ភ្នំពេញ៖ ក្រសួងសាធារណការ និងដឹកជញ្ជូន និងក្រុមហ៊ុន AMBODIAN PPSHV EXPRESSWAY CP., LTD (CPEC) ដែលជាក្រុមហ៊ុនសាងសង់ផ្លូវល្បឿនលឿនតភ្ជាប់ពីភ្នំពេញទៅកាន់ខេត្តព្រះសីហនុ បើកកិច្ចប្រជុំដើម្បីស្វែងរកដំណោះស្រាយផលប៉ះពាល់ពីគម្រោងដែលនៅសេសសល់។
កិច្ចប្រជុំនេះ ត្រូវបានធ្វើឡើងកាលពីម្សិលមិញនេះ ដោយភាគីទាំង ២ ពិភាក្សាទាក់ទងនឹងបញ្ហាផ្លូវវាងជាកម្មសិទ្ធិឯកជន ផ្លូវកាត់ទទឹងតូចៗ លូឆ្លងកាត់ក្រោមផ្លូវល្បឿនលឿនក៏ដូចជាបញ្ជរ និងបញ្ហាមួយចំនួនផ្សេងទៀត ដែលមិនទាន់មានការឯកភាពគ្នានៅក្នុងគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿននេះ ដើម្បីពន្លឿនការអនុវត្តគម្រោងនេះ ឱ្យបានចប់ជាស្ថាពរតាមផែនការដែលបានគ្រោងទុក។
លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូនថ្លែងថា ក្រសួងនឹងព្យាយាមជួយសម្របសម្រួល សហការដោះស្រាយ ដើម្បីជំរុញការងារសាងសង់នេះឱ្យទាន់ពេលវេលា ដើម្បីអាចបញ្ចប់គម្រោងនៅឆ្នាំក្រោយ និងបានស្នើឱ្យក្រុមហ៊ុនសាងសង់ និងភាគីពាក់ព័ន្ធដទៃទៀតធ្វើការបន្ទន់ឥរិយាបថទន់ភ្លន់ដាក់គ្នាទៅវិញទៅមក រួបរួមគ្នាដោះស្រាយបញ្ហាប្រឈមទាំងអស់គ្នា ចៀសវាងការដោះស្រាយបញ្ហាតែភាគីម្ខាងណាមួយ។
ជាមួយគ្នានេះ លោក សួង ហេង បានណែនាំឱ្យក្រុមហ៊ុនសាងសង់ទៅធ្វើការសិក្សាឱ្យបានលម្អិតលើទីតាំងរងផលប៉ះពាល់ទាំងនោះ ដោយកែតម្រូវទៅតាមភូមិសាស្ត្រជាក់ស្តែង ដើម្បីកាត់បន្ថយការដោះស្រាយផលប៉ះពាល់ឱ្យបានច្រើនតាមកម្រិតដែលអាចធ្វើទៅបាន ហើយដាក់ជូនលទ្ធផលនៃការសិក្សានោះទៅថ្នាក់ដឹកនាំ ក៏ដូចជាគណៈកម្មការបច្ចេកទេសពិនិត្យដោះស្រាយ។
គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៩០ គីឡូម៉ែត្រ ដែលបានបើកការដ្ឋានសាងសង់កាលពីខែកក្កដា ឆ្នាំ ២០១៩ គិតត្រឹមថ្ងៃទី ១១ ខែ មិថុនា ឆ្នាំ ២០២១ ដំណើរការសាងសង់សម្រេចបាន ៥៥,០៥% ហើយ និងគ្រោងបញ្ចប់នៅថ្ងៃទី ៣១ ខែ ឧសភា ឆ្នាំ ២០២៣។ ផ្លូវនេះ តភ្ជាប់ពីភូមិ ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ ១ សង្កាត់លេខ ៣ ក្រុងព្រះសីហនុ៕