The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋបាល​ខេត្ត​ឧត្តរមានជ័យ សម្រេច​បិទ​ខ្ទប់​ជា​បណ្តោះ​អាសន្ន​ទីតាំង​ប្រជុំជន​នៃ​ភូមិ​ពពេល ចំណែក​ឯ​ខេត្ត​បន្ទាយ​មាន​ជ័យ​មាន​អ្នក​ឆ្លង​កូវីដ ៧៨នាក់

រដ្ឋបាល​ខេត្ត​ឧត្តរមានជ័យ សម្រេច​បិទ​ខ្ទប់​ជា​បណ្តោះ​អាសន្ន​ទីតាំង​ប្រជុំជន​នៃ​ភូមិ​ពពេល ចំណែក​ឯ​ខេត្ត​បន្ទាយ​មាន​ជ័យ​មាន​អ្នក​ឆ្លង​កូវីដ ៧៨នាក់

Content image - Phnom Penh Post
គ្រូពេទ្យ​កំពុង​យក​សំណាក​ប្រជាពលរដ្ឋ​នៅ​ខេត្ត​បន្ទាយ​មាន​ជ៍យ។ រដ្ឋបាលខេត្ត

រដ្ឋបាល​ខេត្ត​ឧត្តរមានជ័យ សម្រេច​បិទ​ខ្ទប់​ជា​បណ្តោះ​អាសន្ន​ទីតាំង​ប្រជុំជន​នៃ​ភូមិ​ពពេល ចំណែក​ឯ​ខេត្ត​បន្ទាយ​មាន​ជ័យ​មាន​អ្នក​ឆ្លង​កូវីដ ៧៨នាក់

រដ្ឋបាល​ខេត្ត​ឧត្តរមានជ័យ​សម្រេច​បិទ​ខ្ទប់​ជា​បណ្តោះ​អាសន្ន​ទីតាំង​ប្រជុំ​ជន​នៃ​ភូមិ​ពពេល ស្ថិត​នៅ​ឃុំ​ផ្អាវ ស្រុក​ត្រពាំង​ប្រាសាទ បន្ទាប់​ពី​ផ្ទុះមាន​ជំងឺ​កូវីដ​១៩ ក្នុង​ភូមិ​នោះ ខណៈ​ខេត្ត​បន្ទាយមានជ័យ​រក​ឃើញ​អ្នក​ជំងឺកូវីដ ៧៨​នាក់​ទៀត។

ក្នុង​សេចក្តី​សម្រេច​ដែល​ចុះ​ហត្ថលេខា​ដោយ​អភិបាល​ខេត្ត​ឧត្តរមានជ័យ ប៉ែន កុសល្យ នៅថ្ងៃទី២ ខែកក្កដា បាន​សម្រេច​បិទ​ខ្ទប់​ជាបណ្តោះ​អាសន្ន​ទីតាំង​ទី​ប្រជុំជន​នៃ​ភូមិ​ពពេល ចាប់​ពី​ចំណុច​មុខ​អនុវិទ្យាល័យ​តេជោ​ថ្នល់​បំបែក រហូត​ដល់​ចំណុច​ផ្លូវ​ចូល​ភូមិ​តាម៉ូ​មាន​ជ័យសង​ខាង​ផ្លូវ​លេខ ២៦២៥ ដែល​មាន​ប្រជាពលរដ្ឋ​ចំនួន ៣៤​គ្រួសារ ស្ថិត​នៅ​ភូមិ​ផ្អាវ ស្រុក​ត្រពាំង​ប្រាសាទ ខេត្ត​បន្ទាយ​មាន​ជ័យ ចាប់​ពី​ថ្ងៃ​ទី ២ ខែ​កក្កដា ឆ្នាំ​២០២១ រហូត​ដល់​មាន​ការ​សម្រេច​ជា​ថ្មី ដោយ​មូល​ហេតុ ទី​តាំងនេះ​មាន​ការ​ពាក់​ព័ន្ធ​នឹង​ករណី​ជំងឺ​កូវីដ​១៩។

តាម​រយៈ​សចក្តី​សម្រេច លោក ប៉ែន កុសល្យ បាន​បញ្ជា​ឲ្យ​ហ៊ុម​ព័ទ្ធ​ទីតាំង​កើត​ជំងឺ​កូវីដ១៩ និង​ផ្អាក​ការ​ចេញ​ចូល ព្រម​ទាំង​ស្រាវ​ជ្រាវ​រក​អ្នកពាក់​ព័ន្ធ​ផ្ទាល់ ឬ​ប្រយោល​ដើម្បី​ធ្វើ​ចត្តាឡីស័ក និង​យក​វត្ថុ​សំណាក​ផង​ដែរ។ ជាមួយគ្នា​នោះ មន្ត្រី​អាជ្ញាធរ​ពាក់​ព័ន្ធ​ត្រូវ​ណែនាំ​ឲ្យ​ម្ចាស់​ទី​តាំងត្រូវ​គោរព​អនុវត្ត​ឲ្យ​បាន​ម៉ឺងម៉ាត់​តាម​វិធាន​ការ​រដ្ឋបាល វិធាន​ការ​សុខាភិបាល របស់​រាជរដ្ឋាភិបាល និង​វិធានការ​នានា​របស់​រដ្ឋបាល​ខេត្ត​ដែលមាន​ជា​ធរមាន។

ក្នុង​សេចក្តី​ប្រកាស​សរសេរ​ថា «ពលរដ្ឋ​ដែល​មាន​ការ​ពាក់​ព័ន្ធ​ផ្ទាល់ ឬ​ប្រយោល​ក្នុង​ទីតាំង​បិទ​ខ្ទប់​នេះ ត្រូវ​ដាក់​ខ្លួន​នៅ​ដាច់​ដោយ​ឡែក​រយៈពេល ១៤​ថ្ងៃ តាម​វិធាន​សុខាភិបាល។ បើ​មាន​រោគ​សញ្ញា​ក្អក ផ្តាសាយ ហៀរ​សំបោរ ឈឺ​បំពង់​ក ថប់​ដង្ហើម ក្តៅ​ខ្លួន​ខ្លាំង​ឬ​រោគ​សញ្ញាសង្ស័យ​ផ្សេងៗ​ទៀត ត្រូវ​ទាក់​ទង​ក្រុម​ការងារ​ប្រចាំ​ការ និង​យក​សំណាក​ដែល​មាន​ទីតាំង​ស្ថិត​នៅ​មន្ទីរពេទ្យ​បង្អែក​ ស្រុក អន្លង់វែង មន្ទីរពេទ្យ​បង្អែក​ខេត្ត ឬ​ទំនាក់​ទំនង​ទូរស័ព្ទ​លេខ ០១២ ៤៩៩ ១៩២»។

ដោយឡែក នៅ​ខេត្ត​បន្ទាយ​មាន​ជ័យ​នៅ​ថ្ងៃ​នេះ បាន​ប្រកាស​ពី​ការ​រក​ឃើញ​វិជ្ជមាន​ជំងឺ​កូវីដ​១៩ ចំនួន ៧៨ នាក់​បន្ថែម​ទៀត ដោយ​មិន​មានករណី​ជា​សះស្បើយ​ថ្មី​ឡើយ។ រដ្ឋបាល​ខេត្ត​បន្ទាយ​មាន​ជ័យ បាន​ប្រកាស​ប្រាប់​ប្រជាពលរដ្ឋ និង​សាធារណជន ដែល​បាន​ប៉ះពាល់​ដោយផ្ទាល់​ត្រូវ​រួសរាន់​មក​ជួប​ក្រុម​គ្រូពេទ្យ និង​ធ្វើ​ចត្តា​ឡីស័ក ដើម្បី​យក​សំណាក​ទៅ​ពិនិត្យ។ ចំណែក​អ្នក​ប៉ះពាល់​ដោយ​ប្រយោល ជាមួយ​អ្នក​ជំងឺកូវីដ​១៩ ចំនួន ៧៨​នាក់​នោះ ត្រូវ​រួស​រាន់​ធ្វើ​ចត្តាឡីស័ក​តាម​ផ្ទះ​ក្នុង​ក្រុម​គ្រួសារ​រៀងៗ​ខ្លួន ដោយ​មិន​ត្រូវ​ពាក់​ព័ន្ធ និង​ប៉ះពាល់​ជាមួយ​អ្នក​ដទៃជា​ដាច់​ខាត។

ក្នុង​សេចក្តី​ប្រកាស​ព័ត៌មាន​សរសេរ​ថា « ក្នុង​ករណី​មាន​ការ​ប្រែប្រួល​សុខ​ភាព​ខុស​ប្រក្រតី ដូចជា​ឡើង​កម្តៅ​លើស ៣៧​អង្សាសេ ក្អក កណ្តាស់ ហៀរសំបោរ ឈឺបំពង់ក មានកំហាក ថប់ដង្ហើម ជាដើម ត្រូវ​ប្រញាប់​ទំនាក់​ទំនង​ទៅ​ក្រុម​ឆ្លើយតប​បន្ទាន់ ឬ​ទំនាក់​ទំនង​ទូរស័ព្ទលេខ ០១២ ៧២៤០៤២ /០១២ ៩៤៨៧៧៩»៕

អត្ថបទគួរចាប់អារម្មណ៍