ភ្នំពេញ៖ លោកនាយករដ្ឋមន្ត្រី ហ៊ុន សែន នាព្រឹកថ្ងៃសៅរ៍ ទី៣ ខែកក្កដានេះ បានអនុញ្ញាតឱ្យលោក វ៉ូ ក្វាង មិញ (Vu Quang Minh) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាម ចូលជួបសម្ដែងការគួរសមពិភាក្សាការងារ និងជម្រាបលា ក្នុងឱកាសដែលលោកត្រូវចប់បេសកកម្មការទូតនៅព្រះរាជាណាចក្រកម្ពុជា។
លោក Vu Quang Minh បានអះអាងថា ក្នុងរយៈពេល ៣ ឆ្នាំ ៧ខែ នៃអាណត្តិរបស់លោក កន្លងមកនេះ ទំនាក់ទំនងរវាងប្រទេសកម្ពុជា-វៀតណាម គឺមានការរឹងមាំ និងមានការរីកចម្រើន។
លោក ឯកអគ្គរដ្ឋទូតផុតអាណត្តិរូបនេះបន្តថា ដោយឡែកវិស័យវិនិយោគ ពាណិជ្ជកម្មក៏មានការកើនឡើងផងដែរ។
លោក Vu Quang Minh បានថ្លែងអំណរគុណដល់កម្ពុជា និងមន្ត្រីគ្រប់លំដាប់ថ្នាក់ផងដែរដែលបានចូលរួមចំណែកសហការជាមួយលោកក្នុងបេសកកម្មការទូតរបស់លោកនៅកម្ពុជា ឱ្យទទួលបាននូវភាពជោគជ័យមកដល់ពេលនេះ។
លោកនាយករដ្ឋមន្ត្រី ហ៊ុន សែន ក៏បានយល់ស្របជាមួយអ្វីដែលលោក Vu Quang Minh បានលើកឡើង និងបានអរគុណចំពោះការប្រឹងប្រែងអស់ពីកម្លាំងកាយចិត្តបំពេញបេសកកម្មការទូតនៅកម្ពុជា ធ្វើឲ្យទំនាក់ទំនងរវាងប្រទេសទាំងពីរមានការរីកចម្រើនកាន់តែរឹងមាំ។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បញ្ជាក់ថា ក្នុងកាលៈទេសៈនេះអ្វីដែលគប្បីត្រូវធ្វើគឺទី១ ការគ្រប់គ្រងប្រយុទ្ធប្រឆាំងនឹងជំងឺកូវី១៩ តាមរយៈវិធានការសុខាភិបាល តែធ្វើយ៉ាងណាកុំរារាំងដំណើរការពាណិជ្ជកម្ម ទី២ បន្តជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ ទី៣ ពិនិត្យមើលវិស័យដទៃទៀតដែលប្រទេសទាំងពីរអាចជំរុញធ្វើការរួមគ្នាបាន៕