.jpg)
បុរសម្នាក់ត្រូវចាប់ខ្លួនបញ្ជូនទៅតុលាការ ក្រោយពីប្រើហិង្សាលើក្មេងអាយុ ២ ឆ្នាំស្លាប់។ រូបថត ប៉ូលិស
ភ្នំពេញៈ ឪពុកចុងដែលប្រើដៃវាយកូនស្រីចុងអាយុជាង ២ ខួបបណ្តាលឱ្យបាក់ឆ្អឹងជំនីរមុតសួតស្លាប់ត្រូវសមត្ថកិច្ចបញ្ជូនទៅសាលាដំបូងរាជធានីភ្នំពេញនៅថ្ងៃទី ២ កក្កដា បន្ទាប់ពីបង្កហេតុ និងចាប់ខ្លួនកាលពីថ្ងៃទី ៣០ មិថុនា ដែលប្រព្រឹត្តនៅសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញនោះ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ នៅថ្ងៃទី ១ កក្កដាថា ជនសង្ស័យឈ្មោះ សុខ រដ្ឋា អាយុ ២៩ ឆ្នាំ ជាកម្មកររោងចក្រ និងស្នាក់នៅបន្ទប់ជួលក្នុងភូមិឫស្សី ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ ចំណែកឯក្មេងស្រីរងគ្រោះស្នាក់នៅជាមួយយាយតាក្នុងភូមិសាស្ត្រសង្កាត់ស្ទឹងមានជ័យទី ២ ខណ្ឌមានជ័យ រាជធានីភ្នំពេញ។
លោកថ្លែងថា៖ «កម្លាំងសមត្ថកិច្ចខណ្ឌមានជ័យបានចាត់ចែងតាមនីតិវិធីហើយ ហើយត្រូវបញ្ជូនទៅសាលាដំបូងរាជធានី-ភ្នំពេញនៅថ្ងៃទី ២ កក្កដា»។
លោក ណេង សាមឿន នាយនគរបាលប៉ុស្តិ៍រដ្ឋបាលស្ទឹងមានជ័យទី២ ឱ្យដឹងនៅថ្ងៃទី ១ កក្កដាថា កាលពីវេលាម៉ោងជាង ១ រសៀលថ្ងៃទី ៣០ មិថុនា មានពលរដ្ឋរស់នៅក្នុងក្រុមទី៧ ភូមិឫស្សី ៣ សង្កាត់ស្ទឹងមានជ័យទី២ បានរាយការណ៍ប្រាប់កម្លាំងសមត្ថកិច្ចរបស់លោកថា មានករណីឪពុកចុងប្រើហិង្សាវាយកូនស្រីចុងបណ្តាលឱ្យស្លាប់។ ពេលនោះលោកបានចុះដល់ទីតាំងស្នាក់នៅរបស់កុមារីរងគ្រោះ និងឃើញកុមារីម្នាក់ស្លាប់ហើយលោក ឃើញមានស្នាមជាំម្រាមទាំងដៃ ៥ ជាប់នៅលើទ្រូងរបស់ក្មេងតែម្តង។
បន្ទាប់មកលោកបានរាយការណ៍ទៅលោក ម៉េង វិមានតារា អធិការនគរបាលខណ្ឌមានជ័យ និងរាយការណ៍បន្តទៅនគរបាលជំនាញផ្នែកបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ដើម្បីចុះធ្វើកោសល្យវិច័យលើសាកសពក្មេងរងគ្រោះ ខណៈជនសង្ស័យក៏ឃាត់ខ្លួនបានដែរ «ខ្ញុំសន្និដ្ឋានបឋមថា ការស្លាប់របស់ក្មេងពិតជាទទួលរងអំពើ ហិង្សាពីសំណាក់ឪពុកចុងនោះហើយ។ ខ្ញុំទុកការងារនេះឱ្យគ្រូពេទ្យ និងនគរបាលជំនាញទើបដឹងច្បាស់»។
លោកបញ្ជាក់ថា ការធ្វើកោសល្យវិច័យពីសំណាក់នគរបាលជំនាញពីគ្រូពេទ្យពិសេសពីសំណាក់អង្គការស៊ីភីយូ (CPU) របស់ប្រទេសអូស្ត្រាលីប្រចាំនៅកម្ពុជាមកឃើញថា ក្មេងរងគ្រោះមិនមែនស្លាប់ ដោយសារការរំលោភសេពសន្ថវៈទេតែជាការរងគ្រោះដោយអំពើហិង្សាធ្ងន់ធ្ងរពីសំណាក់ជនសង្ស័យជាឪពុកចុងនោះ។
លោក នង សុវណ្ណរ័ត្ន ជាគ្រូពេទ្យឯកទេសនៃក្រសួងសុខាភិបាលផ្នែកធ្វើកោសល្យវិច័យសាកសពបានប្រាប់នៅថ្ងៃទី ១ កក្កដា ដែរថា លោកបានចូលរួមធ្វើកោសល្យវិច័យលើសាកសពកុមារីរងគ្រោះនោះឃើញថាការស្លាប់របស់នាងគឺជាការប្រើអំពើហិង្សាធ្ងន់ធ្ងរ តែមិនមែនស្លាប់ដោយការរំលោភទេ៕
