ភ្នំពេញៈ សមត្ថកិច្ចរាជធានីភ្នំពេញនៅថ្ងៃទី ២ ខែកក្កដានេះ បានបញ្ជូនបុរសអាយុ ២៩ ឆ្នាំម្នាក់ដែលជាប់ចោទពីបទធ្វើទារុណកម្មសម្លាប់កូនស្រីចុងអាយុ ២ ឆ្នាំរបស់ខ្លួនកាលពី ២ ថ្ងៃមុន ទៅតុលាការ។
អង្គភាពការពារកុមារ (CPU) បញ្ជាក់ក្នុងហ្វេសប៊ុកនៅថ្ងៃទី ២ ខែកក្កដាថា៖ «ជាលទ្ធផលនៃការស៊ើបអង្កេតទៅលើការស្លាប់របស់កុមារីអាយុ ២ ឆ្នាំនៅរាជធានីភ្នំពេញកាលពីថ្ងៃទី ៣០ ខែមិថុនា បុរសអាយុ ២៩ ឆ្នាំម្នាក់ ត្រូវជាឪពុកចុងរបស់កុមារីរងគ្រោះត្រូវបានបញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការផ្តន្ទាទោសពីបទឃាតកម្មទៅលើកុមារ»។
លោក James McCABE នាយកប្រតិបត្តិ CPU បានថ្លែងក្នុងទំព័រហ្វេសប៊ុករបស់ CPU ថា សេចក្តីបំភ្លឺដំបូងរបស់ជនសង្ស័យ ដែលរៀបរាប់អំពីមូលហេតុបង្កឱ្យមានរបួសជាច្រើនដែលមាននៅលើសាកសពកុមារីរងគ្រោះគឺមិនសមស្របនោះទេ។
លោកថ្លែងថា៖ «ហើយបន្ទាប់ពីការស៊ើបអង្កេតបន្ថែម និងការធ្វើកោសល្យវិច័យសាកសពកុមារីរងគ្រោះ យើងមានភ័ស្តុតាងជាក់ស្តែងបង្ហាញថា កុមារីនេះត្រូវបានគេវាយយ៉ាងឃោរឃៅ រហូតដល់ទទួលមរណភាព»។
លោក James បន្តថា ពេលដែលសមត្ថកិច្ចបង្ហាញភ័ស្តុតាងកោសល្យវិច័យទាំងនេះទៅកាន់ជនសង្ស័យ ជនសង្ស័យក៏បានសារភាពពីបទល្មើស និងបានរៀបរាប់យ៉ាងពេញលេញអំពីសកម្មភាពហិង្សាទៅលើកុមាររងគ្រោះ។
ស្នងការដ្ឋាននគរបាលរាជធានីភ្នំពេញបញ្ជាក់ក្នុងទំព័រហ្វេសប៊ុកនៅថ្ងៃទី ២ ខែកក្កដាថា៖ «ជនសង្ស័យជាឪពុកចុងឈ្មោះ សុខ រដ្ឋា ត្រូវបានសមត្ថកិច្ចឃាត់ខ្លួនលើករណីអំពើឃាតកម្ម (យកជង្គង់អុកលើដើមទ្រូងបណ្តាលឲ្យស្លាប់) ត្រូវបានបញ្ជូនទៅសាលាដំបូងរាជធានីភ្នំពេញនៅព្រឹកថ្ងៃទី ០២ ខែកក្កដា ឆ្នាំ ២០២១»។
ជនសង្ស័យមានទីលំនៅផ្ទះជួលផ្លូវលំភូមិឫស្សី សង្កាត់ស្ទឹងមានជ័យទី ២ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ មានផ្ទុកសារធាតុញៀន ហើយក្មេងស្រីរងគ្រោះរស់នៅផ្ទះដែលមានទីលំនៅជាមួយជនសង្ស័យដែរ។
កាលពីថ្ងៃទី ៣០ ខែមិថុនា ឆ្នាំ ២០២១ នៅចំណុចផ្ទះជួលនេះ ជនសង្ស័យបានយកជង្គត់អុកលើដើមទ្រូងក្មេងស្រីរងគ្រោះ បណ្ដាលឲ្យរបួសធ្ងន់ធ្ងរ ហើយក៏បាននាំយកសាកសពក្មេងរងគ្រោះទៅឱ្យជីតារបស់នាង ដោយភូតកុហកថា រូបគេរអិលជើងដួលក្នុងបន្ទប់ទឹក សង្កត់លើក្មេងរងគ្រោះបណ្ដាលឲ្យស្លាប់។
ហ្វេសប៊ុកដដែលបន្តថា ជីតារបស់ក្មេងរងគ្រោះក៏បានរាយការណ៍ប្រាប់សមត្ថកិច្ចប៉ុស្តិ៍នគរបាលស្ទឹងមានជ័យទី ២ ដែលបានសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ និងកម្លាំងការិយាល័យនគរបាលបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញបានចុះពិនិត្យលើសាកសពក្មេងរងគ្រោះ ហើយឃើញមានស្នាមជាំខ្លួនប្រាណជាច្រើនកន្លែងដែលមិនអាចរអិលជើងដួលសង្កត់លើដូចការអះអាងរបស់ជនសង្ស័យនោះទេ។
ប្រភពដដែលបញ្ជាក់ថា៖ «ពេលនោះសមត្ថកិច្ចយើងបាននាំខ្លួនជនសង្ស័យឈ្មោះ សុខ រដ្ឋា យកមកសាកសួរនៅទីស្នាក់ការប៉ុស្តិ៍នគរបាលស្ទឹងមានជ័យទី ២ រយៈពេលយ៉ាងយូរទើបជនសង្ស័យឈ្មោះ សុខ រដ្ឋា ព្រមឆ្លើយសារភាពថា រូបគេពិតជាបានវាយ និងយកជង្គង់អុកលើដើមទ្រូងជនរងគ្រោះ បណ្តាលឲ្យស្លាប់ ពិតប្រាកដមែន»។
ហ្វេសប៊ុកដដែលបន្តថា បន្ទាប់មកម្ដាយបង្កើតរបស់ក្មេងរងគ្រោះបានមកដាក់ពាក្យបណ្ដឹងនៅទីស្នាក់ការប៉ុស្តិ៍នគរបាលស្ទឹងមានជ័យទី ២ ឲ្យចាត់ការតាមផ្លូវច្បាប់ចំណែកសាកសពក្មេងរងគ្រោះត្រូវបានប្រគល់ឲ្យម្ដាយយកទៅធ្វើបុណ្យនៅវត្តសំបួរ សង្កាត់ដង្កោខណ្ឌដង្កោរាជធានីភ្នំពេញ។
ជនសង្ស័យរូបនេះត្រូវបានឃាត់ខ្លួន នៅអធិការដ្ឋាននគរបាលខណ្ឌមានជ័យ នៅពេលនាំខ្លួនទៅសាកសួរ៕