.jpg)
ផ្សារសាលាលេខ ៥ ត្រូវបានបិទ បន្ទាប់ពីរកឃើញអ្នកវិជ្ជមានកូវីដបានចេញចូលផ្សារនេះ។ រូបថត សហការី
កំពង់ឆ្នាំង៖ អាជ្ញាធរខេត្តកំពង់ឆ្នាំងបានសម្រេចបិទផ្សារសាលាលេខ ៥ ដែលស្ថិតក្នុងស្រុកកំពង់ត្រឡាច ជាបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ ១៩ បន្ទាប់ពីរកឃើញអ្នកផ្ទុកជំងឺកូវីដ ១៩ បានចេញចូលផ្សារនេះ។
រដ្ឋបាលខេត្តកំពង់ឆ្នាំងបញ្ជាក់ក្នុងសេចក្តីសម្រេចនៅថ្ងៃទី ២ ខែកក្កដានេះថា៖ «ត្រូវបិទជាបណ្តោះអាសន្នផ្សារសាលាលេខ ៥ ចាប់ពីថ្ងៃទី ០៣ ខែ កក្កដា ឆ្នាំ ២០២១ តទៅ រហូតដល់មានការសម្រេចជាថ្មី»។
រដ្ឋបាលខេត្តកំពង់ឆ្នាំងបន្តថា៖ «ការបិទជាបណ្តោះអាសន្នទីតាំងខាងលើនេះ ដើម្បីទប់ស្កាត់ការរាលដាលជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ បន្ទាប់ពីបានរកឃើញអ្នកវិជ្ជមានកូវីដ ១៩ ធ្លាប់បានចេញ-ចូលទីតាំងខាងលើ»។
ក្នុងអំឡុងពេលបិទផ្សារសាលាលេខ ៥ ដែលស្ថិតនៅភូមិសាលាលេខ ៥ ឃុំអូរឫស្សីជាបណ្តោះអាសន្ននេះ រដ្ឋបាលខេត្តនឹងហ៊ុមព័ទ្ធទីតាំងផ្សារនេះទាំងមូល និងផ្អាកសកម្មភាពលក់ដូរ និងការចេញចូលផ្សារនេះជាបណ្តោះអាសន្ន។
រដ្ឋបាលខេត្តកំពង់ឆ្នាំងនឹងស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកសំណាកក្នុងអំឡុងការបិទផ្សារនេះ។
ជាមួយគ្នានេះ រដ្ឋបាលខេត្តកំពង់ឆ្នាំង អំពាវនាវដល់ប្រជាពលរដ្ឋដែលធ្លាប់ចេញចូល និងអ្នកមានការពាក់ព័ន្ធផ្ទាល់ ឬប្រយោលក្នុងផ្សារនេះ ឱ្យតាមដានសុខភាពជាប់ជាប្រចាំ និងប្រញាប់ទំនាក់ទំនងមកមន្ទីរពេទ្យខេត្តកំពង់ឆ្នាំង ឬមណ្ឌលសុខភាពដែលនៅជិតបំផុត ដើម្បីយកសំណាកធ្វើតេស្តជាបន្ទាន់ ចាប់ពីថ្ងៃទី ៣ ខែកក្កដា និងត្រូវធ្វើចត្តាឡីស័កស្របតាមការណែនាំ៕
