កំពតៈ ប្រជាពលរដ្ឋចំនួន ៤ នាក់ រស់នៅក្នុងភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត បានស្លាប់ជាបន្តបន្ទាប់នៅថ្ងៃទី៣ ខែកក្កដានេះ ដោយសង្ស័យពុលស្រាស ដោយផឹកជួបជុំលក្ខណៈគ្រួសារ ខណៈ ៥ នាក់ផ្សេងទៀត កំពុងសម្រាកព្យាបាលនៅឯមន្ទីរពេទ្យ។
លោក អូន ខន អភិបាលស្រុកំពង់ត្រាច ប្រាប់ភ្នំពេញប៉ុស្តិ៍នៅថ្ងៃទី ៣ ខែកក្កដា ឆ្នាំ ២០២១ នេះថា ក្រុមការងាររបស់លោកកំពុងនៅកន្លែងកើតហេតុ ដើម្បីធ្វើការស្រាវជ្រាវឱ្យបានពិតប្រាកដ ប៉ុន្តែក្រុមគ្រូពេទ្យបានដាក់ការសង្ស័យបឋមថា ពួកគេស្លាប់ដោយសារពុលស្រា។
លោក អូន ខនថ្លែងថា៖ «ឥឡូវខាងពេទ្យគេសង្ស័យថា ពុលស្រា ប៉ុន្តែ មិនទាន់ច្បាស់ ១០០% ទេ ចាំយកទៅពិនិត្យនៅឡាបូសិន នៅមន្ទីរពិសោធនន៍ទើបដឹង»។
បើតាម លោក អូន ខន អាជ្ញាធរបានផ្សព្វផ្សាយពីបញ្ហាគ្រោះថ្នាក់ដែលកើតឡើង ដោយសារស្រាស និងបិទតូបលក់ស្រាដែរ ប៉ុន្តែពួកគាត់នៅតែទិញយកមកផឹកលក្ខណៈគ្រួសារ នៅពេលល្ងាចឡើង៕