម្បងតាមរយៈកិច្ចប្រជុំរដ្ឋមន្ត្រីការពារជាតិអាស៊ាន និងអាស៊ានបូក ស្តីពីសកម្មភាពមីនដើម្បីមនុស្សធម៌។
លោកថ្លែងថា៖ «សិក្ខាសាលាថ្ងៃនេះ គឺដើម្បីបំពេញនូវការប្តេជ្ញាចិត្តរបស់ឥណ្ឌូនេស៊ីក្នុងការគាំទ្រ មជ្ឈមណ្ឌលសកម្មភាពកម្ចាត់មីនតំបន់អាស៊ាន (ARMAC) ជាពិសេសការងារទាក់ទងនឹងការលើកកម្ពស់កម្មវិធីយល់ដឹងស្តីពីគ្រោះថ្នាក់នៃសំណល់មីន និងជាតិផ្ទុះពីសង្គ្រាម»។
លោក លី ធុជ បានលើកឡើងអំពី ARMAC ដែលត្រូវបានបង្កើតឡើងរយៈពេល៩ឆ្នាំមកហើយក្រោមគំនិតផ្តួចផ្តើមរបស់លោកនាយករដ្ឋមន្ត្រី ហ៊ុន សែន នៅឯកិច្ចប្រជុំកំពូលអាស៊ានលើកទី២១ នៅរាជធានីភ្នំពេញ ហើយក្រោយមកមេដឹកនាំអាស៊ានបានទទួលយកសំណើនេះជាបន្តបន្ទាប់។
លោកបញ្ជាក់ថា រយៈពេល៤ឆ្នាំចុងក្រោយនេះ ចាប់តាំងពីប្រតិបត្តិការរបស់ខ្លួននៅឆ្នាំ២០១៧ ARMAC បានក្លាយជាមជ្ឈមណ្ឌលដ៏គួរឱ្យទុកចិត្ត និងបានរួមចំណែកយ៉ាងសកម្មក្នុងកិច្ចខិតខំប្រឹងប្រែងអនុវត្តន៍ មិនត្រឹមតែលើការងារសហគមន៍សន្តិសុខនយោបាយអាស៊ាន ២០២៥ ប៉ុណ្ណោះទេ ប៉ុន្តែថែមទាំងជំរុញកិច្ចសហប្រតិបត្តិការលើបញ្ហាអភិវឌ្ឍន៍សេដ្ឋកិច្ច-សង្គម ការអភិវឌ្ឍភាពជាដៃគូសម្របសម្រួលការចែករំលែកចំណេះដឹង និងការគាំទ្រគំនិតផ្តួចផ្តើមខាងត្បូង-ខាងត្បូងនៅក្នុងតំបន់ផងដែរ៕
