.jpg)
មន្រ្តីត្រួតពិនិត្យយានយន្តចូលថ្លឹងទម្ងន់ នាពេលកន្លងមក។ រូបថត MPWT
ភ្នំពេញ៖ គិតចាប់ពីថ្ងៃទី ១៦ ខែ វិច្ឆិកា ឆ្នាំ ២០២០ ដល់ថ្ងៃទី ០១ ខែ កក្កដា ឆ្នាំ ២០២១ បានផាកពិន័យ និងឃាត់រក្សាទុករថយន្តចំនួន ១៤៣ គ្រឿង ដែលជារថយន្តដឹកជញ្ជូនលើសទម្ងន់លើសពី ២០% នៃទម្ងន់អនុញ្ញាត។
នេះ បើយោងតាមរបាយការណ៍របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកលើសទម្ងន់កម្រិតកំណត់នៅថ្ងៃទី ៣ ខែ កក្កដា ឆ្នាំ ២០២១។
របាយការណ៍នេះបញ្ជាក់ថា រថយន្តដឹកលើសទម្ងន់ទាំងនោះត្រូវបានឃាត់ទុកដោយក្រុមការងារក្រសួងចល័តចម្រុះសម្រាប់ឆ្មក់ត្រួតពិនិត្យយានយន្តលើសទម្ងន់ ដែលចុះតាមបណ្តាខេត្តនានា និងគោលដៅដើមទីនៅខេត្តបាត់ដំបង និងស្ថានីយ៍ជញ្ជីងអចល័តទូទាំងព្រះរាជាណាចក្រកម្ពុជា។
លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនថ្លែងថា ក្រសួងនឹងចាត់វិធានការណ៍តាមនីតិវិធីដោយគ្មានយោគយល់ខ្សែនរណាឡើយ ហើយសកម្មភាពនៃការចុះប្រតិបត្តិការនេះ នឹងធ្វើជាបន្តបន្ទាប់ទូទាំងប្រទេសដូចភ្លៀងរលឹម ដើម្បីរឹតបន្តឹងការដឹកជញ្ជូនឲ្យស្របតាមច្បាប់ ការពារមិនឱ្យមានជនខិលខូចដឹកលើសទម្ងន់ឡើយ។
លោក ស៊ុន ចាន់ថុល ថ្លែងថា៖ «ក្រសួងនៅតែបន្តអនុវត្តវិធានការនេះបន្តទៀត ដោយមិនយោគយល់ចំពោះឡានអ្នកក្រ ឡានអ្នកមាន អ្នកមានខ្នង ឬឡានអ្នកអត់ខ្នងអ្វីឡើយ ព្រោះរថយន្តដឹកលើសទាំងនោះ ធ្វើឱ្យខូចផ្លូវដូចគ្នា»។
លោក ស៊ុន ចាន់ថុល បានអំពាវនាវឱ្យបងប្អូនប្រជាពលរដ្ឋ អ្នកប្រើប្រាស់ផ្លូវ គោរពច្បាប់ទាំងអស់គ្នា ចូលរួមថែរក្សាទ្រព្យសម្បត្តិជាតិយើងឱ្យបានគង់វង្ស និងប្រើប្រាស់បានយូរអង្វែង ដោយហេតុថា រាជរដ្ឋាភិបាលបានខិតខំប្រឹងប្រែងរកថវិកាមកសាងសង់ដោយលំបាក។
លោក ស៊ុន ចាន់ថុល ថ្លែងថា៖ «សូមកុំប្រថុយប្រថានដឹកជញ្ជូនលើសទម្ងន់ ដែលបង្កឱ្យផ្លូវឆាប់ខូចមុនអាយុកាលកំណត់ បង្កគ្រោះថ្នាក់ចរាចរណ៍ និងកុំបើកលើសល្បឿនកំណត់ដោយច្បាប់ ដើម្បីចូលរួមចំណែកក្នុងការកសាងប្រទេសជាតិមាតុភូមិរបស់យើងឱ្យកាន់តែរីកចម្រើនថែមទៀត ក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា»។
ជាថ្មីម្តងទៀត ក្រសួងសាធារណការ បានក្រើនរំឭកដល់ម្ចាស់រោងចក្រស៊ីម៉ងត៍ដូចជា រោចចក្រស៊ីម៉ងត៍ CONCH ការដ្ឋានផលិតថ្ម ដេប៉ូខ្សាច់ ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ថា ក្រសួងនឹងបន្តអនុវត្តតាមច្បាប់ និងសេចក្ដីជូនដំណឹងខាងលើយ៉ាងតឹងបំផុតដោយគ្មានការលើកលែងឡើយ៕
វីដេអូ៖
