The Phnom Penh Post Search

Search form

Logo of Phnom Penh Post newspaper Phnom Penh Post - ឯកអគ្គរដ្ឋ​ទូត​ឥណ្ឌា បង្ហាញ​ការ​គាំទ្រ​គម្រោង​ក្នុង​ការ​រួម​ចំណែក​អភិវឌ្ឍ​តំបន់​សហគមន៍​ទេសចរណ៍ ទួលព័ន្ធ​តាឡី




ឯកអគ្គរដ្ឋ​ទូត​ឥណ្ឌា បង្ហាញ​ការ​គាំទ្រ​គម្រោង​ក្នុង​ការ​រួម​ចំណែក​អភិវឌ្ឍ​តំបន់​សហគមន៍​ទេសចរណ៍ ទួលព័ន្ធ​តាឡី

Content image - Phnom Penh Post
​សហគមន៍​ទេសចរណ៍​ទួលព័ន្ធតាឡី (បឹងស្នេហ៍) ក្នុង​ខេត្ត​ព្រៃវែង។ ក្រសួង​ទេសចរណ៍

ឯកអគ្គរដ្ឋ​ទូត​ឥណ្ឌា បង្ហាញ​ការ​គាំទ្រ​គម្រោង​ក្នុង​ការ​រួម​ចំណែក​អភិវឌ្ឍ​តំបន់​សហគមន៍​ទេសចរណ៍ ទួលព័ន្ធ​តាឡី

ភ្នំពេញៈ ឯកអគ្គរដ្ឋទូត​ឥណ្ឌា​ប្រចាំ​កម្ពុជា លោកស្រី Devyani Khobragade បាន​បង្ហាញ​ការ​គាំទ្រ​ចំពោះ​គម្រោង​ដែល​មាន​ឥទ្ធិពលលឿន (Quick Impact Project) ដែល​បាន​ស្នើ​ឡើង​ដោយ​ក្រសួង​ទេសចរណ៍​ក្នុង​ការ​រួម​ចំណែក​អភិវឌ្ឍ​តំបន់​សហគមន៍​ទេសចរណ៍​ទួលព័ន្ធតាឡី (បឹងស្នេហ៍) ក្នុង​ខេត្ត​ព្រៃវែង បន្ទាប់​ពី​បាន​ធ្វើ​ទស្សនកិច្ច​ទីនោះ។

អ្នក​នាំ​ពាក្យ​ក្រសួង​ទេសចរណ៍ លោក ជុក ជំនោ ថ្លែង​ប្រាប់​ភ្នំពេញ​ប៉ុស្តិ៍​នៅ​រសៀល​ថ្ងៃ​ទី​៣ ខែ​កក្កដា នេះ​ថា កាល​ពី​ម្សិលមិញ​ក្រុម​ការងារក្រសួង​ទេសចរណ៍ ដឹក​នាំ​ដំណើរ​ទស្សនកិច្ច​ជូន​លោកស្រី Devyani Khobragade ឯកអគ្គ​រដ្ឋ​ទូត​ឥណ្ឌា​ប្រចាំ​កម្ពុជា ទៅ​កាន់​សហគមន៍ទេសចរណ៍​ទួលព័ន្ធ​តាឡី (បឹងស្នេហ៍) ខេត្តព្រៃវែង ដើម្បី​ស្វែង​យល់​អំពី​សក្តានុពល​ទេសចរណ៍​នៅ​ទី​នោះ និង​ពិនិត្យ​លទ្ធភាព​ក្នុង​ការ​ជួយអភិវឌ្ឍ​សហគមន៍​នេះ។

Content image - Phnom Penh Post

លោក​ថ្លែង​ថា៖ «លោក​ជំទាវ​ទូត​ទី១ លោក​កោត​សរសើរ​ទីនោះ​ដោយ​ឃើញ​សក្តានុពល​សត្វស្លាប​ដ៏​សម្បូរ​បែប ដែល​បង្ហាញ​ពី​កិច្ច​អភិរក្ស​ដ៏ហ្មត់ចត់​ពី​សំណាក់​ស្ថាប័ន​ពាក់ព័ន្ធ និង​ប្រជាសហគមន៍។ ហើយ​លោក​ជំទាវ​ក៏​បាន​បង្ហាញ​នូវ​ការ​គាំទ្រ ដែល​អាច​ជា​ការ​គាំទ្រ​ផ្នែក​ហិរញ្ញ​វត្ថុមួយ​ចំនួន​សម្រាប់​គាំទ្រ​ដល់​គម្រោង​មួយ​ដែល​គេ​ហៅ​ថា គម្រោង​មាន​ឥទ្ធិពល​លឿន (Quick Impact Project) តាម​រយៈការ​កសាង​ហេដ្ឋារចនា​សម្ព័ន្ធ​ចាំបាច់ ដូចជា​ការ​កសាង​ចំណត​ទូក​សម្រាប់​ដឹក​ភ្ញៀវ​ទេសចរ មជ្ឈមណ្ឌល​ព័ត៌មាន​ទេសចរណ៍​សហគមន៍ និង​ការ​ដំឡើង​ប៉ាណូបង្ហាញ​ទីតាំង​សហគមន៍​ជាដើម»។

លោក ជំនោ បញ្ជាក់ថា សម្រាប់​ក្រសួង​ទេសចរណ៍​អាច​ជា​ការ​ចាប់​ផ្តើម​គម្រោង Quick Impact Project របស់​ស្ថានទូត​ឥណ្ឌា​ប្រចាំ​កម្ពុជា ជា​លើក​ដំបូង ប៉ុន្តែ​ខាង​ស្ថានទូត​អាច​នឹង​កំពុង​អនុវត្ត​គម្រោង​នេះ​ជាមួយ​ក្រសួង​ស្ថាប័ន​ផ្សេងៗ។

លោកថ្លែងថា៖ «លោក​ជំទាវទូត​លោក​ចាប់​អារម្មណ៍ និង​បង្ហាញ​ការ​គាំទ្រ ក្នុង​ការ​ចាប់​ផ្តើម​អនុវត្ត​នូវ​គម្រោង QIP នេះ ដំបូង​នៅ​បឹង​ស្នេហ៍ ហើយ​បន្ទាប់​មក​ទៀត លោក​អាច​នឹង​អញ្ជើញ​ទៅ​សហគមន៍ ឬ​តំបន់​គោលដៅ​ទេសចរណ៍​ផ្សេងៗ​ទៀត និង​អាច​គាំទ្រ​ដល់​គម្រោង​នេះ​ផងដែរ​នៅ​ពេល​ខាង​មុខ»៕

Content image - Phnom Penh Post

អត្ថបទគួរចាប់អារម្មណ៍