ភ្នំពេញៈ អាជ្ញាធរនៃបណ្ដាខណ្ឌមួយចំនួននៅរាជធានីភ្នំពេញបានចុះណែនាំផ្ទាល់ដល់ម្ចាស់ទីតាំង ដែលមានការលក់ម៉ូតូ និងលក់រថយន្ត ឱ្យបញ្ឈប់ការលក់ដូររំលោភលើចិញ្ចើមផ្លូវតទៅទៀត ហើយបានទុកពេល ២ ខែ ឱ្យរកទីតាំងថ្មី ស្របតាមបទបញ្ជា និងការណែនាំរបស់លោក ឃួង ស្រេង អភិបាលរាជធានីភ្នំពេញ។
លោក ឯក ឃុនដឿន អភិបាលខណ្ឌទួលគោកប្រាប់ ភ្នំពេញ ប៉ុស្តិ៍ កាលពីម្សិលមិញថា សាលាខណ្ឌលោកបានជូនដំណឹងទៅម្ចាស់អាជីវកម្ម និងទីតាំងដែលមានការលក់ម៉ូតូ លក់រថយន្ត ដែលរំលោភលើចិញ្ចើមផ្លូវរួចហើយ ដោយទុកពេល ២ ខែ តាមការណែនាំរបស់អភិបាលរាជធានីភ្នំពេញឱ្យរកទីតាំងថ្មី។
លោកបានបញ្ជាក់ថា៖ «យើងបានចុះណែនាំ និងជូនដំណឹង ដោយទុកពេល ២ ខែ តាមប្រសាសន៍របស់មេឱ្យគាត់រកទីតាំងថ្មី»។
បើតាមលោក ឯក ឃុនដឿន ប្រសិទ្ធភាពក្នុងការអនុវត្ដរបស់ម្ចាស់អាជីវកម្មយ៉ាងណានោះ គឺរង់ចាំមើល ២ ខែ ក្រោយថ្ងៃផុតកំណត់សិន។ នៅពេលនោះ ប្រសិនបើមិនបានគោរពតាមយ៉ាងណា ខណ្ឌនឹងមានវិធានការថ្មីទៀត។
ចំណែកលោក ឃឹម ស៊ុនសូដា អភិបាលខណ្ឌកំបូលក៏បានឱ្យដឹងដែរថា នៅក្នុងមូលដ្ឋានខណ្ឌរបស់លោក គឺមិនមានទីតាំងលក់ឡាន ឬម៉ូតូទេ ប៉ុន្តែបើទោះបីមិនមានក៏ដោយក៏លោកតែងតែឱ្យមន្ត្រីចុះរៀបចំសណ្តាប់ធ្នាប់សាធារណៈ និងចុះហាមប្រាមមិនឱ្យពលរដ្ឋយកចិញ្ចើមផ្លូវ សម្រាប់ដាក់លក់ ឬធ្វើអាជីវកម្មផ្សេងៗដែរ។
លោកបានថ្លែងថា៖ «ជាប្រចាំយើងរៀបចំសណ្តាប់ធ្នាប់ អ្នកលក់ដូរធម្មតា សំរាមអនាម័យ យើងធ្វើធម្មតានៅតាមដងផ្លូវជាតិលេខ ៣ ផ្លូវជាតិលេខ ៤ និងនៅមូលដ្ឋានផ្សេងទៀត ហើយកន្លែងលក់ឡាន និងម៉ូតូ អីនៅខណ្ឌផ្សេងគេធ្វើហើយ»។
លោក ឃួង ស្រេង អភិបាលរាជធានីភ្នំពេញកាលពីថ្ងៃទី ២៩ ខែមិថុនា បានដាក់បទបញ្ជាឱ្យខណ្ឌទាំងអស់ ជាពិសេសខណ្ឌចំនួន ៥ ដែលនៅកណ្តាលរាជធានីភ្នំពេញត្រូវរៀបចំសណ្តាប់ធ្នាប់នៅលើចិញ្ចើមផ្លូវឱ្យកាន់តែប្រសើរដោយមិនអនុញ្ញាតឱ្យមានការលក់ដូរ ឬលក់រថយន្តរំលោភលើចិញ្ចើមផ្លូវនោះទេដោយទុករយៈពេល ២ ខែ ដើម្បីឱ្យម្ចាស់អាជីវកម្មរុះរើ ឬផ្លាស់ប្តូរទៅកាន់ទីតាំងថ្មី។
លោកបានថ្លែងថា៖ «វាល្មមដល់ពេលដែលយើងត្រូវរៀបចំសណ្តាប់ធ្នាប់នៅក្នុងរាជធានីភ្នំពេញ ជាពិសេសខណ្ឌទាំង ៥ នៅកណ្តាលរាជធានីភ្នំពេញឱ្យមានសណ្តាប់ធ្នាប់ល្អប្រសើរហើយ»។
ជាមួយគ្នានេះ លោក ឃួង ស្រេង ក៏បានស្នើឱ្យអាជ្ញាធរខណ្ឌដែលពាក់ព័ន្ធត្រូវចេញសេចក្តីជូនដំណឹងឱ្យម្ចាស់អាជីវកម្មលក់រថយន្ត និងលក់ម៉ូតូដែលបានប្រើប្រាស់ចិញ្ចើមផ្លូវសាធារណៈធ្វើអាជីវកម្មបែបអនាធិបតេយ្យ ប្រញាប់រុះរើទីតាំងរបស់ខ្លួន ទៅនៅជាយរាជធានីភ្នំពេញវិញ។
បើតាមលោក ឃួង ស្រេង រដ្ឋបាលរាជធានីភ្នំពេញបានអនុគ្រោះជាច្រើនឆ្នាំមកហើយដល់ពលរដ្ឋមួយចំនួនដែលយកចិញ្ចើមផ្លូវធ្វើអាជីវកម្ម និងមិនសហការជាមួយអាជ្ញាធរក្នុងការរៀបចំសណ្តាប់ធ្នាប់សាធារណៈ។
ដូច្នេះចាប់ពីពេលនេះតទៅគឺមិនអនុញ្ញាតឱ្យប្រើប្រាស់ចិញ្ចើមផ្លូវសម្រាប់ធ្វើអាជីវកម្មបន្តទៀតនោះទេ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងថា រឿងនេះមិនមែនជារឿងថ្មីរបស់អាជ្ញាធររាជធានីភ្នំពេញនោះទេ តែវាប្រៀបដូចទៅនឹងការរុញចកនៅក្នុងបឹង។ ដើម្បីឱ្យការរៀបចំនេះទទួលបានជោគជ័យត្រូវតែមានការទទួលខុសត្រូវទៅវិញទៅមក និងរួមគ្នាក្នុងអនុវត្តទាំងអ្នកលក់ និងអាជ្ញាធរនៅមូលដ្ឋាន។
លោកបានបញ្ជាក់ថា៖ «អ្នកដែលទទួលរងផលប៉ះពាល់ពីការរំលោភចិញ្ចើមផ្លូវនេះ គឺជាអ្នកដំណើរថ្មើរជើងគ្រប់ប្រភេទហើយក៏វានឹងធ្វើឱ្យបាត់បង់សណ្តាប់ធ្នាប់សាធារណៈ និងសោភណភាពក្រុងផងដែរ។ នៅពេលមានដំណោះស្រាយសមស្របណាមួយទិដ្ឋភាពសង្គមគេមើលឃើញថា វានឹងមានរបៀបរៀបរយ និងមានសណ្តាប់ធ្នាប់ល្អព្រមទាំងទទួលបានការកោតសរសើរពីមហាជន»៕
វីដេអូ៖