.jpg)
ក្រសួងប្រៃសណីយ៍ អំពាវនាវឱ្យសាធារណជនចូលរួមប្រើប្រាស់ប្រព័ន្ធ QR Code ដើម្បីទប់ស្កាត់កូវីដ១៩។ ហុង មិនា
ភ្នំពេញៈ ក្រសួងប្រៃសណីយ៍និងទូរគមនាគមន៍ បានចេញសេចក្តីអំពាវនាវឱ្យសាធារណជនចូលរួមប្រើប្រាស់ប្រព័ន្ធ QR Code «ទប់ស្កាត់កូវីដ Stop Covid» ដើម្បីទប់ស្កាត់ការឆ្លងរីករាលដាលនៃជំងឺនេះ។
ក្រសួងប្រៃសណីយ៍ បញ្ជាក់ក្នុងសេចក្តីអំពាវនាវ កាលពីថ្ងៃទី១ ខែកក្កដាថា៖ «យោងតាមបទបញ្ជាដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១ ខែកក្កដា ឆ្នាំ ២០២១ ក្រសួងប្រៃសណីយ៍ និង ទូរគមនាគមន៍ សូមអំពាវនាវសាជាថ្មី ដល់គ្រប់ក្រសួងស្ថាប័ន គ្រឹះស្ថានសាធារណៈនិងឯកជន ម្ចាស់អាជីវកម្ម ម្ចាស់ភោជនីយដ្ឋានម្ចាស់ទីតាំងដែលមានមនុស្សចេញ-ចូលច្រើន និងសាធារណជនទាំងអស់ ត្រូវតែចូលរួមប្រើប្រាស់ ប្រព័ន្ធ QR Code “ទប់ស្កាត់កូវីដ Stop Covid”»។
ក្រសួងអំពាវនាវដល់គ្រប់ស្ថាប័នពាក់ព័ន្ធ ម្ចាស់អាជីវកម្មនិងសាធារណជន ត្រូវដាក់ឱ្យមានមនុស្សនៅរង់ចាំ ត្រួតពិនិត្យការស្កេន QR Code នៅច្រកទ្វារនៃទីតាំងរបស់ខ្លួន និងតម្រូវឱ្យអ្នកឆ្លងកាត់ត្រូវតែចូលរួមស្កេន QR Code ឱ្យបានគ្រប់ៗគ្នា។
ក្រសួងបន្តថា ប្រព័ន្ធ QR Code អាចប្រើជាសំណាញ់ សុវត្ថិភាពគាំទ្រដល់ដំណើរការការងារជាធម្មតា តាមបែបគន្លងថ្មីហើយសាធារណជន អាចទទួលបានការជូនដំណឹងទាន់ពេលវេលាក្នុងករណីមានជាប់ពាក់ព័ន្ធនឹងជំងឺកូវីដ១៩។
ក្រសួងប្រៃសណីយ៍និងទូរគមនាគមន៍ សង្ឃឹមជឿជាក់យ៉ាងមុតមាំថា គ្រប់ក្រសួងស្ថាប័ន គ្រឹះស្ថានសាធារណៈ និងឯកជនម្ចាស់អាជីវកម្មម្ចាស់ភោជនីយដ្ឋាននិងម្ចាស់ទីតាំងដែលមានមនុស្សចេញ-ចូលច្រើនបង្កើត QR Code សម្រាប់ទីតាំងរបស់ខ្លួន និងសូមសាធារណជនទាំងអស់មេត្តាចូលរួមស្កេន QR Code និងអនុវត្តតាមវិធានការរបស់រាជរដ្ឋាភិបាល ដើម្បីរួមចំណែកដល់ការទប់ស្កាត់ការឆ្លងរីករាលដាលនៃជំងឺកូវីដ១៩ ក្នុងសហគមន៍៕
