.jpg)
សេចក្ដីប្រកាសព័ត៌មានរបស់រដ្ឋបាលខណ្ឌបឹងកេងកង។ រូបថត រដ្ឋបាលខណ្ឌបឹងកេងកង
ភ្នំពេញ៖ អាជ្ញាធរខណ្ឌបឹងកេងកងបានព្រមានថា ប្រសិនបើអាជីវករផ្សារអូឡាំពិករូបណា មិនទៅផ្តល់សំណាក ដើម្បីធ្វើតេស្តរកមេរោគកូវីដ ១៩ នោះអាជ្ញាធរនឹងមិនអនុញ្ញាតឱ្យចូលលក់វិញឡើយ ខណៈផ្សារនេះត្រូវបានផ្អាកជាបណ្តោះអាសន្ន ដោយសារមានអាជីវករ និងបុគ្គលិកផ្សារឆ្លងជំងឺកូវីដ។
សាលាខណ្ឌបឹងកេងកងបញ្ជាក់ក្នុងសេចក្តីជូនដំណឹងនៅថ្ងៃទី ២ ខែកក្កដាថា ស្ថានភាពនៃការរីករាលដាលនៃជំងឺកូវីដ ១៩ ក្នុងរយៈពេលប៉ុន្មានថ្ងៃចុងក្រោយនេះ បណ្តាលឱ្យអាជីវករផ្សារអូឡាំពិកបានឆ្លងវីរុសកូវីដ ១៩ យ៉ាងឆាប់រហ័ស គួរឱ្យព្រួយបារម្ភ និងចាំបាច់ត្រូវមានវិធានការសុខាភិបាល ដើម្បីទប់ស្កាត់ជាបន្ទាន់។
សាលារាជធានីភ្នំពេញនៅថ្ងៃទី ២ ខែកក្កដានេះ បានសម្រេចផ្អាកដំណើរការផ្សារអូឡាំពិករយៈពេល ១៤ ថ្ងៃ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ បន្ទាប់ពីអាជីវករ និងបុគ្គលិកផ្សារនេះ ត្រូវបានរកឃើញមានវិជ្ជមានកូវីដ ១៩។
សេចក្តីជូនដំណឹងរបស់សាលាខណ្ឌបឹងកេងកងបញ្ជាក់ថា៖ «រដ្ឋបាលខណ្ឌបឹងកេងកង សូមអំពាវនាវបងប្អូន ដែលជាអាជីវករផ្សារ បងប្អូនប្រជាពលរដ្ឋដែលរស់នៅជុំវិញផ្សារ សូមអញ្ជើញមកយកសំណាកតេស្តរកវីរុសកូវីដ ១៩ នៅបរិវេណវិទ្យាល័យទួលស្វាយព្រៃ នៅថ្ងៃសុក្រ ទី ០២ ខែ កក្កដា ឆ្នាំ ២០២១ ជាបន្ទាន់»។
ជាមួយគ្នានេះ អាជ្ញាធរខណ្ឌបឹងកេងកង បានអំពាវនាវដល់អាជីវករផ្សារ និងប្រជាពលរដ្ឋត្រូវអនុវត្តនូវវិធាននានាស្របតាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួនបំផុង។
សាលាខណ្ឌនេះព្រមានថា៖ «ប្រសិនបើបងប្អូនដែលជាអាជីវករមិនចូលរួមយកសំណាក គណៈកម្មការផ្សារមិនអនុញ្ញាតឱ្យបងប្អូនចូលលក់ដូរវិញនោះទេ»។
ទោះយ៉ាងណា រដ្ឋបាលខណ្ឌបឹងកេងកងសង្ឃឹមជឿជាក់ថា ប្រជាពលរដ្ឋ ជាពិសេសអាជីវករផ្សារអូឡាំពិកទាំងអស់ដែលកំពុងប្រកបអាជីវកម្មក្នុងមូលដ្ឋានផ្សារអូឡាំពិកមានការយោគយល់ និងចូលរួមអនុវត្តសេចក្តីជូនដំណឹងរបស់អាជ្ញាធរខណ្ឌនេះឱ្យមានប្រសិទ្ធភាព៕
វីដេអូ៖
