ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានស្នើប្រទេសស៊ុយអែត ឱ្យជួយក្នុងការប្រយុទ្ធប្រឆាំងបទល្មើសឆ្លងដែន ខណៈលោកក៏លើកឡើងពីកិច្ចសហប្រតិបត្តិការរវាងភាគីទាំង ២ លើការបន្តកំណែទម្រង់រដ្ឋបាលថ្នាក់ក្រោមជាតិ។
ការស្នើបែបនេះ ធ្វើឡើងក្នុងជំនួបរវាងលោក ស ខេង និងលោក ប្យ៊ន ហេកម៉ាក (BjörnHäggmark) ឯកអគ្គរាជទូតស៊ុយអែត ដែលនឹងត្រូវបញ្ចប់អាណត្តិការទូតនៅកម្ពុជាកាលពីថ្ងៃទី ៣០ ខែមិថុនា។
ក្រសួងមហាផ្ទៃ បានបញ្ជាក់នៅលើគេហទំព័រកាលពីថ្ងៃទី ៣០ ខែមិថុនាថា៖ «ចំពោះការងារអនុវត្តច្បាប់ផ្នែកនគរបាលដូចជាការបង្ក្រាបឧក្រិដ្ឋកម្មឆ្លងដែន រួមមានការប្រឆាំងបទល្មើសបច្ចេកវិទ្យា បញ្ហាគ្រឿងញៀន និងការប្រឆាំងភេរវកម្ម សម្ដេចក្រឡាហោម (ស ខេង) បានស្នើសុំភាគីស៊ុយអែតពិនិត្យលទ្ធភាពបន្តពង្រឹងការងារនេះជាមួយភាគីកម្ពុជាបន្ថែមទៀត»។
គេហទំព័រដដែលបញ្ជាក់ថា លោក ប្យ៊ន ហេកម៉ាក នឹងពាំនាំយកសំណើនេះដាក់ជូនរដ្ឋាភិបាលស៊ុយអែត ហើយលោកបានអះអាងថា ការងារប្រយុទ្ធប្រឆាំងឧក្រិដ្ឋកម្មឆ្លងដែន ពិតជាមានសារៈសំខាន់ ពិសេសបទល្មើសឧក្រិដ្ឋកម្មបច្ចេកវិទ្យា។
ប្រភពដដែលបញ្ជាក់ថា៖ «សម្ដេចក្រឡាហោម ស ខេង ឧបនាយករដ្ឋមន្ត្រី ក៏បានលើកឡើងអំពីកិច្ចសហប្រតិបត្តិការមួយចំនួន ដែលភាគីកម្ពុជា និងស៊ុយអែតត្រូវបន្តជាមួយគ្នាទៀត គឺការងារកំណែទម្រង់ថ្នាក់ក្រោមជាតិ និងការអនុវត្តច្បាប់ផ្នែកនគរបាលដូចជាការប្រយុទ្ធប្រឆាំងបទល្មើសឆ្លងដែនជាដើម»។
លោក ស ខេង ថ្លែងថា កន្លងមកស៊ុយអែតបានចូលរួមក្នុងការងារកំណែទម្រង់រដ្ឋបាលថ្នាក់ក្រោមជាតិនៅកម្ពុជាហើយថា ស៊ុយអែត ជាប្រទេសមានបទពិសោធច្រើនលើការងារកំណែទម្រង់នេះ។
លោក ស ខេង ថ្លែងថា សម្រាប់កម្ពុជាទោះគោលដៅកំណែទម្រង់រដ្ឋបាល ថ្នាក់ក្រោមជាតិមិនទាន់សម្រេចបានទាំងស្រុង ប៉ុន្តែបានបោះជំហានទៅមុខជាប្រចាំ និងទទួលបានលទ្ធផលតាមការរំពឹងទុកជាក់ស្ដែងហើយកម្ពុជាកំពុងរៀបចំដាក់ចេញផែនការ ១០ ឆ្នាំ ដំណាក់កាលទី ២ ជុំវិញការងារកំណែទម្រង់រដ្ឋបាលថ្នាក់ក្រោមជាតិ។
លោក សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ មិនអាចទាក់ទង ដើម្បីសុំការបញ្ជាក់បន្ថែមបានទេកាលពីថ្ងៃទី ១ ខែកក្កដា។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា ប្រាប់ភ្នំពេញ-ប៉ុស្តិ៍នៅថ្ងៃទី ១ ខែកក្កដាថា រដ្ឋបាលរាជធានី-ខេត្ត ក្រុងស្រុកខណ្ឌ និងរដ្ឋបាលឃុំ-សង្កាត់ គឺជារដ្ឋបាលដែលត្រូវការទាំងធនធាន និងសមត្ថភាព ដើម្បីឆ្លើយតបទៅនឹងតម្រូវការដ៏ច្រើនរបស់ពលរដ្ឋ។ ប៉ុន្តែការខកខានក្នុងការផ្តល់មូលនិធិទៅឃុំសង្កាត់ និងកំណែទម្រង់មួយចំនួន ដែលត្រូវធ្វើនៅរដ្ឋបាលក្រុង ស្រុក ខណ្ឌ ក៏ដោយសារបញ្ហាកូវីដ ១៩ ដែរ។
លោកថ្លែងថា៖ «កំណែទម្រង់គេត្រូវការ ២ យ៉ាង។ ទី១ ធនធានមនុស្ស ទី២ ធនធានហិរញ្ញវត្ថុ ស្របនឹងឆន្ទៈនយោបាយ។ ការជួយទាំងឡាយពីដៃគូអភិវឌ្ឍន៍វាជាការបំពេញបន្ថែមមួយទៅលើអ្វីដែលធនធានរបស់ជាតិមាន។ ប៉ុន្តែគេត្រូវមើលទៅលើទិដ្ឋភាពនៃឆន្ទៈ ឬក៏ជំនាញរបស់មន្ត្រីនៅរដ្ឋបាលថ្នាក់ក្រោមជាតិហ្នឹងដែរ ដូចជាពួកគាត់ត្រូវការការរៀនសូត្រពង្រឹងសមត្ថភាព»។
លោក ជ័យ បន្តថា ដំណើរការកំណែទម្រង់រដ្ឋបាលថ្នាក់ក្រោមជាតិមានការវិវឌ្ឍរីកចម្រើនគួរឱ្យចាប់អារម្មណ៍ដែរ។ ប៉ុន្តែនៅពេលសេដ្ឋកិច្ចបានរងផលប៉ះពាល់ ដោយសារកូវីដ ១៩ មុខសញ្ញានៃការពង្រឹងនៅមូលដ្ឋានគឺត្រូវតែដើរនៅក្នុងជម្រើសមួយថ្មី គឺការប្រើប្រាស់បច្ចេកវិទ្យាសម្រាប់ការងារនៅមូលដ្ឋាន។
លោកថ្លែងថា៖ «ការងារមួយចំនួនគេត្រូវតែគិតគូរក្នុងការប្រើប្រាស់បច្ចេកវិទ្យាបណ្តាញសង្គមដូចជាការប្រជុំ វេទិកាសាធារណៈអីមួយចំនួន។ បើកូវីដ ១៩ នៅតែអុកឡុកអ៊ីចឹង ធ្វើម៉េចធានាថា អ្នកផ្តល់សេវានៅមូលដ្ឋាននៅតែជួបប្រជាពលរដ្ឋបានតាមរយៈបណ្តាញសង្គម ហើយផ្តល់ព័ត៌មានទៅប្រជាពលរដ្ឋបានតាមរយៈមធ្យោបាយមួយចំនួនដែលមានស្រាប់ដូចជាបណ្តាញទំនាក់ទំនងសង្គមដែលអាចប្រើការបាននៅឯមូលដ្ឋាន»។
កាលពីខែវិច្ឆិកា ឆ្នាំ ២០២០ ក្រសួងការបរទេសស៊ុយអែតបានប្រកាសបិទស្ថានទូតខ្លួននៅកម្ពុជានៅចុងឆ្នាំ ២០២១ ហើយរាល់កិច្ចការការបរទេសជាមួយកម្ពុជានឹងត្រូវបានផ្ទេរឱ្យស្ថិតនៅក្រោមស្ថានទូតស៊ុយអែត ប្រចាំប្រទេសថៃ។
បើតាមគេហទំព័រដដែលលោក ប្យ៊ន ហេកម៉ាក ថ្លែងថា ទោះបីជាមានការបិទស្ថានទូតស៊ុយអែតនៅកម្ពុជាក៏ប្រទេសស៊ុយអែត នៅតែបន្តមានកិច្ចសហប្រតិបត្តិការជាមួយរដ្ឋាភិបាលកម្ពុជាលើវិស័យពាណិជ្ជកម្មទេសចរណ៍ ការងារឧត្តមសិក្សា ស្រាវជ្រាវ និងវប្បធម៌ ហើយថា ការងារបន្តនឹងទទួលអនុវត្តដោយស្ថានទូតស៊ុយអែតនៅទីក្រុងបាងកកប្រទេសថៃ។
គេហទំព័រដដែលបញ្ជាក់ថា លោក ប្យ៊ន ហេកម៉ាក ក៏បានស្នើកម្ពុជាដើម្បីបង្កើតកុងស៊ុលកិត្តិយសផងដែរ។
លោកបានបន្តថា បច្ចុប្បន្នស្ថានទូតស៊ុយអែតប្រចាំទីក្រុងបាងកក កំពុងរង់ចាំការយល់ព្រមពីភាគីកម្ពុជា ដើម្បីបង្កើតជាស្ថានកុងស៊ុលកិត្តិយស ដើម្បីសម្រួលដល់ប្រជាពលរដ្ឋស៊ុយអែត ដែលកំពុងមានវត្តមាននៅកម្ពុជា។
លោក ស ខេង ថ្លែងថា ក្រសួងការបរទេស និងសហប្រតិបត្តិការអន្តរជាតិ កំពុងពិនិត្យ និងធ្វើការលើរឿងបង្កើតជាស្ថានកុងស៊ុលកិត្តិយសនេះ។
គេហទំព័រដដែលនេះបានដកស្រង់សម្ដីលោក ប្យ៊ន ហេកម៉ាក ថា៖ «ប្រជាពលរដ្ឋស៊ុយអែតនៅកម្ពុជាមានការលំបាក ក្នុងការបន្តទិដ្ឋាការរបស់ខ្លួន ដោយសារលិខិតឆ្លងដែនជិតផុតកំណត់ ហើយស្ថានទូតនៅកម្ពុជាមិនអាចទទួលសំណើធ្វើលិខិតឆ្លងដែនបាន ដោយតម្រូវឱ្យពួកគេត្រូវធ្វើដំណើរទៅទីក្រុងបាងកក ដើម្បីដាក់សំណើស្នើសុំលិខិតឆ្លងដែនថ្មី ប៉ុន្តែត្រូវជួបឧបសគ្គដោយសារជំងឺកូវីដ ១៩»។
លោក ប្យ៊ន ហេកម៉ាក បានស្នើភាគីកម្ពុជាឱ្យពិនិត្យលទ្ធភាពអនុញ្ញាតបន្តទិដ្ឋាការស្នាក់នៅដល់ពលរដ្ឋស៊ុយអែតដោយទទួលនូវទម្រង់លិខិតឆ្លងដែនថ្មី ដែលបានចេញជាបណ្ដោះអាសន្ន។
ពាក់ព័ន្ធនឹងសំណើនេះ លោក ស ខេង ថ្លែងថា ក្រសួងមហាផ្ទៃនឹងប្រមូលព័ត៌មានឱ្យបានគ្រប់ជ្រុងជ្រោយព្រមទាំងធ្វើការងារនេះជាមួយសហការី ដើម្បីឆ្លើយតបទៅស្ថានទូត៕