.jpg)
កម្មវិធីស្បៀងអាហារពិភពលោក (WFP) សហការជាមួយក្រសួងអប់រំ កាលពីថ្ងៃទី ២៩ ខែមិថុនា បានចែកស្បៀងជូនដល់ក្រុមគ្រួសារងាយរងគ្រោះចំនួន ៣៩ ៦៥០ គ្រួសារ ដែលក្នុងនោះមានប្រជាពលរដ្ឋសរុប ដែលទទួលបានជំនួយនេះប្រហែល ២០ ម៉ឺននាក់នៅក្នុងខេត្តចំនួនប្រាំ។ រូបភាព United Nations in Cambodia
ភ្នំពេញៈ កម្មវិធីស្បៀងអាហារពិភពលោក (WFP) សហការជាមួយក្រសួងអប់រំ កាលពីថ្ងៃទី ២៩ ខែមិថុនា បានចែកស្បៀងជូនដល់ក្រុមគ្រួសារងាយរងគ្រោះចំនួន ៣៩ ៦៥០ គ្រួសារ ដែលក្នុងនោះមានប្រជាពលរដ្ឋសរុប ដែលទទួលបានជំនួយនេះប្រហែល ២០ ម៉ឺននាក់នៅក្នុងខេត្តចំនួនប្រាំ។
នេះគឺជាការចែកស្បៀងជុំទី ៤ ដើម្បីកាត់បន្ថយផលប៉ះពាល់ពីជំងឺកូវីដ ១៩ ទៅលើសេដ្ឋកិច្ចគ្រួសារងាយរងគ្រោះ។
ខេត្តទាំងប្រាំនេះរួមមានសៀមរាប ឧត្តរមានជ័យ កំពង់ធំ កំពង់ឆ្នាំង និងពោធិ៍សាត់។ របបស្បៀងមាន អង្ករ ២៥ គីឡូក្រាម ត្រីខកំប៉ុង និងប្រេងឆា។
ជំនួយនេះសម្រាប់ផ្តល់ជូនដល់ក្រុមគ្រួសារដែលអាជ្ញាធរកំណត់ថា ជាគ្រួសារងាយរងគ្រោះមានបណ្ណអត្តសញ្ញាណកម្មគ្រួសារក្រីក្រ (IDPoor) និងមានកូនចុះឈ្មោះចូលរៀននៅតាមសាលាដែលមានការគាំទ្រពីកម្មវិធីផ្ដល់ស្បៀងអាហារតាមសាលារៀនរបស់ WFP និងក្រសួងអប់រំ។
WFP បញ្ជាក់ក្នុងសេចក្តីប្រកាសកាលពីថ្ងៃទី ២៩ ខែមិថុនាថា៖ «ជាធម្មតាកម្មវិធីផ្ដល់ស្បៀងអាហារ តាមសាលារៀនរបស់ WFP និងក្រសួងអប់រំ ផ្តល់នូវអាហារសុខភាព និងមានជីវជាតិដល់កុមារចំនួន ២២៣ ០០០ នាក់ នៅតាមសាលាគោលដៅចំនួន ៩០៨ នៅក្នុងខេត្តចំនួនប្រាំ (នេះ)»។
WFP បញ្ជាក់ថា អាហារូបត្ថម្ភល្អមានសារៈសំខាន់ណាស់ សម្រាប់ការអភិវឌ្ឍផ្លូវចិត្ត និងរាងកាយរបស់កុមារ។ ការសិក្សាបានបង្ហាញថា ការផ្ដល់អាហារតាមសាលារៀនជួយឱ្យសិស្សផ្តោតអារម្មណ៍ និងរៀនសូត្រឆាប់ចេះចាំ រួមចំណែកឱ្យមានលទ្ធផលនៃការអប់រំប្រសើរឡើង ព្រមទាំងជួយសម្រាលបន្ទុកសេដ្ឋកិច្ចរបស់ក្រុមគ្រួសារ សិស្សផងដែរ។
WFP បញ្ជាក់ថា ចាប់តាំងពីមានការឆ្លងរាលដាលនៃជំងឺកូវីដ ១៩ និងការផ្អាកដំណើរការសាលារៀន សិស្ស មិនបានទទួលទានអាហារពេលព្រឹកដែលមានជីវជាតិទៀតទេ។
បញ្ហានេះបានជះឥទ្ធិពលជាពិសេសដល់កុមារមកពីគ្រួសារក្រីក្របំផុត ដែលភាគច្រើនរងការលំបាក ដោយសារការបាត់បង់ចំណូល និងបាត់បង់ការងារ។
លោកស្រី ក្លែរ កូណាន់ តំណាងកម្មវិធីស្បៀងអាហារពិភពលោកប្រចាំនៅកម្ពុជាថ្លែងក្នុងសេចក្តីប្រកាសព័ត៌មាននេះថា ក្នុងអំឡុងពេលមានតម្រូវការខ្ពស់ ជំនួយស្បៀងរបស់ WFP និងក្រសួងអប់រំ គឺជាការរួមចំណែកបំពេញបន្ថែមដល់ជំនួយគាំពារសង្គមរបស់រដ្ឋាភិបាលកម្ពុជា ដែលបានពង្រីកវិសាលភាពរបស់ខ្លួននៅក្នុងប៉ុន្មានខែថ្មីៗនេះ។
លោកស្រីថ្លែងថា៖ «ជំនួយនេះនឹងរួមចំណែកក្នុងការបំពេញតម្រូវការរបស់ក្រុមគ្រួសារងាយរងគ្រោះ ជាពិសេស និងធានាថា កុមារនឹងមានអាហារទទួលទានក្នុងពេលមានវិបត្តិ»។
កម្មវិធីផ្តល់ស្បៀងអាហារតាមសាលារៀននៅកម្ពុជា និងជំនួយស្បៀងពិសេសនេះទទួលជំនួយឧបត្ថម្ភពីរាជរដ្ឋាភិបាលកម្ពុជា រដ្ឋាភិបាលជប៉ុន ទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងក្រសួងកសិកម្មនៃសហរដ្ឋអាមេរិក (USDA)៕
