.jpg)
លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ។ រូបថត សហការី
ភ្នំពេញៈ រដ្ឋាភិបាលកម្ពុជាតាមរយៈក្រសួង សេដ្ឋកិច្ច និងហិរញ្ញវត្ថុ បាននិងកំពុងពិនិត្យវាយតម្លៃលើ «សេចក្តីព្រាងច្បាប់ស្តីពីប្រព័ន្ធគាំពារសង្គម» ដែលបង្កើតឡើងក្នុងគោលបំណងដើម្បីធានាសុខុមាលភាព និងកាត់បន្ថយភាពរងគ្រោះផ្នែកសេដ្ឋកិច្ច និង ហិរញ្ញវត្ថុ។
សេចក្តីព្រាងច្បាប់នេះ ក៏ដើម្បីពង្រឹងសន្តិសុខប្រាក់ចំណូលរបស់ប្រជាពលរដ្ឋ និងលើកកម្ពស់សមភាពសង្គមតាមរយៈការបង្កើតនិងគ្រប់គ្រងប្រព័ន្ធគាំពារសង្គមប្រកបដោយបរិយាបន្ន វឌ្ឍនភាព និងចីរភាពហិរញ្ញវត្ថុ។
លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គម បានដឹកនាំសិក្ខាសាលាពិភាក្សាលើ «សេចក្តីព្រាងច្បាប់ស្តីពីប្រព័ន្ធគាំពារសង្គម» កាលពីថ្ងៃទី១ ខែកក្កដា ឆ្នាំនេះ តាមប្រព័ន្ធអនឡាញ។
លោក រស់ សីលវ៉ា ថ្លែងក្នុងសិក្ខាសាលានេះថា រដ្ឋាភិបាលបានទទួលស្គាល់ថា ការវិវឌ្ឍប្រព័ន្ធគាំពារសង្គមពិតជាមានតួនាទី ដើម្បីធានាសុខុមាលភាពផ្នែកហិរញ្ញវត្ថុប្រជាពលរដ្ឋកម្ពុជា។ ក្នុងក្របខ័ណ្ឌគោលនយោបាយជាតិគាំពារសង្គម ២០១៦-២០២៥ បានដើរតួនាទីយ៉ាងសំខាន់ក្នុងការបង្កើនផ្តល់លទ្ធភាពទទួលបានសេវាការគ្របដណ្តប់ពីកម្មវិធីជាតិជំនួយសង្គម និងរបបសន្តិសុខសង្គម សម្រាប់មន្រ្តីសាធារណៈ និងវិស័យឯកជន។
លោកថ្លែងទៀតថា ការរៀបចំសេក្តីព្រាងច្បាប់ស្តីពី ប្រព័ន្ធគាំពារសង្គម ស្របនឹងទស្សនៈរបស់រដ្ឋាភិបាលក្នុងការប្រែក្លាយពីប្រទេសមានចំណូលមធ្យមកម្រិតទាបទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រែក្លាយជាប្រទេសមានចំណូលខ្ពស់នៅឆ្នាំ ២០៥០។
លោកលើកឡើងថា៖ «ដើម្បីធានាបានសន្តិសុខប្រាក់ចំណូលរបស់ពលរដ្ឋ រដ្ឋាភិបាលមានកំណត់ចក្ខុវិស័យវែងឆ្ងាយក្នុងការអភិវឌ្ឍប្រព័ន្ធគាំពារសង្គមដែលជាឧបករណ៍បម្រើដល់ការកាត់បន្ថយនិងទប់ស្កាត់ភាពក្រីក្រ ភាពងាយរងគ្រោះ និងវិសមភាពសង្គម»។
សេចក្តីព្រាងច្បាប់ស្តីពីប្រព័ន្ធគាំពារសង្គម មាន ១០ ជំពូក និង ៩១ មាត្រា៕
