.jpg)
សត្វជ្រូកនាំចូលពីវៀតណាមត្រូវបានសមត្ថកិច្ចចាប់ឃាត់ពីថ្ងៃ ២៨ មិថុនា។ រូបថត សហការី
ភ្នំពេញៈ លោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានឱ្យដឹងថា កម្ពុជា ហាមឃាត់ដាច់ខាត ការនាំជ្រូកចូលពីប្រទេសវៀតណាម ខណៈសត្វជ្រូកលួចនាំចូលពីប្រទេសមួយនេះចំនួន ៣០ ក្បាល នឹងត្រូវដុតកម្ទេចចោល បើលទ្ធផលរកឃើញថា មានជំងឺប៉េស្តជ្រូកអាហ្វ្រិក។
កាលពីយប់ថ្ងៃទី ២៧ ឈានចូលថ្ងៃទី ២៨ ខែ មិថុនា ឆ្នាំ ២០២១ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វបានចុះស្ទាក់ចាប់រថយន្ត ១ គ្រឿង ម៉ាក HYUNDAI បានដឹកជ្រូករស់ចំនួន ៣០ ក្បាល នៅលើផ្លូវជាតិលេខ ១ ក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ដឹកចេញពីប្រទេសវៀតណាម ចូលមកកម្ពុជាតាមច្រករបៀង ក្រុងបាវិត ដោយពុំមានលិខិតអនុញ្ញាតអ្វីទាំងអស់។ ក្រុមការងារបានបញ្ជូនបទល្មើស និងវត្ថុតាងទាំងនោះទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់។
លោក តាន់ ផាន់ណារ៉ា បានប្រាប់ភ្នំពេញប៉ុស្តិ៍នៅថ្ងៃទី ១ ខែកក្កដាថា ចំពោះជ្រូកដែលទើបចាប់បានចំនួន ៣០ ក្បាលនេះ គឺមិនទាន់ចេញលទ្ធផលវិភាគនៅឡើយទេ។ បើក្នុងករណីចេញលទ្ធផលវិភាគឃើញថា គ្មានផ្ទុកជំងឺប៉េស្តជ្រូកអាហ្វ្រិកនោះ ម្ចាស់អាជីវកម្មជ្រូកនេះនឹងទទួលពិន័យអន្តរការណ៍តាមច្បាប់ចន្លោះពី ១០ លានទៅ ១៥ លានរៀល។
ប៉ុន្តែលោកថា បើក្នុងករណីលទ្ធផលវិភាគលើជ្រូកទាំង ៣០ ក្បាលនេះមានផ្ទុកជំងឺ នោះអគ្គនាយកដ្ឋាននឹងសម្រេចដុតកម្ទេចបំផ្លាញចោលជ្រូកទាំងនេះដើម្បីការពារការឆ្លងរីករាលដាលទៅជ្រូកដទៃ។
លោក តាន់ ផាន់ណារ៉ា បញ្ជាក់ថា គ្រប់អាជីវកម្មនាំចូលជ្រូកទាំងអស់ពីប្រទេសវៀតណាមគឺត្រូវបានហាមឃាត់ដាច់ខាតក្នុងអំឡុងពេលនេះ ក៏ព្រោះតែប្រទេសនេះ កំពុងផ្ទុះរោគរាតត្បាតយ៉ាងខ្លាំងបើទោះជាមានក្រុមហ៊ុន ស្នើសុំនាំចូលតាមច្បាប់ក៏ដោយ។
លោកបានបញ្ជាក់ថា៖ «ដូច្នេះ រាល់ជ្រូកដែលត្រូវបាននាំចូលពីប្រទេសវៀតណាម គឺជាការលួចនាំចូលដោយខុសច្បាប់។ ចំណែកការនាំចូលជ្រូកពីប្រទេសថៃ ក៏នៅតែមានការលួចនាំចូលដោយខុសច្បាប់ដែរ»។
លោក តាន់ ផាន់ណារ៉ា បញ្ជាក់ថា៖ «យើងនឹងនៅតែរឹតបន្តឹងការនាំចូលដោយខុសច្បាប់ដដែល ដោយសារហានិភ័យជំងឺប៉េស្តជ្រូកអាហ្វ្រិកនេះ វាធ្ងន់ណាស់ បើសិនមានការលួចនាំចូលពីប្រទេសវៀតណាមមកប្រទេសយើង វានឹងបំផ្លាញសេដ្ឋកិច្ចដល់កសិករ ក៏ដូចជាម្ចាស់កសិដ្ឋានធ្ងន់ធ្ងរតែម្តង»។
ក្រៅពីការចុះទប់ស្កាត់ការនាំចូលជ្រូកដោយខុសច្បាប់ពីប្រទេសវៀតណាម កាលពីយប់ថ្ងៃទី ២៩ ខែមិថុនា ឆ្នាំ ២០២១ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ សហការជាមួយការិយាល័យផលិតកម្ម និងបសុព្យាបាលខេត្តបន្ទាយមានជ័យ និងកងរាជអាវុធហត្ថ ស្រុកម៉ាឡៃក៏បានចុះស្ទាក់ចាប់បទល្មើសចរាចរណ៍សត្វជ្រូកនេះផងដែរ។
ក្នុងប្រតិបត្តិការនេះ គឺបានដកហូតសត្វជ្រូករស់ចំនួន ៥ ក្បាលនៅទីតាំងស្តុកសត្វមួយកន្លែង នៅភូមិអូរស្រឡៅ ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យជាជ្រូកដែលដឹកចេញពីប្រទេសថៃចូលមកកម្ពុជាតាមច្រករបៀងក្នុងស្រុកម៉ាឡៃដោយពុំមានលិខិតអនុញ្ញាតអ្វីទាំងអស់ ខណៈដែលសត្វមាន់រស់ចំនួន ៥៨៨ ក្បាល ក៏ត្រូវបានដកហូតផងដែរ។ នេះបើតាមអគ្គនាយកដ្ឋានសុខភាពសត្វ និងផលិតកម្មសត្វបានឱ្យដឹងនៅថ្ងៃទី ៣០ មិថុនា។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានសាទរ ចំពោះចំណាត់ការទាំងឡាយរបស់សមត្ថកិច្ចក្នុងការទប់ស្កាត់ការលួចនាំចូលជ្រូក ខណៈដែលលោកបារម្ភពីហានិភ័យ ដែលអាចធ្វើឱ្យជ្រូកក្នុងស្រុកឆ្លងងាប់។
លោកបាននិយាយបន្តថា ជំងឺប៉េស្តជ្រូកអាហ្វ្រិក គឺងាយឆ្លងបំផុត ហើយមិនមានថ្នាំការពារ និងព្យាបាលនោះទេ បើកាលណាមានការប៉ះពាល់សត្វជ្រូកមានជំងឺតាមរយៈរុយ ឬចៃរបស់សត្វជ្រូកនោះហើយ គឺងាយនឹងចម្លងជំងឺនេះបំផុត ទៅកាន់សត្វជ្រូកក្នុងស្រុកដទៃទៀត។
លោកបញ្ជាក់ថា៖ «ជំងឺប៉េស្តជ្រូកអាហ្វ្រិកនេះ សាហាវបំផុតដែលតាមការសិក្សាមក គឺជាង ១០០ ឆ្នាំហើយអត់មានវ៉ាក់សាំងការពារ និងព្យាបាលសត្វជ្រូកទេ។ បើសិនណាតែឆ្លងចូលមកជ្រូកក្នុងទ្រុងយើងតែ ១ គឺ ១ ហ្នឹងនឹងធ្វើឱ្យជ្រូកនៅក្នុងទ្រុងឈឺងាប់ទាំងអស់។ គឺថា បើមាន ១ ០០០ ក្បាល គឺងាប់ទាំង ១ ០០០ ក្បាល បើមាន ១ ម៉ឺនជ្រូកគឺងាប់ទាំង ១ ម៉ឺនមិនមែនឆ្លងហើយឈប់ទេ»។
កាលពីឆ្នាំ ២០១៩ កម្ពុជាធ្លាប់ផ្ទុះជំងឺប៉េស្តជ្រូកអាហ្វ្រិកនេះម្តងរួចមកហើយ ដោយការឆ្លងចូលនូវជំងឺប៉េស្តជ្រូកអាហ្វ្រិកកាលនោះ ជាហេតុបានធ្វើឱ្យកម្ពុជាជួបប្រទះនូវការខ្វះជ្រូកសម្រាប់ផ្គត់ផ្គង់ទីផ្សារក្នុងស្រុក ដោយសារតែត្រូវសម្លាប់ជ្រូកដែលឆ្លងក្នុងស្រុករាប់ពាន់ក្បាល។ នេះបើតាមក្រសួងកសិកម្ម រុក្ខាប្រមាញ់ និងនេសាទ៕
