.jpg)
លោក អ៊ុក សោភ័ណ ឯកអគ្គរាជទូតវិសាមញ្ញ និងពេញសមត្ថភាពកម្ពុជាប្រចាំប្រទេសថៃ និងលោកស្រី Ara Lucy Gentil Cabral Petersen ឯកអគ្គរដ្ឋទូតវិសាមញ្ញ និងពេញសមត្ថភាពប្រេស៊ីលប្រចាំកម្ពុជា ក្នុងពិធីចុះកិច្ចព្រមព្រៀងកាលពីម្សិលមិញ។ រូបថត ស្ថានទូតកម្ពុជាប្រចាំប្រទេសថៃ
ភ្នំពេញ៖ កម្ពុជា និងសាធារណរដ្ឋសហព័ន្ធប្រេស៊ីល បានចុះកិច្ចព្រមព្រៀងកិច្ចសហប្រតិបត្តិការបច្ចេកទេស និងបង្កើតក្របខ័ណ្ឌសំដៅលើកកម្ពស់កិច្ចសហប្រតិបត្តិការបច្ចេកទេស ដែលភាគីទាំង ២ ផ្តល់អាទិភាព។
លោក អ៊ុក សោភ័ណ ឯកអគ្គរាជទូតវិសាមញ្ញ និងពេញសមត្ថភាពកម្ពុជាប្រចាំប្រទេសថៃ ថ្លែងក្នុងពិធីចុះកិច្ចព្រមព្រៀងកាលពីម្សិលមិញ បានលើកឡើងពីទំនាក់ទំនងល្អរវាងកម្ពុជា និងប្រេស៊ីល។
លោក អ៊ុក សោភ័ណ ក៏បានបង្ហាញជំនឿចិត្តថា កិច្ចព្រមព្រៀងថ្ងៃនេះ នឹងផ្តល់ឱកាសដល់ប្រទេសទាំង ២ បន្តពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការកាន់តែស៊ីជម្រៅថែមទៀត លើវិស័យអាទិភាពសំខាន់ៗនាពេលអនាគត។
លោកស្រី Ara Lucy Gentil Cabral Petersen ឯកអគ្គរដ្ឋទូតវិសាមញ្ញ និងពេញសមត្ថភាពប្រេស៊ីលប្រចាំកម្ពុជាលោកស្រីមានក្តីរីករាយណាស់ ដែលប្រេស៊ីល និងកម្ពុជា អាចចុះហត្ថលេខាលើកិច្ចព្រមព្រៀងជាប្រវត្តិសាស្ត្រនេះ ដើម្បីបើកផ្លូវឱ្យប្រទេសទាំង ២ ឈានទៅពង្រឹងទំនាក់ទំនងមិត្តភាពកាន់តែរឹងមាំ និងបង្កើនកិច្ចសហប្រតិបត្តិការលើគ្រប់វិស័យប្រកបដោយផ្លែផ្កា។
លោក Ara Lucy Gentil Cabral Petersen ក៏មានមោទនភាពផងដែរ ដែលកិច្ចការនេះ អាចសម្រេចបានមុនពេលបញ្ចប់អាណត្តិបេសកកម្មការទូតនៅខែក្រោយ។
ប្រទេសកម្ពុជា និងប្រេស៊ីល បានភ្ជាប់ទំនាក់ទំនងការទូតជាមួយគ្នាកាលពីថ្ងៃទី ២៥ ខែ មីនា ឆ្នាំ ១៩៩៤។ ប្រេស៊ីល គឺជាប្រទេសប្រកបដោយសក្តានុពល ព្រោះជាប្រទេសធំជាងគេលំដាប់ទី៥ នៅលើពិភពលោក និងមានប្រជាជនសរុបប្រមាណ ២១១ លាននាក់៕
